លោកស្រី ការី ឡាំ ជម្នះ​បន្ត​ដឹកនាំ​ហុងកុង ដោយ​សំអាងថា​មាន​វិបត្តិ​ត្រូវ​ដោះស្រាយ​
អន្តរជាតិ
លោកស្រី ការី ឡាំ ជម្នះ​បន្ត​ដឹកនាំ​ហុងកុង ដោយ​សំអាងថា​មាន​វិបត្តិ​ត្រូវ​ដោះស្រាយ​
23, Jan 2020 , 9:39 pm        
រូបភាព
ប្រធានប្រតិបត្តិទីក្រុង ហុងកុង លោកស្រី ការី ឡាំ ថ្លែងក្នុងវេទិកាសេដ្ឋកិច្ចពិភពលោក កាលពីថ្ងៃថ្ងៃ ២២ មករា ឆ្នាំ២០២០ នាទីក្រុង Davos ប្រទេសស្វីស
ប្រធានប្រតិបត្តិទីក្រុង ហុងកុង លោកស្រី ការី ឡាំ ថ្លែងក្នុងវេទិកាសេដ្ឋកិច្ចពិភពលោក កាលពីថ្ងៃថ្ងៃ ២២ មករា ឆ្នាំ២០២០ នាទីក្រុង Davos ប្រទេសស្វីស
​ប្រធាន​ប្រតិបត្តិ​ហុងកុង លោកស្រី ការី ឡាំ បាន​បញ្ជាក់ថា ទីក្រុង ហុងកុង មាន​វិបត្តិ​ខ្លះ​ត្រូវ​ដោះស្រាយ។ ដោយ​បដិសេធ​ការទាមទារ​ឲ្យ​លាលែង​ពី​តំណែង មេដឹកនាំ​រូបនេះ អះអាងថា លោកស្រី​នឹង​បន្ត​ដឹកនាំ​ទីក្រុង​នេះ​ទៀត​។

 
​ក្នុង​វេទិកា​សេដ្ឋកិច្ចពិភពលោក នៅ​ថ្ងៃទី​២២ ខែមករា នាទី​ក្រុង Davos ប្រទេស​ស្វី​ស លោកស្រី ការី ឡាំ លើកឡើងថា លោកស្រី​ត្រូវតែ​រក្សា​តំណែង​ជា​មេដឹកនាំ​ហុងកុង​ដើម្បី​ដោះស្រាយ​វិបត្តិ​សេដ្ឋកិច្ច និង​កូ​រ៉ូ​ណាវី​រុស​។  ត្រង់ចំណុច​នេះ លោកស្រី អះអាងថា​៖«​គ្មានអ្វី​សំខាន់​ច្រើនជាង​នីតិរដ្ឋ​ឡើយ​»​។ គិត​មកទល់ពេលនេះ ជំងឺ​រលាក​សួត​ប្រភេទ​ថ្មី​នេះ បានសម្លាប់​មនុស្ស​១៧​នាក់​ហើយ​ក្នុងប្រទេស​ចិន​។ 
 
«​វា​នឹង​ងាយស្រួល​ក្នុងការ​រត់គេច​ពី​ស្ថានភាព​នេះ​»​។ លោកស្រី ការី ឡាំ លើកឡើង​បែបនេះ​នៅ​ចំពោះមុខ​មេដឹកនាំ​ពិភពលោក​ដទៃទៀត ដោយ​បន្ថែមថា ក៏ប៉ុន្តែ​វា​ពិបាក​ក្នុង​ការដឹកនាំ​និង​អនុវត្ត​គោលនយោបាយ​។ តាម​ការចុះផ្សាយ​របស់​ទីភ្នាក់ងារ​ព័ត៌មាន Reuters លោកស្រី​សង្កត់ធ្ងន់ថា សម្រាប់​អ្នក​ដែល​ឈ្វេងយល់​ពី​រចនាសម្ព័ន្ធ​នយោបាយ​របស់​ហុងកុង ការចាកចេញ​ពី​តំណែង​របស់​លោកស្រី នឹង​កាន់តែ​ធ្វើ​ឲ្យ​ស្ថានការណ៍​ដុនដាប​ថែមទៀត​។​
 
​ការលើកឡើង​របស់លោក​ស្រី ការី ឡាំ ផ្ទុយ​នឹង​សម្តី​លោកស្រី កាលពី​ខែ សីហា ឆ្នាំ​២០១៩​កន្លងទៅ​។ ក្នុង​សារ​អាត់​សំឡេង​មួយ​ដែល​ទីភ្នាក់ងារ​ព័ត៌មាន Reuters លោកស្រី​ប្រធាន បានបញ្ជាក់​ក្នុងជំនួប​ឯកជន​ដែលមាន​អ្នកជំនួញ​ធំៗ​ហុងកុង​ថា លោកស្រី បាន​បង្កើត​ការបំផ្លិចបំផ្លាញ​ដ៏​ធំ​ដែល​ពុំ​អាច​លែង​ទោស​ឲ្យ​បាន ដោយ​ការ​បញ្ឆេះ​វិបត្តិ​នេះ​។ លោក ស្រី សង្កត់ធ្ងន់ថា លោកស្រី នឹង​លាលែង​ពី​តំណែង​កំពូល​នេះ ប្រសិនបើ​លោកស្រី​បានអនុញ្ញាត​ឲ្យ​ធ្វើ​ដូច្នេះ​។ 
 
​ប៉ុន្មាន​ម៉ោង​ប៉ុណ្ណោះ​ក្រោយ​អាជ្ញាធរ​ហុងកុង បានដាក់​បុរស​ម្នាក់​ដែល​សង្ស័យថា ផ្ទុក​វីរុស​ប្រភេទ​ថ្មី ឲ្យ​នៅ​ដាច់ដោយឡែក​ពី​គេ លោកស្រី ការី ឡាំ លើកឡើងថា អាជ្ញាធរ​លោកស្រី បានដាក់​ចេញ​ចំណាត់ការ​ចាំបាច់​នានា​ដើម្បី​ទប់ទល់​នឹង​បញ្ហា​នេះ ហើយ​ទទួលស្គាល់ថា ក្រុង​ហុងកុង​បាន​រៀនសូត្រ​ពី​បញ្ហា​វីរុស SARS ដែល​បានសម្លាប់​មនុស្ស​ជិត​៣០០​នាក់​ក្នុង​ទីក្រុង​នេះ កាលពី​ឆ្នាំ​២០០៣​។ លោកស្រី​និយាយ​បែបនេះ​ថា ភ្នាក់ងារ​សុខាភិបាល​ហុងកុង មាន​ភាព​ប្រុងប្រយ័ត្ន​ខ្ពស់ និង​តាមដាន​ជានិច្ច ខណៈ​មនុស្ស​កាន់តែច្រើន បាន​ចេញចូល​ព្រំដែន​ហុងកុង​៕
 

Tag:
 ហុងកុង​
  ការី​ឡាំ
© រក្សាសិទ្ធិដោយ thmeythmey.com