រយៈពេល១៣ឆ្នាំ ខេត្តពោធិ៍សាត់ ផលិត និងលក់បន្លែសុវត្ថិភាពបានជាង១ពាន់តោន

ជាតិ

រយៈពេល១៣ឆ្នាំ ខេត្តពោធិ៍សាត់ ផលិត និងលក់បន្លែសុវត្ថិភាពបានជាង១ពាន់តោន

24, Jan 2020 , 9:19 am

រូបភាព

ដោយ: ផាត ដាណេ

ភ្នំពេញ៖ គិតចាប់ពីឆ្នាំ២០០៧ មកដល់ដើមឆ្នាំ២០២០នេះខេត្តពោធិ៍សាត់ បានដាំដុះ និងលក់បន្លែសុវត្ថិភាព បានជាង១ពាន់តោន។ នេះបើតាម លោក ម៉ៅ ធនិន អភិបាលខេត្តពោធិ៍សាត់ ដែលបានថ្លែង នៅក្នុងពិធីប្រកាសឲ្យដាក់ដំណើរការ អង្គភាពច្រកចេញចូលតែមួយ កាលពីថ្ងៃទី២២ ខែមករាកន្លងទៅ។

លោក ម៉ៅ ធនិន បានលើកឡើងថា រដ្ឋបាលខេត្តបានសហការជាមួយមន្ទីរកសិកម្ម រុក្ខាប្រមាញ់ និងនេសាទ បានគាំទ្រដល់ការដាំដុះបន្លែសុវត្ថិភាព ចាប់ពីឆ្នាំ២០០៧ រហូតដល់បច្ចុប្បន្ន ដោយផលិតបានបន្លែសុវត្ថិភាព និងលក់បានចំនួន ១,០៥៤តោន។

ផ្ទៃដីកសិកម្មនៅក្នុងខេត្តពោធិ៍សាត់ មានជិត៣៥ម៉ឺនហិកតា ក្នុងនោះមានដំណាំស្រូវ កៅស៊ូ ក្រូចពោធិ៍សាត់ និងដំណាំឧស្សាហកម្មផ្សេងទៀត។ នេះបើតាមលោកអភិបាលខេត្តនៅក្នុងពិធីនោះ លោក ម៉ៅ ធនិន ក៏បានលើកឡើងពីសក្តានុពលទេសចរណ៍នៅក្នុងខេត្តរបស់ខ្លួនផងដែរ។

បើតាមអភិបាលខេត្ត ខេត្តពោធិ៍សាត់ មានតំបន់ទេសចរណ៍សក្តានុពលដូចជា រមណីយដ្ឋានទឹកធ្លាក់ច្រកល្អៀង, ភូមិអណ្ដែតទឹកកំពង់ហ្លួង, រមណីយដ្ឋានភ្នំតាងក្រាច, រមណីយដ្ឋានល្បាក់កំរោញ, ដែនជម្រកសត្វស្លាបបឹងព្រះគន្លី, តំបន់ផ្សងព្រេងភ្នំទំព័រ (កម្ពស់១៥៥១ម៉ែត្រ), តំបន់អេកូទេសចរណ៍អូរសោម, ទេសភាពវារីអគ្គិសនី, ព្រៃក្រវាញ, ទឹកធ្លាក់ព្រៃស្ដុក និងទឹកជ្រោះធ្លាក់ពីលើភ្នំជាដើម។ ក្នុងឆ្នាំ២០១៩ ខេត្តនេះ ទទួលបានភ្ញៀវទេសចរជាតិ ជាង៥សែននាក់ និងអន្តរជាតិជាង៨ពាន់នាក់៕