សុខភាព
អន្តរជាតិ
កូរ៉ូណាវីរុស៖ WHO ថា ចិនស្ថិតក្នុងស្ថានភាពអាសន្ន ខណៈអ្នកស្លាប់កើនដល់២៥នាក់
អ្នកបម្រើការតាមអាកាសយានដ្ឋាននៅចិនសុទ្ធប្រើម៉ាសទាំងអស់។ រូបថត AFP
×![]()
ដោយ: ធៀន ភារិន្ទ
អង្គការសុខភាពពិភពលោក (WHO) នៅថ្ងៃទី២៣ ខែមករា បានលើកឡើងពីស្ថានភាពអាសន្ននៃការរាតត្បាតវីរុសដែលកើតចេញពីទីក្រុងវូហាន។ បើតាមស្ថានភាពជាក់ស្តែង នេះជាបញ្ហាព្រួយបារម្ភនៅក្នុងប្រទេសចិននៅឡើយ ស្របពេលចំនួនអ្នកស្លាប់បានកើនឡើងរហូតដល់ ២៥ នាក់ ហើយអ្នកជំងឺផ្ទុកមេរោគកូរ៉ូណាវីរុសប្រភេទថ្មីនេះ បានកើនរហូតដល់ជាង ៨០០ករណី។ 
តាមតួលេខចុងក្រោយ គណៈកម្មការសុខាភិបាលជាតិចិន បានប្រកាសថា ប្រជាជនចិន បានឆ្លងមេរោគកូរ៉ូណាវីរុសប្រភេទថ្មីនេះរហូតដល់ ៨៣០ករណី ស្របពេលចំនួនអ្នកស្លាប់បានកើនឡើងរហូតដល់ ២៥នាក់។
ពាក់ព័ន្ធទៅនឹងបញ្ហានេះ អង្គការសុខភាពពិភពលោក បានបើកកិច្ចប្រជុំមួយនាទីក្រុង ហ្សឺណែវ ប្រទេសស្វ៊ីស។ ដោយមើលឃើញថា ជំងឺនេះគឺមានលក្ខណៈធ្ងន់ធ្ងរតែនៅចិន និងការសាយភាយមានចំនួនតិចទៅប្រទេសមួយចំនួន អង្គការសុខភាពពិភពលោក បានប្រកាសអាសន្នមេរោគកូរ៉ូណាវីរុសថ្មីនេះ ត្រឹមតែជាបញ្ហាបារម្ភនៅក្នុងប្រទេសចិនប៉ុណ្ណោះ។ បើតាមការរបស់ប្រធានគណៈកម្មាធិការការប្រកាសអាសន្នលើបញ្ហាជំងឺរបស់អង្គការសុខភាពពិភពលោក វា គឺលឿនពេក ដែលត្រូវប្រកាសមេរោគកូរ៉ូណាវីរុសជាបញ្ហាព្រួយបារម្ភជាសកល ព្រោះជំងឺនេះ កើតឡើងតែនៅក្នុងប្រទេសចិនតែប៉ុណ្ណោះ ហើយមិនទាន់រីកសាយភាយខ្លាំងទៅប្រទេសផ្សេងទេ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters ។
គិតត្រឹមពេលនេះ មេរោគកូរ៉ូណាវីរុសថ្មីនេះ ត្រូវបានរកឃើញនៅកន្លែងផ្សេងៗដូចជា អាមេរិក១ករណី ថៃ៤ករណី វៀតណាម ២ករណី សិង្ហបុរី ១ករណី តៃវ៉ាន់ ១ករណី ម៉ាកាវ ២ករណី ហុងកុង ២ករណី ជប៉ុន ២ករណី និងកូរ៉េខាងត្បូង ២ករណី។
ដើម្បីទប់ស្កាត់កុំឲ្យមានការរីកសាយភាយជំងឺកាន់តែខ្លាំងឡើង រដ្ឋាភិបាលចិន បានផ្អាកជើងហោះហើរបណ្តោះអាសន្នសិន នៅក្នុងទីក្រុងវូហាន នាថ្ងៃទី២៣ ខែមករា នៅម៉ោង១០ព្រឹក។ ចំណែកប្រព័ន្ធដឹកជញ្ជូនផ្សេងទៀត ក៏ត្រូវផ្អាកដែរ រហូតដល់មានមានការកត់សម្គាល់ថ្មី ទើបបើកដំណើរការវិញ។ ដោយឡែកប្រជាជន នៅក្នុងក្រុងវូហាន កំពុងអំពាវនាវរកជំនួយ អាហារ ម៉ាស់ជាដើម។
សូមបញ្ជាក់ថា អ្នកដែលឆ្លងវីរុសអាចមានរោគសញ្ញា ក្តៅខ្លួន ក្អក ហៀរសំបោរ ឈឺក ដង្ហើមខ្លីៗ ហើយបើធ្ងន់ធ្ងរ វានឹងធ្វើឲ្យប៉ះពាល់ដល់ផ្លូវដង្ហើម និងបាត់បង់ជីវិតទៀតផង ៕
Tag:
ចិន
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
