ជាតិ
បទយកការណ៍ / បទសម្ភាសន៍
ហាងកាហ្វេឫស្សីត្រឹបក្នុងរាជបណ្ឌិត្យសភាកម្ពុជា ជាកន្លែងលក់ និងផ្សព្វផ្សាយទឹកដោះគោតេជោសែនឫស្សីត្រឹប
× ភ្នំពេញ៖ បន្ទាប់ពីជោគជ័យក្នុងការផលិតទឹកដោះស្រស់នៅខេត្តព្រះវិហាររួចមក រាជបណ្ឌិត្យសភាកម្ពុជា បានដាក់ឲ្យដំណើរការហាងកាហ្វេមួយឈ្មោះថា កាហ្វេឫស្សីត្រឹប ដែលមានទីតាំងក្នុងរាជបណ្ឌិត្យសភាកម្ពុជា។ ហាងកាហ្វេនេះ មិនត្រឹមតែផ្តល់ជូនកាហ្វេឆ្ងាញ់ផ្សំចេញពីវត្ថុធាតុដើមក្នុងស្រុកនោះទេ ទីនេះនឹងក្លាយជាកន្លែងចែកចាយទឹកដោះគោតេជោសែនឫស្សីត្រឹបដ៏ធំបំផុតនៅក្រុងភ្នំពេញ។
សូមអញ្ជើញស្តាប់បទសម្ភាសរវាងលោក រ៉ឹម ភារី អ្នកសារព័ត៌មាននៃគេហទំព័រថ្មីៗ ជាមួយ កញ្ញា ម៉ៅ សុគន្ធា ដូចតទៅ៖
កញ្ញា ម៉ៅ សុគន្ធា ជាអ្នកគ្រប់គ្រងផ្នែកទីផ្សារហាងកាហ្វេឫស្សីត្រឹប បានប្រាប់សារព័ត៌មានថ្មីៗថា ការបង្កើតហាងកាហ្វេដែលមានទីតាំងក្នុងរាជបណ្ឌិត្យសភាកម្ពុជានេះ គឺដើម្បីបម្រើដល់សេចក្តីត្រូវការរបស់មន្ត្រី ឬអ្នកស្រាវជ្រាវ និងនិស្សិត ដែលចង់ទទួលទានកាហ្វេប៉ៃលិន និងទឹកដោះគោ ដែលផលិតនៅឧទ្យានជាតិតេជោសែនឫស្សីត្រឹប ខេត្តព្រះវិហារ។ ហាងកាហ្វេនេះ ក៏នឹងក្លាយជាកន្លែងលក់ផលិតផលទឹកដោះគោ ដែលជាសមិទ្ធផលរបស់រាជបណ្ឌិត្យសភាកម្ពុជាដែរ។
កញ្ញា ម៉ៅ សុគន្ធា ពន្យល់យ៉ាងដូច្នេះថា៖ «ទីនេះ គឺជាស្តុកទឹកដោះគោធំមួយ។ យើងដឹកជញ្ជូនទឹកដោះគោ ពីឧទ្យានរាជបណ្ឌិត្យសភាតេជោសែនឫស្សីត្រឹប ក្នុងខេត្តព្រះវិហារមកភ្នំពេញ មកស្តុកនៅទីនេះ។ ដូច្នេះ សាធារណជនដែលមានបំណងជាវទឹកដោះគោនេះ អាចអញ្ជើញមកបាន»។
ប្រធានផ្នែកទីផ្សាររូបនេះ បន្តថា អតិថិជនដែលមកទីនេះ នឹងទទួលបានកាហ្វេរសជាតិឆ្ងាញ់ ផ្សំចេញពីវត្ថុធាតុដើមក្នុងស្រុក និងមានតម្លៃធូរថ្លៃ ថែមទាំងបានអានសៀវភៅជាច្រើន ដែលជាស្នាដៃស្រាវជ្រាវ របស់បញ្ញវន្តជាច្រើននៅទីនេះផងដែរ៕
Tag:
ទឹកដោះគោ
ឫស្សីត្រឹប
កាហ្វេ
© រក្សាសិទ្ធិដោយ thmeythmey.com