ជាតិ
សង្គមជាតិ
លោក លឹម កញ្ចរ៉ុង៖«កុំសែន តម្រូវតាមអ្នកនៅរស់ ត្រូវតម្រូវតាមដូនតាដែលចែកឋាន ទើបបានលាភជ័យ»
× ភ្នំពេញ៖ ជនជាតិចិន-វៀតណាម និងពលរដ្ឋខ្មែរដែលជាប់សែចិន តែមានទម្លាប់រៀបចំម្ហូបអាហារ ជ្រូកខ្វៃ មាន់ទា ផ្លែឈើ នំចំណី បង្អែម និងភេសជ្ជៈជាដើម ជាគ្រឿងសំណែនដូនតា នៅក្នុងក្នុងពិធីបុណ្យចូលឆ្នាំចិន-វៀតណាម។ បើតាមលោក លឹម កញ្ចរ៉ុង បង្រៀនភាសាចិននៅវិទ្យាស្ថានអន្តរជាតិកម្ពុជា-អាស៊ាន ដ្បិតការរៀបចំចំណីអាហារសែនដល់ដូនតាគឺជាកាតព្វកិច្ច ប៉ុន្តែការសែននេះ ក៏មិនមែនចេះតែធ្វើតាមចិត្តនោះដែរ។ លោក លឹម កញ្ចរ៉ុង បញ្ជាក់ នំចីណីសែន គឺត្រូវរៀបចំតម្រូវអ្នកដែលចែកឋាន មិនមែនតម្រូវអ្នកនៅរស់នោះទេ។
ជាបន្តសូមអញ្ជើញទស្សនាកិច្ចសម្ភាស រវាងកញ្ញា សៅ សុខអេង អ្នកសារព័ត៌មានថ្មីៗ និងលោក លឹម កញ្ចរ៉ុង គ្រូបង្រៀនភាសាចិននៅវិទ្យាស្ថានអន្តរជាតិកម្ពុជា-អាស៊ានដូចតទៅ៖
នៅក្នុងពិធីបុណ្យចូលឆ្នាំចិន ការរៀបចំចំណីអាហារប្រណិត មានសោភ័ណ និងមានរសជាតិឆ្ងាញ់ សម្រាប់សែនឧទ្ទិសដល់ដូនតាដែលបានចែកឋាន គឺជាកាតព្វកិច្ចរបស់កូនចៅ។ ក៏ប៉ុន្តែបើតាម លោក លឹម កញ្ចរ៉ុង គ្រូបង្រៀនភាសាចិននៅវិទ្យាស្ថានអន្តរជាតិកម្ពុជា-អាស៊ាន គេត្រូវរៀបចំនំចីណីទាំងនោះ តម្រូវអ្នកដែលបានចែកឋាន ហើយចៀសវាងធ្វើតម្រូវចិត្តសាច់ញាតិដែលនៅរស់។
លោក លឹម កញ្ចរ៉ុង ពន្យល់ដូច្នេះថា៖«ម្ហូបអីក៏ដោយដែលគាត់ចូលចិត្តបំផុត សែនឲ្យគាត់ ទើបល្អ។ អ្នកខ្លះពេលសែន អត់រំលឹកដល់ដូនតាទេ បែរទៅសួរកូនចៅថា តើចង់ហូបអី? បើចង់ហូបអី យើងសែនអាហ្នឹងតែម្តង។ នេះជាទស្សនៈមិនត្រឹមត្រូវទេ។ អីចឹងនេះមិនមែនសែនជូនកុងម៉ា និងដូនតាគាត់ទេ ប៉ុន្តែគាត់គឺកំពុងតែសែនឲ្យកូន និងប្តីគាត់ទៅវិញទេ។ យើងគួរតែដឹងថា ឪពុកម្តាយ និងដូនតា កាលគាត់នៅរស់នោះ គាត់ចូលចិត្តអី ហើយយើងគួរតែសែនឲ្យត្រូវមាត់គាត់ ទើបជារឿងដែលល្អ»។
ម្ហូបសែនទៀតសោត ក៏ត្រូវសែនតាមប្រពៃណីទំនៀមទម្លាប់ និងតាមជំនឿដែលនាំលាភ សំណាងផងដែរ។ តាមប្រពៃណីចិន ម្ហូបដែលគួរសែននៅថ្ងៃចូលឆ្នាំចិន មានដូចជាការសែនជ្រូកខ្វៃ មាន់ទា មីឆា ម្ហូបអាហារផ្សេងៗ និងផ្លែឈើណា ដែលមានពណ៌ក្រហម និងមានរសជាតិផ្អែម ហើយគួរជៀសវាងសែនសាច់សត្វដែលសាហាវ។ នេះបើតាមលោក លឹម កញ្ចរ៉ុង៕
Tag:
ចូលឆ្នាំចិន
សែនព្រេន
ដូនតា
© រក្សាសិទ្ធិដោយ thmeythmey.com