ជាតិ
សុខភាព
រោគសញ្ញានៃការឆ្លងវីរុសកូរ៉ូណា គឺក្តៅខ្លួន ហូរសំបោរ ឈឺបំពង់ក ដង្ហើមខ្លី និងពិបាកដកដង្ហើម
× ភ្នំពេញ៖ កូរ៉ូណាវីរុស(ជំងឺរលាកសួតថ្មី) ជាប្រភេទជំងឺថ្មីមួយដែលបានកើតឡើងដំបូងនៅប្រទេសចិន ហើយបានបន្តរាលដាលដល់ប្រទេសផ្សេងៗ តាមរយៈការឆ្លងពីមនុស្សទៅមនុស្ស។ រោគសញ្ញានៃការឆ្លងវីរុសកូរ៉ូណានេះ គឺមានអាការៈក្តៅខ្លួន ក្នុងកម្រិត៣៨អង្សាសេ ព្រមទាំងមានរោគសញ្ញាផ្សេងៗ ដូចជា ក្អក ឈឺបំពង់ករ ហូរសំបោរ ដង្ហើមខ្លី និងពិបាកដកដង្ហើម។ ក្រសួងសុខាភិបាល បានបញ្ជាក់ថា កូរ៉ូណាវីរុសនេះ គឺអាចកើតមានឡើងក្នុងរោគសញ្ញាណាមួយណាយ៉ាងតិច។
ទន្ទឹមនឹងគ្នានេះ ក្រសួងក៏បានសង្កត់ធ្ងន់ថា ក្នុងកំឡុងពេល១៤ថ្ងៃឬ២សប្តាហ៍ មុខនឹងចេញរោគសញ្ញាណាមួយខាងលើនេះ ក្រោយបានប៉ះពាល់ជាមួយអ្នកជំងឺនិងសត្វមានជំងឺផ្លូវដង្ហើមឬបានប៉ះពាល់អ្នកស្លាប់ដោយមានជំងឺផ្លូវដង្ហើមស្រួចស្រាវមិនដឹងអត្តសញ្ញាណ(ប្រភេទមេរោគ) ច្បាស់លាស់ គឺត្រូវប្រញាប់រាយការណ៍ទៅលេខទូរសព្ទទាន់ហេតុការណ៍ ១១៥។
បើយោងតាមសេចក្តីជូនដំណឹងរបស់ក្រសួងសុខាភិបាល កាលពីថ្ងៃ២១មករា ឆ្នាំ២០២០១ ដើម្បីបង្ការនៃឆ្លងវីរុសកូរ៉ូណានេះ ពលរដ្ឋគ្រប់រូបបើគ្មានភារកិច្ចទេត្រូវជៀសវាងចូលកន្លែងចិញ្ចឹមសត្វ ឬ ប៉ះពាល់សត្វ នៅតាមកសិដ្ឋាន ទីផ្សារលក់បក្សីរស់ កន្លែងសត្តឃាត និងកុំប៉ះពាល់ផ្ទៃណាមួយដែលកខ្វក់ដូចជាលាមករបស់សត្វគ្រប់ប្រភេទ។ ជៀសវាងការប៉ះពាល់ជិតសិទ្ធជាមួយអ្នកមានជំងឺផ្លូវដង្ហើមស្រួចស្រាវ។ លើសនេះទៅទៀត គឺត្រូវជ្រៀសវាង ប៉ះពាល់ និង បរិភោគសត្វនិងគ្រឿងសមុទ្រ ដែលមកពីកន្លែង មានវីរុសកូរ៉ូណា កំពុងចរាចរណ៍។
បន្ថែមពីនេះក្រសួងក៏បានណែនាំពលរដ្ឋឱ្យលាងញឹកញាប់ជាមួយសាប៊ូ និងទឹកស្អាត បន្ទាប់ពីបានប៉ះពាល់សត្វឬវត្ថុផ្សេងៗដែលអាចជាប្រភពចម្លងមេរោគ ព្រមទាំងប្រកាន់ខ្ជាប់នូវអនាម័យ និងចំណីអាហារជានិច្ច។ ពិសេសត្រូវចម្អិនបក្សី និងស៊ុតឱ្យបានឆ្អិនត្រឹមត្រូវ ដើម្បីជៀសវាងការឆ្លង វីរុសផ្តាសាយបក្សី ឬ វីរុសកូរ៉ណានេះ ដែលអ្នកជំនាញហៅថា ជំងឺរលាកសួតប្រភេទថ្មី។ ដោយឡែកអ្នកមានរោគសញ្ញាជំងឺផ្លូវដង្ហើមស្រួចស្រាវ ត្រូវខ្ទប់មាត់និងច្រមុះពេលក្អក ឬកណ្តាស់ ដោយកន្សែង ក្រម៉ា និងក្រដាសជាដើម។
ក្នុងកំឡុងពេលរីករាលនៃវីរុសកូរ៉ូណានេះ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានក្រើនរម្លឹកដល់ពលរដ្ឋគ្រប់រូប ត្រូវប្រុងប្រយ័ត្នខ្ពស់ ក្នុងការបង្ការ និងការពារពីជំងឺរលាកសួតថ្មី ដែលបង្កដោយវីរុសកូរ៉ូណា ប្រភេទថ្មីនេះ។ រដ្ឋមន្ត្រីសុខាភិបាលរូបនេះបានក្រើនរម្លឹកដូច្នេះ៖ សូមបងប្អូនប្រជាពលរដ្ឋខ្មែរទាំងអស់ត្រូវនៅឱ្យឆ្ងាយពីសត្វ បក្សីឈឺ ឬងាប់ និងកុំទៅទីផ្សារលក់គ្រឿងសមុទ្រវូហាន នៃប្រទេសចិន ឬទីផ្សារ កសិដ្ឋានដែលមានសត្វរស់ សត្វព្រៃ និងកន្លែងដែលគេដឹងថា មានវីរុសកំពុងចរាចរ។ ពលរដ្ឋកុំទៅក្បែរ ឬនៅជិតអ្នកមានជំងឺផ្លូវដង្ហើមស្រួចនៅទីកន្លែងដែលកំពុងផ្ទុះជំងឺរាតត្បាត»។ លោក ម៉ម ប៊ុនហេង បានបញ្ជាក់ ក្នុងសេចក្តីជូនដំណឹងខាងលើថា ប្រសិនបើមានករណីសង្ស័យជំងឺរលាកសួត បង្កដោយវីរុសកូរ៉ូណាប្រភេទថ្មី លោកអ្នកត្រូវស្វែងរកការព្យាបាលជាបន្ទាន់ នៅតាមគ្រឹះស្ថានសុខាភិបាលសាធារណៈ ដែលនៅជិតផ្ទះបំផុត ហើយត្រូវជម្រាបជូនមន្ត្រីសុខាភិបាលអំពីប្រវត្តិជំងឺ និងប្រវត្តិនៃការធ្វើដំណើរ។
អំឡុងបុណ្យចូលឆ្នាំចិននេះ ក្រសួងសុខាភិបាល ត្រៀមមន្ត្រីជំនាញជាង២,០០០នាក់ នៅតាមច្រកព្រំដែន និងអាកាសយានដ្ឋាន ព្រមទាំងមានម៉ាស៊ីនស្កេនកម្ដៅផងដែរ ដើម្បីតាមដានកូរ៉ូណាវីរុស ផងដែរ៕
Tag:
វីរុសកូរ៉ូណា
រលាកសួតថ្មី
© រក្សាសិទ្ធិដោយ thmeythmey.com