ចូលឆ្នាំចិន មាន់ក៏មានទីផ្សារមិនចាញ់ជ្រូកខ្វៃនោះឡើយ

ជាតិ

សង្គមជាតិ

ចូលឆ្នាំចិន មាន់ក៏មានទីផ្សារមិនចាញ់ជ្រូកខ្វៃនោះឡើយ

24, Jan 2020 , 10:39 pm

រូបភាព

ដោយ:

ភ្នំពេញ៖ ក្នុងឱកាសបុណ្យចូលឆ្នាំចិន នេះ អាជីវករលក់មាន់កំពុងតែត្រូវប៉ាន់ និងទទួលបានចំណូលកាក់កប។ មុនមួយថ្ងៃនៃថ្ងៃសែនចូលឆ្នាំចិន អាជីវករនៅតាមខេត្តបានប្រមូលផ្តុំគ្នាមកលក់មាន់នៅតាមផ្សារ ដោយក្នុងមួយថ្ងៃ ពួកគេលក់បានចន្លោះពី១០០ក្បាលទៅ៣០០ក្បាល ក្នុងមួយគីឡូមានតម្លៃ៣ម៉ឺនរៀល។

នៅពីមុខផ្សារដើមគរ នាថ្ងៃទី២៣ ខែមករា ពោរពេញទៅដោយអ្នកធ្វើចរាចរ និងអ្នកដំណើរចេញចូលទៅក្នុងផ្សារបន្លែ ដើម្បីទិញមាន់ ក្រដាសសែន បន្លែ ផ្លែឈើ និងគ្រឿងសំណែនផ្សេងៗទៀត។ អ្នកលក់មាន់ប្រមាណ១០នាក់កំពុងតែមមាញឹកនឹងការលក់មាន់ដែលជារបរត្រូវប៉ាន់នៅថ្ងៃបុណ្យចូលឆ្នាំចិននេះ។

អ្នកស្រី ឈួន រ៉េម ដែលមកពីខេត្តតាកែវ បានយកមាន់មកលក់តាំងពីយប់ថ្ងៃទី២៣មកម្ល៉េះ ដើម្បីលក់ឲ្យទាន់ថ្ងៃបុណ្យចូលឆ្នាំចិននេះ។ កំពុងតែបោចរោមមាន់ និងវេះយកគ្រឿងក្នុងមាន់ដែលភ្ញៀវកម្ម៉ង់ អ្នកស្រី ឈួន រ៉េម បានបញ្ជាក់ថា អ្នកស្រីបានយកមាន់មកលក់ចំនួន៣០០ក្បាលដែលប្រមូលទិញពីអ្នកភូមិដែលចិញ្ចឹមមាន់។ មុននឹងអ្នកស្រី ឈួន រ៉េម អាចយកមាន់មកលក់នេះ អ្នកស្រីបានប្រមូលទិញពីអ្នកភូមិមុនចូលឆ្នាំចិនមួយសប្តាហ៍ ដោយក្នុងមួយផ្ទះអ្នកស្រីប្រមូលបានពី១០ ទៅ២០ក្បាល។

ឆ្នាំនេះជាឆ្នាំទី៥ហើយ ដែលអ្នកស្រី ឈួន រ៉េម ឡើងមកលក់មាន់នៅផ្សារដើមគរក្នុងថ្ងៃបុណ្យចូលឆ្នាំចិន និងថ្ងៃសែនក្បាលទឹក។ ក្នុងទឹកមុខសប្បាយរីករាយ អ្នកស្រី ឈួន រ៉េម បាននិយាយថា អ្នកស្រីនៅសល់មាន់តែប្រមាណ៣០ក្បាលទៀតតែប៉ុណ្ណោះ ដែលអ្នកស្រីនឹងអាចវិលត្រឡប់ទៅផ្ទះវិញនៅពេលល្ងាចនេះ។

មាន់ដែលអ្នកស្រី រ៉េម យកមកលក់ គឺជាមាន់ដែលមានទម្ងន់ប្រមាណជិត២គីឡូក្រោម។ អ្នកស្រី ឈួន រ៉េម បានរៀបរាប់ដូច្នេះថា៖«ចូលឆ្នាំចិនឆ្នាំនេះ លក់ដាច់ជាងឆ្នាំទៅ ដោយសារឆ្នាំនេះខ្ញុំលក់ត្រូវនឹងកន្លែងដែលមានអ្នកទិញចេញចូលច្រើន។ កន្លែងនេះ ខ្ញុំស្គាល់គេ គេក៏ឲ្យលក់ ហើយខ្ញុំក៏មានម៉ូយច្រើន ទើបលក់ឆាប់អស់បែបនេះ ដោយល្ងាចនេះខ្ញុំនឹងត្រឡប់ទៅផ្ទះវិញបានហើយ»។

នៅក្បែរកន្លែងលក់មាន់របស់អ្នកស្រី រ៉េម មានអាជីវករលក់មាន់ដែលមកពីខេត្តតាកែវដូចគ្នា គឺអ្នកស្រី អ៊ី ម៉ៅ។ ឆ្នាំនេះអ្នកស្រី អ៊ី ម៉ៅ យកមាន់មកលក់ត្រឹមជាង១០០មាន់តែប៉ុណ្ណោះ។ អ្នកស្រី អ៊ី ម៉ៅ ខានលក់មាន់អស់រយៈពេល២ឆ្នាំមកហើយ ដែលធ្វើឲ្យអ្នកស្រីមិនអាចរកមាន់ណាដែលមានទម្ងន់ច្រើនដូចអ្នកលក់មាន់ដទៃទៀត។ មាន់ដែលអ្នកស្រីម៉ៅលក់នេះ គឺជាមាន់ដែលអ្នកអ្នកស្រុកសំរោង ខេត្តតាកែវ ចិញ្ចឹមតាមផ្ទះ។

កំពុងវេះគ្រឿងក្នុងមាន់សម្រាប់លក់ឲ្យភ្ញៀវអ្នកទិញ អ្នកស្រីបាននិយាយថា តាំងពីអ្នកស្រី អ៊ី ម៉ៅ យកមាន់មកលក់មកអ្នកស្រីលក់អស់ប្រមាណ៦០ក្បាលហើយ ដោយអ្នកស្រី នឹងបន្តលក់ដល់ថ្ងៃសែនចូលឆ្នាំចិនមួយព្រឹកទៀត មុននឹងអ្នកស្រីត្រឡប់ទៅផ្ទះវិញ។ «ខ្ញុំទើបតែយកមាន់មកលក់នៅពេលព្រឹកនេះ ហើយមាន់ខ្ញុំតូចៗ លក់មិនសូវបានថ្លៃទេ បើគេវិញមានមាន់ធំៗ គេលក់បានថ្លៃ។ ឆ្នាំក្រោយៗទៀត ខ្ញុំនឹងប្រមូលមាន់ណាដែលជាមេៗដើម្បីលក់ឲ្យបានច្រើនដូចគេ»។ នេះជាការបញ្ជាក់ពីអ្នកស្រី អ៊ី ម៉ៅ៕