នៅក្នុងវង្វង់នៃក្រុមជំងឺផ្សេងៗ ជំងឺឆ្លងគឺជាអ្វីមួយដែលមនុស្សគួរតែព្រួយបារម្ភបំផុត។ នៅពេលដែលជំងឺឆ្លងរាតត្បាតមួយចំនួនដែលហៅថា Epidemic បានធ្វើដំណើរទៅកាន់ព្រំដែននៃប្រទេសមួយផ្សេងទៀតបាន គេអាចហៅវាថាជា Pandemic ។
នៅក្នុងរយៈពេលប្រមាណជា១ម៉ឺនឆ្នាំមុន នៅពេលដែលបុព្វបុរសមនុស្សផ្អាកការដើរបរបាញ់សត្វសម្រាប់អាហារ មកតាំងទៅលំនៅជាអចិន្ត្រៃយ៍នៅតាមភូមិស្រុកវិញ ការកើនឡើងនៃចំនួនមនុស្សក្នុងកន្លែងតែមួយនេះបានអនុញ្ញាតឲ្យជំងឺឆ្លងមួយចំនួនរីកដុះដាលបានយ៉ាងលឿន។ នៅពេលដែលសង្គមរបស់មនុស្សមានការប្រាស្រ័យទៅរកគ្នាកាន់តែច្រើនឡើងៗ នោះអត្រាក្នុងការទទួលបានវីរុស ឬបាក់តេរីដែលកាចសាហាវក៏កើនឡើងទៅតាមនោះដែរ។ មនុស្សបានធ្វើសង្គ្រាមជាមួយនឹងមេរោគនានាអស់រយៈពេលរាប់ម៉ឺនឆ្នាំមកហើយ។ តាមគេហទំព័រ history.com ខាងក្រោមនេះគឺជាពេលវេលាមួយចំនួនក្នុងប្រវត្តិសាស្ត្រដែលមនុស្សជាច្រើនបានស្លាប់ដោយសារតែជំងឺឆ្លងកាចសាហាវ។
ឆ្នាំ ៤៣០ មុនគ្រឹស្តសករាជ៖ ទីក្រុងអាតែន ក្រិក
កំណត់ត្រាដែលមានអាយុកាលចំណាស់ជាគេបង្អស់អំពីគ្រោះអាសន្នរោគត្រូវបានគេកត់ត្រាអំពីមេរោគដែលបានឆ្លងក្នុងអំឡុងសង្គ្រាម Peloponnesian នៅពេលដែលមេរោគមួយនេះបានឆ្លងកាត់ប្រទេសលីបី អេស្ស៊ីប និងទីក្រុងអាតែននៃប្រទេសក្រិក។
ឆ្នាំ ១៦៥ ៖ Antonine Plague
អាចជាវត្តមានដំបូងនៃជំងឺដែលមានលក្ខណៈដូចជាអុចស្វាយ មានប្រភពមកពីក្រុមកុលសម្ព័ន្ធ Huns ។ ក្រោយមកជំងឺនេះបានឆ្លងទៅកាន់អាល្លឺម៉ង់ និងអាណាចក្ររ៉ូមាំង ទាមទារជីវិតរបស់អធិរាជ Marcus Aurelius ។
ឆ្នាំ ៥៤១៖ Justinian Plague
ចាប់ផ្តើមដំបូងនៅក្នុងប្រទេសអេស្ស៊ីប មេរោគមួយនេះបានឆ្លងទៅកាន់ប្រទេសនានាដទៃទៀតនៅក្នុងតំបន់សមុទ្រមេឌីទេរ៉ានេ។ ក្នុងរយៈពេល២០០ឆ្នាំក្រោយមក មេរោគមួយនេះបានសម្លាប់មនុស្សប្រមាណជា៥០លាននាក់ ឬ២៦ភាគរយនៃប្រជាជនពិភពលោកកាលពីពេលនោះ។ វាឆ្លងតាមសត្វកណ្តុរ និងរុយតូចៗ។
ឆ្នាំ១៣៥០៖ The Black Death
ដោយសម្លាប់មនុស្សអស់ប្រមាណជា១ភាគ៣នៃចំនួនមនុស្សលើពិភពលោក ជំងឺមួយនេះត្រូវបានគេរកឃើញថាមានវត្តមានមកពីទ្វីបអាស៊ី និងធ្វើដំណើរមកអឺរ៉ុបតាមរយៈការដោះដូរទំនិញបែបអាជីវកម្មឆ្លងកាត់តំបន់។ សាកសព្វមនុស្សជាច្រើននៅក្នុងទ្វីបអឺរ៉ុបត្រូវបានគេគរចោលនៅតាមទីក្រុង។
ឆ្នាំ១៤៩២៖ The Columbian Exchange
នៅពេលដែលជនជាតិអេស្បាញធ្វើដំណើរតាមសំពៅមកទ្វីបអាមេរីកខាងជើងដំបូង ជនជាតិដើមនៅទីនោះបានឆ្លងជំងឺមួយចំនួនដូចជាអុចស្វាយ ដែលពួកគេមិនដែលជួប និងមិនមានប្រព័ន្ធការពាររាង្គកាយទៅកាន់ជម្ងឺនេះពីមុនមក។ ប្រមាណជា៩០ភាគរយនៃចំនួនប្រជាជនអាមេរីកដើម ស្មើនឹងប្រមាណ៥៦លាននាក់បានស្លាប់។
ឆ្នាំ១៦៦៥៖ The Great Plague of London
សម្លាប់ប្រជាជនទីក្រុងឡុង៏ប្រមាណជា២០ភាគរយ។ គេបានសម្លាប់សត្វឆ្កែ និងឆ្មាដោយជឿថាសត្វទាំងនោះជាអ្នកចម្លងមេរោគ។
ឆ្នាំ១៨៥៥៖ The Third Plague Pandemic
ចាប់ផ្តើមពីចិន រួចទៅកាន់ឥណ្ឌានិងហុងកុង មេរោគនេះបានសម្លាប់មនុស្សប្រមាណ១៥លាននាក់។ ឆ្លងតាមសត្វរុយតូចៗ មេរោគនេះលែងសូវមានសកម្មភាពមកទល់ឆ្នាំ១៩៦០។
ឆ្នាំ១៩១៨៖ The Spanish Flu
សម្លាប់មនុស្សប្រមាណ៥០លាននាក់។ ផ្តើមចេញពីប្រទេសចិន និងចម្លងតាមកម្មករជនជាតិចិន នៅពេលដែលពូកគេធ្វើដំណើរទៅកាន់អឺរ៉ុប។ មេរោគនេះបានរីកដុះដាលខ្លាំងនៅក្នុងទីក្រុងម៉ាឌ្រីត ប្រទេសអេស្បាញ។
១៩៨១៖ អេដស៍/HIV
អាចមានប្រភពមកពីក្រុមប្រភេទស្វា Chimpanzee ឯទ្វីបអាហ្វ្រិកឆ្នាំ១៩២០។ មនុស្សប្រមាណជា៣៥លាននាក់បានស្លាប់ដោយសារមេរោគនេះ៕