ពីនេះ ពីនោះ
ត្រីក្សាន។ រូបភាព៖ សៀវភៅមគ្គុទ្ទេសក៍ ស្តីពីប្រភេទត្រីរស់នៅក្នុងដែនទឹកសាប នៃប្រទេសកម្ពុជា
×![]()
គម្រោងអច្ឆរិយភាពនៃទន្លេមេគង្គ (Wonders of the Mekong) សូមដកស្រង់ត្រីមានស្រកាមួយប្រភេទចេញពីប្រភព៖ មគ្គុទ្ទេសក៍ ស្តីពីប្រភេទត្រីរស់នៅក្នុងដែនទឹកសាប នៃប្រទេសកម្ពុជា, fishbase.org និង iucnredlist.org ដែលមានរស់នៅក្នុងប្រទេសអាហ្វហ្គានីស្ថាន បង់ក្លាដេស ប៊ូតង់ កម្ពុជា ចិន ហុងកុង ឥណ្ឌា ឥណ្ឌូនេស៊ី អ៊ីរ៉ង់ អ៊ីរ៉ាក់ ឡាវ ម៉ាឡេស៊ី មីយ៉ាន់ម៉ា ណេប៉ាល់ សឹង្ហបុរី ស្រីលង្កា ថៃ និងវៀតណាម។
ត្រីក្សាន មានឈ្មោះវិទ្យាសាស្ត្រ (Channa gachua) ប្រវែងដងខ្លួនអតិបរមាសរុប ២៨.៨ ស.ម។ វារស់នៅក្នុងទីជម្រកតាមអូរនៅតំបន់ភ្នំ ដោយត្រីពេញវ័យរស់នៅក្នុងទន្លេទំហំមធ្យម និងធំ ព្រែក អូរ ដែលមានទឹកនឹង និងមានទឹកហូរយឺតៗផង។ ត្រីក្សាន ចាប់ចំណីនាពេលយប់នូវពពួកត្រីល្អិតៗ សត្វល្អិត និងសិប្បីជាតិដូចជា ខ្យង ខ្ចៅ គ្រុំ លៀសជាដើមជាអាហារ។
ត្រីក្សាន ត្រូវបានក្រុមអ្នកវិទ្យាសាស្ត្រកត់ត្រាចូលក្នុងបញ្ជីក្រហម IUCN Red List Least Concern (LC) ) ក្នុងឆ្នាំ ២០១០ ជាប្រភេទត្រីដែលមានការព្រួយបារម្ភតិចតួច ដែលថានឹងអាចឈានទៅផុតពូជបាននោះ។
លក្ខណៈសម្គាល់៖ ព្រុយខ្នងពណ៌ស ខាងចុងមានពណ៌ស៊ីជម្ពូ។ ព្រុយកន្ទុយខាងចុងមានពណ៌ស៊ីជម្ពូ។ ស្រកាលើខ្សែឆ្នូតចំហៀងខ្លួនមានចំនួន ៤០-៤៥។ ព្រុយខ្នងមានទ្រនុងចំនួន ៣០-៣៦ ទ្រនុង ដោយខាងចុងមានពណ៌ស៊ីជម្ពូ។ ព្រុយគូទមានទ្រនុងទន់ចំនួន ២១-២៣ ដោយខាងចុងមានពណ៌ស៊ីជម្ពូ។
បញ្ហាប្រឈមចំពោះត្រីប្រភេទនេះ មានដូចជា៖ ការគំរាមកំហែងចំពោះពួកវា នៅមិនទាន់កំណត់បានឡើយ។
© រក្សាសិទ្ធិដោយ thmeythmey.com
