ខណៈការប្រកួតប្រជែងរវាងអាមេរិក និងចិនកាន់តែស្រួចស្រាវ ប្រទេសសមាជិកអាស៊ាន ក៏ត្រូវមើលឃើញថា មាននិន្នាការផ្សេងគ្នាដែរ។ នេះបើតាមការស្ទង់មតិដែលធ្វើដោយវិទ្យាស្ថានល្បីឈ្មោះមួយនៅសិង្ហបុរី។ ការប្រជែងឥទ្ធិពលរបស់មហាអំណាច កំពុងតែបង្កបញ្ហាប្រឈមសម្រាប់សមាជិកអាស៊ានទាំង១០ ដែលព្យាយាមរក្សាការរួមគ្នាតែមួយដើម្បីសម្រេចឲ្យបានកំណើនសេដ្ឋកិច្ច។ មិនមែនប្រឈមមុខការជ្រើសរើសមហាអំណាចណាឡើយ អាស៊ានក៏ជាកន្លែងប្រកួតផងដែរ។
អាស៊ីអាគ្នេយ៍ មិនត្រឹមជាតំបន់មានសេដ្ឋកិច្ចលូតលាស់ខ្លាំងឡើយ តែក៏ជាទីតាំងយុទ្ធសាស្ត្រមួយដលក្លាយជាទីលានប្រជែងឥទ្ធិពលរវាងមហាអំណាចពីរ គឺចិន និងអាមេរិក។ ការប្រជែងឥទ្ធិពលនេះ ធ្វើឲ្យការរួបរួមក្នុងចំណោមសមាជិកអាស៊ាន ជួបបញ្ហា។
ក្នុងការស្ទាបស្ទង់មួយដែលធ្វើឡើងដោយវិទ្យាស្ថាន ISEAS-Yusof Ishak ៧៣ភាគរយនៃអ្នកជំនាញចំនួន១,៣០៨នាក់មកពីប្រទេសសមាជិកអាស៊ានទាំង១០ និយាយថា តំបន់អាស៊ាន កំពុងក្លាយខ្លួនទៅជាទីតាំងសម្រាប់មហាអំណាចប្រជែងឥទ្ធិពល ហើយថា អាស៊ាន ទំនងក្លាយជាកូនជឹងរបស់មហាអំណាចណាមួយទៀតផង។ កាលពីឆ្នាំ២០១៩ មានតែ៦២ភាគរយប៉ុណ្ណោះដែលជឿជាក់បែបនេះ។ នេះបើតាមការផ្សាយរបស់សារព័ត៌មានជប៉ុន Nikkei Asian Review ។
ការស្ទាបស្ទង់នេះ បានលើកឡើងពីការប្រឈមមុខរវាងអាមេរិក និងចិន និងផលប៉ះពាល់មកលើតំបន់។ លទ្ធផលស្ទើរតែស្មើគ្នា បានកើតឡើងនៅពេលអ្នកចូលរួមខាងលើ ត្រូវជ្រើសរើសរវាងអាមរិក និងចិន។ ប្រភពព័ត៌មានខាងលើផ្សាយថា ៥៤ភាគរយងាកទៅរកអាមេរិក និង៤៦ភាគរយជ្រើសរើសយកចិន។ ប៉ុន្តែបើក្រលេកមើលភាគរយតាមប្រទេសនីមួយៗវិញ សមាជិកអាស៊ានចំនួន៧ មានទំនោរទៅរកចិនជាងអាមេរិក។
៦៩ភាគរយនៃអ្នកចូលរួមមកពីព្រុយណេ, កម្ពុជា៥៨ភាគរយ, ឡាវ៧៤ភាគរយ, ឥណ្ឌូណេស៊ី៥២ភាគរយ, ម៉ាឡេស៊ី៦១ភាគរយ មីយ៉ាន់ម៉ា៦២ភាគរយ និងថៃ៥២ភាគរយ ជ្រើសរើសចិន។ អាមេរិក ទទួលបានការគាំទ្រលើសលុបក្នុងប្រទេសបីទៀត គឺហ្វីលីពីន៨៣ភាគរយ, វៀតណាម៨៦ភាគរយ និងសិង្ហបុរី៦១ភាគរយ។ ទំនាស់រឿងសមុទ្រចិនខាងត្បូងជាមួយចិន អាចជាមូលហេតុសំខាន់មួយដែលអ្នកចូលរួមនៅវៀតណាម និងហ្វីលីពីនងាកទៅអាមេរិក។
អ្នកស្រី Hoang Thi Ha អ្នកស្រាវជ្រាវមកពីវិទ្យាស្ថានខាងលើប្រាប់ Nikkei Asian Review ថា ជាមួយលទ្ធផលបែបនេះ អាស៊ានត្រូវតែធ្វើគ្រប់យ៉ាងដើម្បីបញ្ចៀសគ្រោះកាចដែលត្រូវជ្រើសរើសមហាអំណាចណាមួយ។
ក្នុងស្ទាបស្ទង់ដែលធ្វើចន្លោះថ្ងៃទី១២ ខែវិច្ឆិកា និងថ្ងៃទី១ ខែធ្នូ ឆ្នាំ២០១៩ បើទោះជាអ្នកជំនាញជាច្រើនទោរទន់ទៅរកចិនក្ដី ពួកគេក៏បង្ហាញការសង្ស័យលើគំនិតផ្ដួចផ្ដើមខ្សែក្រវាត់ និងវិថីរបស់ចិនដែលដាក់ចេញនៅឆ្នាំ២០១៣ ដើម្បីតភ្ជាប់អាស៊ី អឺរ៉ុប និងអាហ្វ្រិកជាដើម។ អ្នកចូលរួម៦៤ភាគរយ អះអះអាងថា ពួកគេមានជំនឿចិត្តតិចតួច ឬគ្មានសោះលើគម្រោងមហាសាលមួយនេះ៕