សុខភាព
អន្តរជាតិ
កូរ៉ូណាវីរុស៖ អ្នកស្លាប់នៅចិនមាន៨១នាក់ ខណៈអាមេរិក និងអូស្ត្រាលីរកឃើញករណីទី៥
រូបថត AFP
×![]()
ដោយ: រួបរួម
គិតត្រឹមវេលាម៉ោង២ រសៀលថ្ងៃចន្ទ ទី២៧ ខែមករា នេះ តួលេខអ្នកស្លាប់ដោយសារជំងឺរលាកសួតបង្កដោយមេរោគកូរ៉ូណាប្រភេទថ្មី (កូរ៉ូណាវីរុស) ឡើងដល៨១នាក់ ដែលស្ថិតនៅក្នុងប្រទេសចិនទាំងអស់។ នេះបើយោងតាមការផ្សាយរបស់ទីភ្នាក់ងារព័ត៌មានរ៉យទ័រ។
ជាមួយនឹងចំនួនអ្នកស្លាប់កើនដល់៨១នាក់ អ្នកជំងឺដែលត្រូវពិនិត្យឃើញវត្តមានកូរ៉ូណាវីរុស កើនដល់ជាង២៨០០នាក់ ដោយភាគច្រើនបំផុតស្ថិតក្នុងប្រទេសចិន។ សហរដ្ឋអាមេរិក និងអូស្ត្រាលី បានពិនិត្យឃើញអ្នកជំងឺទី៥នៅប្រទេសរៀងៗខ្លួន។
ដូចករណី៤នាក់កន្លងមកផងដែរ អ្នកជំងឺទី៥នៅសហរដ្ឋអាមេរិក គឺជាអ្នកដំណើរពីទីក្រុងវូហាន ប្រទេសចិន។ រីឯនៅអូស្ត្រាលី អ្នកជំងឺទី៥ គឺជានិស្សិតស្រីវ័យ២១ឆ្នាំម្នាក់ពីសាកលវិទ្យាល័យ New South Wales ដែលបានធ្វើដំណើរពីវូហាន ទៅស៊ីដនី តាមជើងហោះហើរ China Eastern MU749 កាលពីថ្ងៃទី២២ ខែមករា។
ក្រៅចិន និងតំបន់ស្វយ័តរបស់ចិនដូចជាហុងកុង ម៉ាកាវ និងតៃវ៉ាន់ ក៏ដូចជាអូស្ត្រាលី និងសហរដ្ឋអាមេរិក ប្រទេសផ្សេងទៀតដែលមានករណីឆ្លងកូរ៉ូណាវីរុស មានថៃ ជប៉ុន ម៉ាឡេស៊ី សិង្ហបុរី កូរ៉េខាងត្បូង បារាំង វៀតណាម និងណេប៉ាល់៕
Tag:
កូរ៉ូណាវីរុស
© រក្សាសិទ្ធិដោយ thmeythmey.com
