អន្តរជាតិ
បញ្ជាតុលាការអន្តរជាតិ និងទណ្ឌកម្មសេដ្ឋកិច្ចរបស់អឺរ៉ុប នឹងរុញមីយ៉ាន់ម៉ាឲ្យខិតទៅរកចិន ប្រធានាធិបតីចិន ស៊ី ជិនភីង( ខាងឆ្វេង) ចាប់ដៃជាមួយ រដ្ឋមន្រ្តីការបរទេស និងទីប្រឹក្សារដ្ឋមីយ៉ាន់ម៉ា លោកស្រី អ៊ុងសាន ស៊ូជី។ រូបភាព៖ Xinhua
× បទបញ្ជារបស់តុលាការយុត្តិធម៌អន្តរជាតិ និងទណ្ឌកម្មពាណិជ្ជកម្មលើទីក្រុងណៃពិដោ នឹងរុញមីយ៉ាន់ម៉ា ឲ្យកាន់តែខិតទៅរកចិនខ្លាំងជាងមុន និងប្រទេសអាស៊ីដទៃទៀត។ នេះបើតាមការចុះផ្សាយរបស់សារព័ត៌មាន Bloomberg នាថ្ងៃទី ២៧ ខែមករា។
នាថ្ងៃទី២៣ ខែមករាតុលាការយុត្តិធម៌អន្តរជាតិ បានចេញបញ្ជាឲ្យមីយ៉ាន់ម៉ាទម្លាក់ចោលការធ្វើទុក្ខបុកម្នេញ អំពើហិង្សា អំពើប្រល័យពូជសាសន៍លើជនជាតិភាគតិចរ៉ូហ៊ីងយ៉ា។ លើសពីនេះ អឺរ៉ុបក៏បានព្រមានពីការដាក់ទណ្ឌកម្មលើមីយ៉ាន់ម៉ាផងដែរ។
ពាក់ព័ន្ធទៅនឹងបញ្ហានេះ រដ្ឋមន្ត្រីពាណិជ្ជកម្មមីយ៉ានម៉ា Than Myint បានព្រមានយ៉ាងដូច្នេះថា៖ « ទណ្ឌកម្មរបស់ប្រទេសលោកខាងលិចកាន់តែច្រើនមកលើយើង មីយ៉ាន់ម៉ានឹងមានលទ្ធភាពកាន់តែច្រើន ក្នុងការពង្រីកទំនាក់ទំនងជាមួយសម្ពន្ធមិត្តអាស៊ី»។ ក្នុងនេះន័យនេះ មីយ៉ាន់ម៉ា នឹងបើកទ្វារចាំទទួលអ្នកវិនិយោគទាំងអស់។
បើតាមការបញ្ជាក់របស់លោករដ្ឋមន្ត្រី មីយ៉ាន់ម៉ាធ្លាប់បានបញ្ជាក់ប្រាប់អឺរ៉ុបរួចហើយថា កុំបារម្ភពីបញ្ហារកស៊ីនៅប្រទេសមួយនេះ ប៉ុន្តែបើក្រុមហ៊ុនទាំងនោះ នៅតែមិនទុកចិត្តទៀត វាគឺជារឿងរបស់គេ ហើយមីយ៉ាន់ម៉ា ក៏មិនដឹងធ្វើយ៉ាងណាដែរ ពោលគឺមីយ៉ាន់ម៉ា មានតែសហការរកស៊ីជាមួយបណ្តាប្រទេសនៅអាស៊ី។
ចិនអាចជាដៃគូមួយដ៏សំខាន់សម្រាប់មីយ៉ាន់ម៉ា។ ជាក់ស្តែងតាមរយៈដំណើរទស្សនកិច្ចរបស់ប្រធានាធិបតី ស៊ី ជិនភីងនៅដើមខែមករា ឆ្នាំ ២០២០នេះ ចិន និងមីយ៉ាន់ម៉ា បានចុះហត្ថលេខា៤ ឬ៥គម្រោង ដែលទាក់ទិនទៅនឹងគំនិតផ្តួចផ្តើម«ផ្លូវមួយខ្សែក្រវាត់មួយ»។ ប៉ុន្តែបញ្ហានេះត្រូវបាន គេមើលឃើញថាមីយ៉ាន់ម៉ា អាចធ្លាក់ក្នុង «អន្ទាក់បំណុល» របស់ចិន។ ជាការឆ្លើយតប រដ្ឋមន្ត្រីរូបនេះ បានបញ្ជាក់ថាមីយ៉ាន់ម៉ា ចេះមើលមេរៀនពីប្រទេសដ៍ទៃ និងគ្រប់គ្រងបំណុលខ្លួនឯងហើយ។
ក្រៅពីនេះ លោក Than Myint ក៏បានលើកឡើងពីបញ្ហាបាត់បង់សិទ្ធិពាណិជ្ជកម្មពិសេស ជាមួយអ៊ឺរ៉ុបផងដែរ។ លោករដ្ឋមន្ត្រី បានអះអាងថា ប្រសិនបើមីយ៉ាន់ម៉ា បាត់បង់ឯកសិទ្ធិពាណិជ្ជកម្មនេះមែន ក្រុមហ៊ុនច្រើន នឹងបង្វែរគោលដៅវិនិយោគពីមីយ៉ានម៉ា ហើយវានឹងប៉ះពាល់ដល់កម្មកររោងចក្រ និងមនុស្សជាច្រើននាក់ទៀតផងដែរ ៕
© រក្សាសិទ្ធិដោយ thmeythmey.com