សុខភាព
អន្តរជាតិ
លោកត្រាំប្រកាសជួយចិនតាមតម្រូវការ ខណៈអ្នកស្លាប់ព្រោះកូរ៉ូណាវីរុសឡើងដល់១០៦នាក់ ប្រធានាធិបតីអាមេរិក លោក ដូណាល់ ត្រាំ ថ្លែងនាពេលកន្លងទៅ (AFP)
× ប្រធានាធិបតីអាមេរិក ដូណាល់ ត្រាំ នៅថ្ងៃចន្ទ ២៧ មករា បានប្រកាសជួយរដ្ឋាភិបាលចិនតាមតម្រូវការចាំបាច់ ដើម្បីគ្រប់គ្រងការផ្ទុះកូរ៉ូណាវីរុស ក្នុងទីក្រុង វូហាន ខណៈអ្នកស្លាប់ដោយសារវីរុសនេះបានកើនឡើងដល់ជាង១០០នាក់ហើយ គិតមកត្រឹមព្រឹកថ្ងៃអង្គារ ២៨ ខែមករា។
«យើងកំពុងមានការប្រាស្រ័យទាក់ទងយ៉ាងជិតដិតជាមួយចិន ពាក់ព័ន្ធនឹង (កូរ៉ូណា) វីរុស»។ លោក ដូណាល់ ត្រាំ សរសេរបែបនេះលើបណ្ដាញសង្គម Twitter ។ មេដឹកនាំអាមេរិករូបនេះ អះអាងទៀតថា វាមានករណី២ទៅ៣ប៉ុណ្ណោះ ដែលបានរកឃើញក្នុងសហរដ្ឋអាមេរិក ក៏ប៉ុន្តែអាជ្ញាធរសុខាភិបាលកំពុងតាមដានយ៉ាងល្អិតល្អន់បំផុត។
ខណៈមើលឃើញស្ថានការណ៍ក្នុងប្រទេសចិនកាន់តែយ៉ាប់យ៉ឺន លោក ប្រធានាធិបតី ត្រាំ បានបញ្ជាក់ថា សហរដ្ឋអាមេរិកបានផ្តល់ជំនួយដល់ចិននិងលោកប្រធានាធិបតី ស៊ី ជីនភីង នូវរាល់តម្រូវការចាំបាច់គ្រប់បែបយ៉ាងទាំងអស់ដើម្បីគ្រប់គ្រងវីរុសដែលបង្កទៅជាជំងឺរលាកសួតប្រភេទថ្មីនេះ។ ត្រង់ចំណុចនេះ លោក ត្រាំ បានសង្កត់ធ្ងន់ថា៖«អ្នកជំនាញរបស់យើង គឺពិតជាមានសមត្ថភាពអស្ចារ្យបំផុត»។
សូមបញ្ជាក់ថា អាជ្ញាធរសុខាភិបាលនៃទីក្រុង ប៉េកាំង ដែលរដ្ឋធានីរបស់ចិន បានរាយការណ៍ពីការស្លាប់លើកទី១បង្អស់ ដែលបង្កឡើងដោយកូរ៉ូណាវីរុស កាលពីយប់ថ្ងៃចន្ទ ២៧ ខែមករា ។ អ្នកស្លាប់រូបនោះ មានអាយុ ៥០ឆ្នាំ ដែលធ្លាប់បានធ្វើដំណើរទៅកាន់ទីក្រុង វូហាន ដែលជាសម្បុកនៃជំងឺរលាកសួតប្រភេទថ្មីនេះ ។ នេះបើតាមប្រព័ន្ធផ្សព្វផ្សាយរដ្ឋចិន។
ទន្ទឹមនេះ គណៈកម្មការសុខាភិបាលក្នុងខេត្ត Hubei នៃប្រទេសចិន បានបញ្ជាក់ថា មនុស្ស២៤នាក់ទៀតបានស្លាប់ ដោយសារកូរ៉ូណាវីរុស ហើយ១២៩១ នាក់ទៀត ត្រូវបានរកឃើញថាឆ្លងជំងឺនេះ។ សម្រាប់តួលេខថ្មី ករណីឆ្លងវីរុសដ៏កាចសាហាវនេះ ដែលត្រូវបានរកឃើញ បានកើនដល់ ៤០០០ករណី នៅទូទាំងពិភពលោក៕
Tag:
សហរដ្ឋអាមេរិក
ចិន
ដូណាល់ ត្រាំ
កូរ៉ូណាវីរុស
© រក្សាសិទ្ធិដោយ thmeythmey.com