អន្តរជាតិ
សិង្ហបុរី រកឃើញករណីកូរ៉ូណាវីរុស២ករណីថ្មីទៀត ដែលកើនសរុប៧ករណី លោក Gan Kim Yong រដ្ឋមន្ត្រីក្រសួងសុខាភិបាលសិង្ហបុរី។រូបថត AFP
× ករណីឆ្លងកូរ៉ូណាវីរុស២ថ្មីទៀត ត្រូវបានបញ្ជាក់ថារកឃើញក្នុងប្រទេសសិង្ហបុរី។ ក្រសួងសុខាភិបាលសិង្ហបុរី ប្រកាសឲ្យដឹងបែបនេះ នៅថ្ងៃអង្គារ ២៨ ខែមករា។ ករណីថ្មីទាំងពីរនេះ ធ្វើឲ្យតួលេខអ្នកឆ្លងជំងឺរលាកសួតប្រភេទថ្មី ដែលបង្កឡើងដោយកូរ៉ូណាវីរុសនេះឡើងដល់ ៧នាក់ហើយក្នុងប្រទេសនេះ។
តាមការចុះផ្សាយរបស់ទូរទស្សន៍សិង្ហបុរី Channel News Asia អ្នកជំងឺទាំងពីរនេះ គឺសុទ្ធសឹងតែជាជនជាតិចិន ដែលមកពីទីក្រុង វូហាន ខេត្ត Hubei ។ បុរសវ័យ ៥៦ឆ្នាំម្នាក់ បានមកដល់ប្រទេសសិង្ហបុរី មកពីទីក្រុង វូហាន កាលពីថ្ងៃ ១៩ ខែមករា ហើយផ្តើមមានរោគសញ្ញាក្អកកាលពីថ្ងៃ ២៥ ខែមករា។
ក្រសួងសុខាភិបាលសិង្ហបុរី បានបញ្ជាក់ទៀតថា មួយថ្ងៃក្រោយមក ពោលគឺថ្ងៃ២៦ ខែមករា បុរសចិនរូបនេះ បានទៅកាន់មន្ទីរពេទ្យ Changi General ដោយខ្លួនឯងផ្ទាល់ ហើយលោកបានធ្វើតេស្តថារកឃើញជំងឺនេះ កាលពីថ្ងៃ២៧ មករា ម្សិលមិញ។ បើតាមក្រសួង បុរសចិនរូបនេះ បានសម្រាកនៅផ្ទះរបស់គ្រួសារលោក នៅខុនដូរមួយកន្លែងក្នុងប្រទេសសិង្ហបុរី មុនពេលលោកទៅកាន់មន្ទីរពេទ្យ។
ចំណែកអ្នកជំងឺទី ៧ វិញ ដែលត្រូវបានរកឃើញថាឆ្លងកូរ៉ូណាវីរុស គឺជាបុរសជនជាតិចិនមានអាយុ ៣៥ឆ្នាំ ដែលទៅដល់ទឹកដីសិង្ហបុរី កាលពីថ្ងៃ ២៣ ខែមករា ។ បើតាមការប្រកាសព័ត៌មានរបស់ក្រសួងសុខាភិបាលសិង្ហបុរី បុរសរូបនេះ បានចាប់ផ្តើមមានរោគសញ្ញា នៅថ្ងៃ ២៤ ខែមករា ហើយបានទៅកាន់មន្ទីរពេទ្យ Raffles របស់សិង្ហបុរី។ ក្រោយមក លោក ត្រូវបានដឹកតាមរយៈរថយន្តគ្រោះឯកជនមួយទៅកាន់មជ្ឈមណ្ឌលជាតិសម្រាប់ជំងឺឆ្លង។ ចុងក្រោយ បុរសចិនរូបនេះ បានធ្វើតេស្តថារកឃើញវីរុសថ្មីនេះ នៅថ្ងៃទី ២៧ ខែមករា ។ ហើយមុនពេលទៅកាន់មន្ទីរពេទ្យ លោកបានស្នាក់នៅ Resort មួយកន្លែងឈ្មោះថា Marina Bay Sands ។
សូមបញ្ជាក់ថា វីរុសដ៏កាចសាហាវនេះ ដែលផ្ទុះឡើងដំបូងក្នុងទីក្រុង វូហាន បានសម្លាប់មនុស្សយ៉ាងតិច ១០៦នាក់ ហើយសុទ្ធតែនៅចិន ខណៈរកឃើញករណីសរុបនៅទូទាំងពិភពលោកជាង ៤ពាន់ករណី៕
Tag:
សិង្ហបុរី
កូរ៉ូណាវីរុស
© រក្សាសិទ្ធិដោយ thmeythmey.com