និស្សិតខ្មែរ៣០នាក់ មកស្រុកមួយរយៈ ខណៈកូរ៉ូណាវីរុស រាលដាលខ្លាំងនៅចិន

ជាតិ

សង្គមជាតិ

និស្សិតខ្មែរ៣០នាក់ មកស្រុកមួយរយៈ ខណៈកូរ៉ូណាវីរុស រាលដាលខ្លាំងនៅចិន

28, Jan 2020 , 8:19 pm

រូបភាព

សកម្មភាពចែកម៉ាស់ នៅតាមច្រកប៉ោយប៉ែត (រូបពីរដ្ឋបាលខេត្តបន្ទាយមានជ័យ)

ដោយ: ថ្មីៗ

និស្សិតខ្មែរ៣០នាក់ (ស្រី៥នាក់) ដែលសិក្សានៅប្រទេសចិន បានមកដល់កម្ពុជា តាមច្រកប៉ោយប៉ែត នៅព្រឹកថ្ងៃទី២៨ ខែកក្កដា ឆ្នាំ២០២០។ នេះបើតាមទំព័រហ្វេសប៊ុករបស់រដ្ឋបាលខេត្តបន្ទាយមានជ័យ។

លោក អ៊ុំ រាត្រី អភិបាលខេត្តបន្ទាយមានជ័យ និងក្រុមការងារ បានយកឡាន២គ្រឿង ទៅទទួលនិស្សិតទាំងនោះ និងបានចែកម៉ាស់ពាក់ការពារដល់ពួកគេផងដែរ។ រដ្ឋបាលខេត្តបន្ទាយមានជ័យ អះអាងថា និស្សិតខ្មែរទាំងនោះ មកកម្ពុជានាពេលនេះ គឺស្ថិតក្នុងការសម្រាកវិស្សមកាល ពោលគឺឈប់សម្រាកធម្មតា ដោយមានការនឹករលឹកគ្រួសារ និងស្រុកកំណើត។

យ៉ាងណាក៏ដោយ ការវិលត្រឡប់របស់និស្សិតខ្មែរទាំងនោះ គឺស្របពេលប្រទេសចិន ជាពិសេសនៅទីក្រុងវូហាន រកការគំរាមកំហែងដោយមេរោគកូរ៉ូណាប្រភេទថ្មី។ រដ្ឋាភិបាលចិន បានបិទសាលារៀនទាំងអស់មួយរយៈ នៅទូទាំងប្រទេស។

ពួកគេទាំង៣០នាក់នោះ ជានិស្សិតដែលទទួលបានអាហារូបករណ៍ពីលោក ស សុខា រដ្ឋលេខាធិការក្រសួងអប់រំ ទៅសិក្សាសាកលវិទ្យាល័យហឺហ្វី ខេត្តអានហួយ ប្រទេសចិន។

លោក កែវ វណ្ឌថន អគ្គនាយករងនិងជាអ្នកនាំពាក្យនៃអគ្គនាយកដ្ឋានអន្តោប្រវេសន៍ ប្រាប់សារព័ត៌មានថ្មីៗ តាមបណ្តាញទំនាក់ទំនងតេឡេក្រាមថា ពួកគេ បានហោះចេញពីចិន ចូលមកថៃ ហើយបន្តដំណើរមកកម្ពុជា តាមច្រកប៉ោយប៉ែត។ លោក បញ្ជាក់ថា៖«ក្រុមការងារ ត្រួតពិនិត្យ [ពួកគេ] មិនឃើញមានជំងឺរលោកសួត បង្កដោយមេរោគកូរ៉ូណាប្រភេទថ្មីឡើយ»។

គិតត្រឹមថ្ងៃទី២៨ ខែមករា ឆ្នាំ២០២០ មនុស្សជាង១០០នាក់ បានស្លាប់នៅប្រទេចិន ដោយសារមេរោគកូរ៉ូណា ហើយជិត៣ពាន់នាក់ទៀត នៅប្រទេសចិន កំពុងផ្ទុកមេរោគនេះ។

មេរោគកូរ៉ូណាប្រភេទថ្មី ដែលបង្កឲ្យមានជំងឺរលាកសួតនេះ បានឆ្លងទៅដល់ប្រទេសនានា ដូចជា ថៃ វៀតណាម ជប៉ុន អាមេរិក អូស្ត្រាលី កូរ៉េខាងត្បូង កាណាដា ម៉ាឡេស៊ី សិង្ហបុរី បារាំង និងណេប៉ាល់, ម៉ាកាវ, ហុងកុង, និង តៃវ៉ាន់ ជាដើម តែពុំមានអ្នកបាត់បង់ជីវិតឡើយ ក្រៅតែពីនៅប្រទេសចិន។ កម្ពុជា មាន១ករណីដែរ៕