កីឡាជាតិ
ជាតិ
លោក វ៉ាត់ ចំរើន៖ កម្ពុជាមានទំនាក់ទងល្អជាមួយចិន លើវិស័យកីឡាតាំងពីឆ្នាំ១៩៦៤ ព្រះបរមរតនកោដ្ឋ នរោត្តម សីហនុ (រូបក្នុងរង្វង់)មានព្រះរាជបន្ទូលក្នុងពិធីបើកការប្រកួតកីឡា GANEFO Games ឆ្នាំ១៩៦៦ នៅពហុកីឡដ្ឋានជាតិ
× កម្ពុជាមានទំនាក់ទំនងជាមួយចិនលើវិស័យនយោបាយ សេដ្ឋកិច្ច ពាណិជ្ជកម្ម និងកីឡាជាង៥ទស្សវត្សរ៍មកហើយ។ អ្វីដែលគួរឲ្យកត់សម្គាល់ប្រទេសទាំងពីរបានរក្សាចំណងមិត្តភាពនេះបានយ៉ាងល្អរហូតដល់មកបច្ចុប្បន្ន។ បើនិយាយពីវិស័យកីឡាប្រទេសទាំងពីរមានទំនាក់ទងល្អតាំងពីជំនាន់សម្តេចព្រះបរមរតនកោដ្ឋ នរោត្តម សីហនុ ក្នុងអំឡុងឆ្នាំ១៩៦៤ មកម្ល៉េះ។ ចិន នេះហើយដែលជួយជ្រោមជ្រែងកម្ពុជាក្នុងការរៀបចំព្រឹត្តិការណ៍កីឡាអន្តរជាតិមិនចូលបក្សសម្ព័ន្ធ(Ganefo)លើកដំបូងនៅភ្នំពេញ។
មិនមែនទើបតែឥឡូវនោះទេ ដែលចិនជួយជ្រោមជ្រែងកសាងហេដ្ឋារចនាសម្ព័ន្ធ និងជួយបណ្តុះបណ្តាលធនធានមនុស្សលើវិស័យកីឡានៅកម្ពុជា តាមពិតពួកគេបានរួមចំណែកជួយអភិវឌ្ឍន៍វិស័យនេះតាំងពីជំនាន់សម្តេចព្រះបរមរតនកោដ្ឋ នរោត្តម សីហនុ មកម្ល៉េះ។ បើតាមលោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា ប្រទេសទាំងពីរមានទំនាក់ទំនងល្អលើវិស័យកីឡាតាំងពីឆ្នាំ១៩៦៤ ពោលគឺចិនបានជួយកសាងបុរីកីឡា ដើម្បីត្រៀមធ្វើជាម្ចាស់ផ្ទះការប្រកួតកីឡាមិនចូលបក្សសម្ព័ន្ធ។
ក្រៅពីជួយកសាងហេដ្ឋារចនាសម្ព័ន្ធ ចិន បានជួយលើការបណ្តុះបណ្តាលធនធានមនុស្សផងដែរ តាមរយៈការបញ្ជូនមន្ត្រីជំនាញ និងគ្រូបង្វឹកមកបណ្តុះបណ្តាលអាជ្ញាកណ្តាលចៅក្រម និងបង្វឹកកីឡាករកីឡាការិនីជាដើម។ លើសពីនេះ ចិន បានបញ្ជូនមន្ត្រីជំនាញឲ្យមកជួយរៀបចំព្រឹត្តិការណ៍កីឡាអន្តរជាតិ Ganefo ដែលកម្ពុជាធ្វើជាម្ចាស់ផ្ទះ។ នេះបើតាមការបញ្ជាក់របស់លោក វ៉ាត់ ចំរើន។
«ទំនាក់ទំនងរវាងកម្ពុជា-ចិន(លើវិស័យកីឡា)មានជាយូរមកហើយ គឺតាំងពីទំនាក់ទំនងល្អរវាងសម្តេចតា សម្តេចឪរបស់យើងជាមួយរដ្ឋាភិបាលចិន ដូច្នេះចិនបានទទួលនូវការគាំទ្រ និងកិច្ចសហប្រតិបត្តិការល្អតាំងពីនោះមក។ តាមប្រវត្តិចិនបានជួយកម្ពុជារៀបចំ Ganefo ដែលគេហៅថាកីឡាមិនចូលបក្សសម្ព័ន្ធនៅឆ្នាំ១៩៦៦»។ នេះជាការរៀបរាប់របស់លោក វ៉ាត់ ចំរើន ពាក់ព័ន្ធនឹងប្រវត្តិក្នុងវិស័យកីឡារវាងកម្ពុជា-ចិន។
តាមរយៈទំនាក់ទំនងដ៏រឹងមាំនេះ កីឡាករកីឡាការិនីកម្ពុជាជាច្រើនរូប ត្រូវបានបញ្ជូនទៅហ្វឹកហាត់ពង្រឹងសមត្ថភាពនៅប្រទេសចិន រៀងរាល់មានព្រឹត្តិការណ៍អន្តរជាតិម្តងៗ។ ភាគីចិន ក៏បានបញ្ជូនមន្ត្រី គ្រូបង្វឹក ឲ្យមកបណ្តុះបណ្តាលមន្ត្រី និងបង្វឹកកីឡាករកីឡាការិនីនៅកម្ពុជាផងដែរ។ ភាពជាដៃគូនេះដែរ សមិទ្ធផលធំៗជាច្រើនបានលេចចេញជារូបរាងឡើង ជាក់ស្តែងចិនបានផ្តល់ជំនួយជាង១៥០លានដុល្លារ ដើម្បីសាងស្តង់កីឡដ្ឋានលំដាប់អន្តរជាតិនៅពហុកីឡដ្ឋានជាតិមរតកតេជោ។
កីឡដ្ឋានដែលគ្រោងបញ្ចប់ការសាងសង់ជាស្ថាពរនៅចុងឆ្នាំ២០២០នេះ ស្ថាបនាឡើងដើម្បីត្រៀមទទួលធ្វើជាម្ចាស់ផ្ទះការប្រកួតកីឡាស៊ីហ្គេមលើកទី៣២នៅឆ្នាំ២០២៣។ កីឡដ្ឋាននេះ សាងសង់ដោយប្រើបច្ចេកវិទ្យាចុងក្រោយរបស់ចិន ដែលអាចជម្លៀសអ្នកគាំទ្រត្រឹមរយៈពេល៧នាទីក្នុងករណីមានហេតុការណ៍មិនប្រក្រតីកើតឡើង។
បើតាមលោក វ៉ាត់ ចំរើន នៅឆ្នាំ២០២៣ពេលដែលកម្ពុជាធ្វើជាម្ចាស់ផ្ទះការប្រកួតកីឡាស៊ីហ្គេម ចិន នឹងផ្តល់ជាជំនួយបច្ចេកទេសក្នុងការរៀបចំដំណើរប្រកួតទាំងពិធីបើក បិទ និងអំឡុងពេលប្រកួត។ អ្វីដែលកាន់តែអស្ចារ្យទៀតនោះ ចិន នឹងអនុញ្ញាតឲ្យកម្ពុជាបញ្ជូនកីឡាករលើប្រភេទកីឡាសក្តានុពលរបស់ចិនមួយចំនួនទៅហ្វឹកហាត់នៅចិនរយៈពេល៨ខែនិងបញ្ជូនគ្រូឲ្យមកបង្វឹកនៅកម្ពុជារយៈពេល៣ខែក្នុង១ឆ្នាំៗ។ តែយ៉ាងណាអគ្គលេខាធិការរូបនេះ មិនទាន់បញ្ជាក់ពីពេលវេលានៃការចាប់ផ្តើមនៃគម្រោងនេះនៅឡើយទេ គ្រាន់តែអះអាងថា ចិនកំពុងសិក្សានិងវាយតម្លៃប្រភេទកីឡា ដែលពួកគេត្រូវជួយ៕
Tag:
វ៉ាត់ ចំរើន
ចិន
កម្ពុជា
ចូលឆ្នាំចិន
© រក្សាសិទ្ធិដោយ thmeythmey.com