ម៉ាឡេស៊ី និងហ្វីលីពីន ផ្អាកការផ្តល់ទិដ្ឋាការដល់ជនជាតិចិនមកពីខេត្តហ៊ូប៉ី

អន្តរជាតិ

ម៉ាឡេស៊ី និងហ្វីលីពីន ផ្អាកការផ្តល់ទិដ្ឋាការដល់ជនជាតិចិនមកពីខេត្តហ៊ូប៉ី

28, Jan 2020 , 10:19 pm

រូបភាព

រូបភាព៖ Malay Mail

ដោយ: ធៀន ភារិន្ទ

រដ្ឋាភិបាលម៉ាឡេស៊ី សម្រេចផ្អាកការផ្តល់ទិដ្ឋាការដល់ជនជាតិចិទាំងអស់ ដែលរស់នៅក្នុងខេត្តហ៊ូប៉ី ដើម្បីទប់ស្កាត់ការឆ្លងកូរ៉ូណាវីរុស ខណៈពេលម៉ាឡេស៊ី បានរកឃើញអ្នកជំងឺផ្ទុកវីរុសថ្មីនេះចំនួន ៤នាក់។ នេះបើតាមសេចក្តីថ្លែងការណ៍របស់ការិយាល័យនាយករដ្ឋមន្ត្រីនៅថ្ងៃទី ២៧ ខែមករា។ ចំណែកហ្វីលីពីន នៅថ្ងៃទី២៨ ខែមករា ក៏បានប្រកាសផងដែរថា នឹងផ្អាកការផ្តល់ទិដ្ឋាការ ដល់ជនជាតិចិនទាំងអស់។

តាមរយៈសេចក្តីថ្លែងការរបស់ការិយាល័យនាយករដ្ឋមន្ត្រី ម៉ាឡេស៊ីនឹងផ្អាកផ្តល់ទិដ្ឋាការគ្រប់ប្រភេទដល់ ជនជាតិចិនទាំងអស់ ដែលរស់នៅក្នុងខេត្តហ៊ូប៉ី ក្នុងនោះរួមមានក្រុងវូហានផងដែរ។ ការប្រកាសឲ្យអនុវត្តនេះ ត្រូវចូលជាធរមានជាប្រញាប់ បន្ទាប់ពីករណីនៃកូរ៉ូណាវីរុស បានកើនឡើងរហូតដល់ជាង ៤០០០ករណី អ្នកស្លាប់ដោយសារជំងឺរលាកសួត១០៦នាក់នៅក្នុងប្រទេសចិន និងបន្ទាប់ពីម៉ាឡេស៊ីរកឃើញអ្នកផ្ទុកវីរុសចំនួន៤នាក់។

យ៉ាងណាក៏ដោយ ការផ្តល់ទិដ្ឋការដល់ជនជាតិចិននេះ នឹងបន្តឡើងវិញ នៅពេលស្ថានភាពនៅក្នុងខេត្តហ៊ូប៉ី ប្រែទៅជាធម្មតា។

ដោយឡែក នៅប្រទេសហ្វីលីពីនឯណោះវិញ ក៏ចេញវិធានការទប់ស្កាត់ និងផ្អាកផ្តល់ទិដ្ឋាការដល់ជនជាតិចិនផងដែរ។ ជាក់ស្តែង លោក Jaime Morente ប្រធានគណៈកម្មការអន្តោប្រវេសន៍ហ្វីលីពីន បានអះអាងថា រដ្ឋាភិបាល នឹងឈប់ផ្តល់ទិដ្ឋាការដល់ជនជាតិចិនទាំងអស់ ដើម្បីធានាថា ហ្វីលីពីនគ្មានអ្នកជំងឺផ្ទុកវីរុសកូរ៉ូណា និងដើម្បីទប់ស្កាត់ការឆ្លងវីរុសថ្មីនេះ។

គិតមកត្រឹមពេលនេះ ក្នុងចំណោមបណ្តាប្រទេសទាំង១០ នៃសមាជិកអាស៊ាន មានប្រទេសចំនួន៥ហើយ បានរកឃើញអ្នកផ្ទុកកូរ៉ូណាវីរុស។ ក្នុងនោះមានដូចជា ថៃ ៨ករណី សិង្ហបុរី៥ករណី ម៉ាឡេស៊ី ៤ករណី វៀតណាម ២ករណី និងកម្ពុជា១ករណី ៕