អន្តរជាតិ
យន្តហោះដឹកពលរដ្ឋជប៉ុនជាង២០០នាក់ពីវូហាន បានទៅដល់ទីក្រុងតូក្យូ យន្តហោះជប៉ុន ដែលដឹកពលរដ្ឋ២០៦នាក់ចេញពីវូហាន មកដល់ទីក្រុង តូក្យូ នៅព្រឹកថ្ងៃ ២៩ មករា ឆ្នាំ២០២០ (AFP)
× ជនជាតិជប៉ុនជុំទីមួយ ដែលបានជម្លៀសចេញពីទីក្រុង វូហាន បានដឹកតាមយន្តហោះទៅដល់ទីក្រុង តូក្យូ នៅថ្ងៃ ២៩ ខែមករា ។ ចំណែកយន្តហោះអាមេរិក ដែលដឹកពលរដ្ឋខ្លួនជាង២០០នាក់ បានចេញពីក្រុងវូហាន នៅថ្ងៃពុធ ឆ្ពោះទៅកាន់ព្រលានយន្តហោះមួយកន្លែងក្នុងទីក្រុង Los Angeles។ ជប៉ុន និងអាមេរិកគឺជាប្រទេស២ដំបូង ក្នុងចំណោមប្រទេសដទៃទៀត ដែលបានដឹកពលរដ្ឋខ្លួនចេញពីតំបន់ផ្ទុះវីរុសនៅចិននេះ ។
យន្តហោះនេះ បានចុះចតនៅព្រលានយន្តហោះ Haneda នៅម៉ោង ៨៖៤៥ព្រឹក (ម៉ោងក្នុងស្រុក) ។ បើតាមសម្តីមន្ត្រីជប៉ុន យន្តហោះរបស់រដ្ឋាភិបាលជប៉ុននេះ បានដឹកមនុស្ស ២០៦នាក់។ ម្យ៉ាងទៀត រដ្ឋាភិបាលជប៉ុន មានគម្រោងបញ្ជូនយន្តហោះបន្ថែមទៀតទៅទីក្រុង វូហាន ខណៈពលរដ្ឋជប៉ុននៅទីនេះ ប្រមាណ ៦៥០នាក់ បានបញ្ជាក់ថា ពួកគេចង់ត្រលប់មកកាន់ប្រទេសជប៉ុនវិញ។ ផែនការបញ្ជូនយន្តហោះទី២របស់ជប៉ុន ទំនងជាធ្វើឡើងនាយប់ថ្ងៃពុធនេះតែម្តង។
តាមការចុះផ្សាយរបស់ទូរទស្សន៍ជប៉ុន NHK មន្ត្រីនៃក្រសួងសុខាភិបាលជប៉ុន កាលពីថ្ងៃអង្គារ ២៨ មករា បានអះអាងថា អ្នកដំណើរដែលទើបត្រូវបានជម្លៀសពីតំបន់ផ្ទុះកូរ៉ូណាវីរុសនេះ នឹងទទួលការធ្វើតេស្តសុខភាពរកមើលរោគសញ្ញាលើយន្តហោះ ហើយនរណាដែលមានចេញរោគសញ្ញានៃជំងឺនេះ នឹងត្រូវបញ្ជូនទៅកាន់មន្ទីរពេទ្យភ្លាមៗតែម្តង។
មន្ត្រីជប៉ុន បន្តទៀតថា ពលរដ្ឋជប៉ុនដែលត្រូវជម្លៀសទាំងនេះ នឹងស្នើសុំឲ្យសម្រាកនៅផ្ទះមួយរយៈ ហើយចៀសវាងការធ្វើដំណើរទៅទីប្រជុំ យ៉ាងហោចណាស់រហូតដល់ លទ្ធភាពនៃការធ្វើតេស្តពួកគេ ចេញមកសិន។ សម្រាប់អ្នកដែលរស់នៅក្នុង និងក្បែរទីក្រុង តូក្យូ នឹងអនុញ្ញាតឲ្យទៅផ្ទះ ចំណែកអ្នកដែលរស់នៅឆ្ងាយពីទីក្រុងនេះ ជាបឋម នឹងត្រូវបញ្ជូនទៅកាន់សណ្ឋាគារនៅក្បែរនោះ។
សូមបញ្ជាក់ថា គិតមកត្រឹមថ្ងៃពុធ ២៩ មករានេះ ក្រសួងសុខាភិបាលជប៉ុន បានរកឃើញករណីឆ្លងណូវែលកូរ៉ូណាវីរុស ៧ នាក់ហើយ ក្នុងប្រទេស ដែលក្នុងនោះ បុរសជប៉ុនម្នាក់ដែលពុំធ្លាប់មានប្រវត្តិទៅកាន់ប្រទេសចិន។ បុរសជាអ្នកបើកបររូបនេះ ដែលមកពីតំបន់ Nara ភាគខាងលិចនៃប្រទេសជប៉ុន បានរកឃើញថាឆ្លងជំងឺរលាកសួតប្រភេទថ្មីនេះ កាលពីថ្ងៃសៅរ៍ ទី២៥ ខែមករា ហើយកំពុងសម្រាកព្យាបាលក្នុងមន្ទីរពេទ្យមួយនៅតំបន់នោះតែម្តង៕
Tag:
ជប៉ុន
វូហាន
កូរ៉ូណាវីរុស
ការជម្លៀស
© រក្សាសិទ្ធិដោយ thmeythmey.com