ជាតិ
សុខភាព
WWF៖ ករណីផ្ទុះកូរ៉ូណាវីរុស ជាការពញ្ញាក់ស្មារតីពលរដ្ឋឲ្យឈប់ទិញ-លក់សត្វព្រៃ ទីផ្សារលក់គ្រឿងសមុទ្រ ដែលលួចលាក់សត្វព្រៃខុសច្បាប់ត្រូវបានបិទ ក្រោយករណីផ្ទុះកូរ៉ូណាវីរុស។ រូបថត AFP
× ភ្នំពេញ៖ ការរាលដាលជំងឺរលាកសួតបង្កដោយមេរោគកូរ៉ូណាប្រភេទថ្មី នេះ ក៏ជាការបញ្ញាក់ស្មារតីឲ្យពលរដ្ឋឈប់ទិញ-លក់សត្វព្រៃ ធ្វើជាអាហារ និងជាឱសថផងដែរ។ នេះបើយោងតាមសេចក្តីប្រកាសព័ត៌មាន របស់អង្គការមូលនិធិសកលសម្រាប់អភិរក្សធនធានធម្មជាតិ(WWF) បើទោះបីជាមិនទាន់មានការសន្និដ្ឋានផ្លូវការ ថា ការឆ្លងបណ្តាលមកពីការបរិភោគសាច់មិនត្រូវក៏ដោយ។
មេរោគកូរ៉ូណាថ្មីដែលគេហៅថា វីរុសកូរ៉ូណា ឬវូហានវីរុស បានកើតឡើងដំបូងនៅទីក្រុងវូហាន ខេត្តហ៊ូប៉ី ប្រទេសចិន កាលពីចុងខែធ្នូ ឆ្នាំ២០១៩។ មូលហេតុនៃការផ្ទុះមេរោគនេះ បានស្ថិតនៅក្នុងការសង្ស័យរបស់អ្នកជំនាញ ទៅលើការចរាចរសត្វព្រៃក្នុងទីផ្សារ នៅខេត្តវូហាន ផ្ទាល់តែម្តង។ ក្រោយដឹងប្រភពនៃមេរោគដ៏សាហាវនេះអាជ្ញាធរប្រទេសចិន បានបិទទីផ្សារលក់គ្រឿងសមុទ្រ ដែលបង្កប់សត្វព្រៃខុសច្បាប់នោះ ភ្លាមៗ។
ចំពោះការបិទទីផ្សារចរាចរសត្វព្រៃគ្រប់ប្រភេទនេះ អង្គការ WWF បានប្រកាសគាំទ្ររដ្ឋាភិបាលចិនទាំងស្រុង ក្នុងការលើកកម្ពស់ចំណេះដឹងសាធារណជន ឱ្យបានល្អប្រសើរជាងមុនអំពីហានិភ័យនានាចំពោះសុខភាពមនុស្សដែលបណ្តលមកពីការជួញដូរសត្វព្រៃគ្មានការត្រួតពិនិត្យ និងខុសច្បាប់។ លើកពីនេះក៏លើកកម្ពស់ការយល់ដឹងពីហេតុប៉ះពាល់យ៉ាងធ្ងន់ធ្ងរនៃការជួញដូរសត្វព្រៃ និងជីវៈចម្រុះជាសកលលោក ផងដែរ។
ក្នុងសេចក្តីប្រកាសព័ត៌មានដដែលនេះ អង្គការWWF លើកទឹកចិត្ត និងជំរុញរដ្ឋាភិបាលចិនឱ្យបន្តកិច្ចខិតខំប្រឹងប្រែងរបស់ខ្លួន ក្នុងការកាត់់បន្ថយតម្រូវការសត្វព្រៃ និងបន្តលើកកម្ពស់ការផ្សព្វផ្សាយជាសាធារណៈ និងសហការជាមួយរដ្ឋាភិបាល ស្ថាប័នអភិរក្សអន្តរជាតិវិស័យឯកជន និងបណ្តាសហគមន៍មូលដ្ឋាន ក្នុងការបញ្ឈប់ការជួញដូរសត្វព្រៃខុសច្បាស់។ អង្គការនេះ បានត្រៀមខ្លួនជាស្រេចក្នុងការផ្តល់ការគាំទ្រផ្នែកបច្ចេកទេសតាមដានការជួញដូរសត្វព្រៃខុសច្បាប់ និងគាំទ្រការកសាងសមត្ថភាពសម្រាប់ការងារពង្រឹងច្បាប់ ដើម្បីជួយដល់វិធានការនៃការបិទទីផ្សារសត្វព្រៃប្រកបដោយប្រសិទ្ធភាព។
គិតត្រឹមព្រឹកថ្ងៃទី២៩មករា ឆ្នាំ២០២០ កូរ៉ូណាវីរុសនេះ បានរាលដាលឆ្លងពីមនុស្សទៅមនុស្សជាង៦០០០នាក់ ក្នុងនោះអ្នកស្លាប់ មានចំនួន១៣២នាក់។ ប្រទេស និងតំបន់ ដែលរកឃើញករណីឆ្លងមេរោគនេះ មានចិន ហុងកុង ថៃ ម៉ាកាវ អាមេរិក អូស្រា្តលី សិង្ហបុរី តៃវ៉ាន់ ជប៉ុន ម៉ាឡេស៊ី កូរ៉េខាងត្បូង បារាំង កាណាដា វៀតណាម ណេប៉ាល់ កម្ពុជា ស្រីលង្ហា និងអាល្លឺម៉ង់៕
Tag:
មេរោគ
កូរ៉ូណាវីរុស
សត្វព្រៃ
© រក្សាសិទ្ធិដោយ thmeythmey.com