អន្តរជាតិ
អ្នកវិទ្យាសាស្ត្រអូស្ត្រាលី ប្រកាសថាខ្លួនអាចចិញ្ចឹមកូរ៉ូណាវីរុសនៅក្នុងមន្ទីពិសោធន៍
រូបភាព៖ CNN
×![]()
ដោយ: ធៀន ភារិន្ទ
អ្នកវិទ្យាសាស្ត្រមួយក្រុម ដែលមានមូលដ្ឋាននៅអូស្ត្រាលី នៅថ្ងៃទី២៩ ខែមករា បានអះអាងថា ខ្លួនបានអភិវឌ្ឍយ៉ាងជោគជ័យលើការចិញ្ចឹម កូរ៉ូណាវីរុសនៅក្នុងមន្ទីរពិសោធន៍របស់ខ្លួន។ នេះគឺជាករណីដំបូង ដែលវីរុសប្រភេទថ្មីនេះ ត្រូវបានគេបង្កើតឡើងវិញនៅក្រៅប្រទេសចិន ហើយវាក៏ជាសញ្ញាវិជ្ជមានមួយផងដែរ ក្នុងការប្រយុទ្ធប្រឆាំងនឹងកូរ៉ូណាវីរុសនៅក្នុងក្នុងប្រទេសចិន និងពិភពលោក។ 
បន្ទាប់ពីអាចចិញ្ចឹមកូរ៉ូណាវីរុសនៅក្នុងមន្ទីរពិសោធន៍បាន ក្រុមអ្នកស្រាវជ្រាវនៅវិទ្យាស្ថានជំងឺឆ្លង និងភាពស៊ាំនៃមេរោគPeter Doherty នៃប្រទេសអូស្ត្រាលី បានអះអាងថា ខ្លួននឹងចែករំលែកគំរូនៃវីរុសថ្មីនេះ ជាមួយអង្គការសុខភាពពិភពលោក និងមន្ទីរពិសោធន៍ផ្សេងទៀត នៅជុំវិញពិភពលោក។
បើតាមការបញ្ជាក់របស់អ្នកស្រាវជ្រាវអូស្ត្រាលី កូរ៉ូណាវីរុសនេះ ត្រូវបានគេចិញ្ជឹមចេញពីអ្នកជំងឺម្នាក់ ដែលបានឆ្លងវីរុសនេះ និងបានបញ្ជូនមកវិទ្យាស្ថានតាំងពីថ្ងៃទី២៤ ខែមករាមកម្លេះ។ នេះ ជាលើកដំបូង ដែលវីរុសកូរ៉ូណាត្រូវបានគេអភិវឌ្ឍ និងចិញ្ចឹមនៅក្រៅប្រទេសចិន និងមានគំរូត្រឹមត្រូវ។ ចំណែកមន្ទីរពិសោធន៍នៅចិនវិញ គេក៏អាចចិញ្ចឹមវីរុសនេះបានដូចគ្នា ប៉ុន្តែចិនគ្រាន់តែចែករំលែក ហ្សែននៃវីរុស ប៉ុណ្ណោះ មិនមែនគំរូនៃវីរុសឡើយ។ នេះបើតាមការចុះផ្សាយរបស់សារព័ត៌មានអូស្ត្រាលី ABC។
ជាមួយគ្នានេះ លោក Julian Druce ប្រធានមន្ទីពិសោធន៍កំណត់អត្តសញ្ញាណនៃវីរុសរបស់វិទ្យាស្ថាន Peter Doherty បាននិយាយសេចក្តីថ្លែងការណ៍ថា បន្ទាប់ពីមានគំរូកូរ៉ូណាវីរុស វិទ្យាស្ថានមានសមត្ថភាពក្នុងការពិសោធលើវីរុសប្រភេទថ្មីនេះគ្រប់វិធីទាំងអស់ ក្នុងនោះរួមមានការពិសោធរកថ្នាំបង្ការ ព្យាបាល និងការរកមើលវីរុសនៅក្នុងខ្លួនអ្នកជំងឺ ដែលមិនទាន់ចេញរោគសញ្ញាជាដើម។ យ៉ាងណាក៏ដោយ លោក Julian បានបន្តថា វីរុសនេះ គឺត្រូវបានប្រើប្រាស់តែក្នុងផ្លូវវិជ្ជមានតែប៉ុណ្ណោះសម្រាប់មន្ទីរពិសោធន៍របស់អូស្ត្រាលី។
សូមបញ្ជាក់ថា កូរ៉ូណាវីរុស បានផ្ទុះឡើងនៅក្នុងក្រុងវូហាន ខេត្តហ៊ូប៉ី ដែលបានបង្កឲ្យមនុស្សជាច្រើនពាន់នាក់ផ្ទុកវីរុសនេះ និងមនុស្សជាច្រើនរយនាក់បានស្លាប់នៅចិន។ វីរុសថ្មីនេះ ត្រូវបានគេជឿថា បង្កដោយសត្វព្រៃ ដែលលក់នៅក្នុងផ្សារលក់គ្រឿងសមុទ្រមួយកន្លែង ក្នុងក្រុងវូហាន។ ម្យ៉ាងទៀត កូរ៉ូណាវីរុស អាចឆ្លងពីមនុស្សទៅមនុស្ស តាមរយៈការក្អក កណ្តាស់ និងទឹកមាត់ជាដើម៕
Tag:
អូស្ត្រាលី
ចិន
កូរ៉ូណាវីរុស
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
