ឧត្តមសេនីយ៍ឯក ឆាយ គឹមខឿន អគ្គស្នងការរងនិងជាអ្នកនាំពាក្យអគ្គស្នងការដ្ឋាននគរបាលជាតិ អះអាងថា សមត្ថកិច្ច នឹងចាត់វិធានការតាមផ្លូវច្បាប់ បើរកឃើញជនណា ដែលបង្កើតព័ត៌មានក្លែងក្លាយលើបណ្តាញសង្គម អំពីមេរោគកូរ៉ូណាប្រភេទថ្មី។
ក្នុងកិច្ចសម្ភាសជាមួយសារព័ត៌មានថ្មីៗ តាមទូរស័ព្ទ នារសៀលថ្ងៃទី២៩ ខែមករា ឆ្នាំ២០២០ លោក ឆាយ គឹមខឿន បញ្ជាក់ដូច្នេះថា៖«...បើរកឃើញ គេចាត់វិធានការ...»។ យ៉ាងណា លោក ពុំបានផ្តល់ចម្លើយឡើយថា ពេលនេះ សមត្ថកិច្ច ចាប់ផ្តើមចាត់វិធានការជាក់ស្តែង ស្រាវជ្រាវរកអ្នកបង្កើតព័ត៌មានក្លែងក្លាយទាំងនោះហើយ ឬក៏មិនទាន់ទេ។
អ្នកនាំពាក្យរូបនេះ លើកហេតុផលថា៖«គេ ប្រើបច្ចេកវិទ្យាបង្ហោះ អ៊ីចឹង យើង ត្រូវស្រាវជ្រាវតាមបច្ចេកវិទ្យា។ យើង អត់ទាន់ដឹងថា អ្នកណាបង្ហោះណាឥឡូវ។ រករបៀបម៉េច សហការជាមួយអ្នកណា អ្នកណាគេប្រាប់ទាំងអស់ខ្ទេចខ្ទីអ៊ីចឹង»។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាល អំពាវនាវឲ្យសមត្ថកិច្ច ចាត់វិធានការលើអ្នកបង្កើតព័ត៌មានក្លែងក្លាយទាំងនោះ។ លោក និយាយជាមួយ Fresh News ថា៖«ខ្ញុំ យល់ថាគាត់មានចេតនាបំភ័យប្រជាជនពិតប្រាកដ អាជ្ញាធរ [ត្រូវ] មានវិធានការតាមផ្លូវច្បាប់»។
លោក មាស សុភ័ណ្ឌ អ្នកនាំពាក្យក្រសួងព័ត៌មាន លើកឡើងថា អ្នកប្រើប្រាស់បណ្តាញសង្គម ត្រូវមានទំនួលខុសត្រូវ ក្នុងការបង្ហោះ និង ការចែករំលែកព័ត៌មាននានា ហើយត្រូវចៀសវាងការបង្កើតព័ត៌មានមិនពិត ដែលបង្កឲ្យមានអសន្តិសុខដល់សង្គម និងធ្វើឲ្យប៉ះពាល់ដល់កិត្តិយស-កេរ្តិ៍ឈ្មោះរបស់បុគ្គលឬស្ថាប័នណាមួយ។ លោក រម្លឹកថា ការបង្កើតឬការបង្ហោះព័ត៌មានមិនពិតបែបនេះ អាចនាំឲ្យមានការប្រឈមចំពោះមុខច្បាប់។
លោក បន្តថា ក្រសួងព័ត៌មាន កំពុងតាមដានមើលចំពោះការបង្កើតព័ត៌មានក្លែងក្លាយពីមេរោគកូរ៉ូណាប្រភេទថ្មីនេះ។ តើក្រសួងព័ត៌មាន មានចាត់វិធានការជាក់ស្តែងហើយឬនៅ? លោក ប្រាប់សារព័ត៌មានថ្មីៗថា៖«យើង រង់ចាំកិច្ចសហការពីក្រសួង-ស្ថាប័នពាក់ព័ន្ធទាំងអស់»។
ការផ្ទុះមេរោគកូរ៉ូណាប្រភេទថ្មីនៅប្រទេសចិន បង្កការភ័យខ្លាចដល់ពលរដ្ឋនៃប្រទេសនានា រួមទាំងពលរដ្ឋកម្ពុជាផងដែរ ជាពិសេស នៅពេលកម្ពុជា បានជួបប្រទះនឹងមេរោគនេះ។ អ្វីដែលធ្វើពលរដ្ឋកម្ពុជា រឹតតែបារម្ភ គឺមានការបង្ហោះព័ត៌មានជាបន្តបន្ទាប់លើបណ្តាញសង្គម ថា រកឃើញជនជាតិចិនបន្ថែមទៀត ដែលផ្ទុកមេរោគកូរ៉ូណា នៅខេត្ត-ខេត្តនោះ ឬនៅកន្លែងនេះ-កន្លែងនោះ។
ជាក់ស្តែង មានការបង្ហោះព័ត៌មានថា រកឃើញជនជាតិចិន២នាក់ ផ្ទុកមេរោគកូរ៉ូណា នៅខេត្តសៀមរាប និង២នាក់ទៀត នៅខេត្តកោះកុង។ តែមន្ត្រីពាក់ព័ន្ធ ជាពិសេសក្រសួងសុខាភិបាល បានចេញបដិសេធថា ព័ត៌មាននេះ មិនពិតឡើយ។
ក្រសួង បញ្ជាក់ជាដដែលៗថា មកដល់ពេលនេះ កម្ពុជា មានមេរោគកូរ៉ូណាតែ១ករណីប៉ុណ្ណោះ នៅលើបុរសជនជាតិចិនម្នាក់ អាយុ៦០ឆ្នាំ ឈ្មោះ ចា ជិនហួ។ គាត់ និង សមាជិកគ្រួសារ៣នាក់ទៀត បានធ្វើដំណើរពីទីក្រុងវូហាន មកកាន់ខេត្តព្រះសីហនុ កាលពីថ្ងៃទី២៣ ខែមករា ឆ្នាំ២០២០។ គ្រួសាររបស់គាត់ មិនបានឆ្លងមេរោគកូរ៉ូណាឡើយ។
លោកវេជ្ជបណ្ឌិត លី សូវ៉ាន់ អ្នកនាំពាក្យក្រសុខាភិបាល ផ្តល់ព័ត៌មានថា បច្ចុប្បន្ននេះ បុរសជនជាតិចិននោះ ស្ទើរតែជាសះស្បើយទៅហើយ។ លោក ហ៊ានអះអាងថា ក្រុមគ្រូពេទ្យកម្ពុជា អាចព្យាបាលគាត់ឲ្យជាសះស្បើយ១០០ភាគរយ។
មេរោគកូរ៉ូណាប្រភេទថ្មីនេះ មានប្រភពដើមមកពីទីក្រុងវូហាន ខែហ៊ូប៉ី ប្រទេសចិន ដែលចាប់ផ្តើមផ្ទុះឡើងកាលពីចុងខែធ្នូ ឆ្នាំ២០១៩។ គិតមកដល់ព្រឹកថ្ងៃទី២៩ ខែមករា ឆ្នាំ២០២០ អ្នកស្លាប់ដោយសារមេរោគកូរ៉ូណាប្រភេទថ្មី បានកើនឡើងដល់ជាង១៣០នាក់ហើយ ខណៈអ្នកផ្ទុកមេរោគនេះ បានកើនឡើងដល់ជិត៦ពាន់នាក់ នៅក្នុងប្រទេសចិន។
មេរោគកូរ៉ូណាប្រភេទថ្មី ដែលអាចបង្កទៅជាជំងឺរលាកសួត និងមិនទាន់មានវ៉ាក់សាំងការពារ បានរាលដាលទៅដល់តំបន់ដទៃទៀត ដូចជា ម៉ាកាវ ហុងកុង និង តៃវ៉ាន់ រួមទាំងបណ្តាលប្រទេសនានា ដូចជា ថៃ វៀតណាម កម្ពុជា ជប៉ុន អាមេរិក អូស្ត្រាលី កូរ៉េខាងត្បូង កាណាដា ម៉ាឡេស៊ី សិង្ហបុរី បារាំង និង ណេប៉ាល់ ជាដើម។ ក្រៅពីនៅប្រទេសចិន ពុំមានអ្នកបាត់បង់ជីវិតដោយសារមេរោគនេះឡើយ៕