អន្តរជាតិ
×![]()
ដោយ: ធៀន ភារិន្ទ
ក្រុមហ៊ុនអាកាសចរអង់គ្លេស ឥណ្ឌូណេស៊ី និងរុស្ស៊ីនៅថ្ងៃទី២៩ ខែមករា បានប្រកាសផ្អាកការហោះហើរទៅ និងមកពីចិន ក្នុងអំឡុងពេល កូរ៉ូណាវីរុស កំពុងតែអុកឡុងខ្លាំង និងដើម្បីទប់ស្កាត់ការឆ្លងវីរុសប្រភេទថ្មីនេះ ចូលមកក្នុងប្រទេស។ 
តាមរយៈវេបសាយរបស់ខ្លួន ក្រុមហ៊ុនអាកាសចរ British Airways មិនបង្ហាញតារាងជើងហោះហើរដោយផ្ទាល់ណាមួយឡើយទៅប្រទេសចិន នៅក្នុងខែមករា និងខែកុម្ភៈនេះ។ បើតាមសេចក្តីថ្លែងការណ៍តាមអ៊ីម៉ែលរបស់ខ្លួន ក្រុមហ៊ុនអាកាសចរ បានបញ្ជាក់យ៉ាងដូច្នេះថា៖ «យើងសុំទោសអតិថិជន ចំពោះបញ្ហានេះ ប៉ុន្តែសុវត្ថិភាពរបស់អតិថិជន និងអ្នកបំរើការលើយន្តហោះ គឺចំបងជាងគេបំផុត»។
ក្រុមហ៊ុនអាកាសចរ British Airways បានបន្តទៀតថា សម្រាប់អ្នកដំណើរ ដែលចង់ទៅ និងត្រលប់មកពីចិន ក្នុងពេលខាងមុខ ត្រូវឆែកវេបសាយមើលជាមុនសិន ដើម្បីប្រាកដថា មានជើងហោះហើរទៅ និងត្រលប់មកពីចិន។ ការផ្អាកជើងហោះហើរនេះ ធ្វើឡើងបន្ទាប់ពីក្រសួងការបរទេសអង់គ្លេស បានចេញសេចក្តីព្រមានដល់អ្នកដំណើរទាំងអស់ ដែលចង់ធ្វើដំណើរទៅចិន។
ចំណែកក្រុមហ៊ុនអាកាសចរឥណ្ឌូណេស៊ី Lion Air Group វិញ ក៏បានផ្អាកការហោះហើរទៅ និងមកពីចិនវិញផងដែរចាប់ពីថ្ងៃទី១ ខែកុម្ភៈខាងមុខ រហូតដល់មានការកត់សម្គាល់ថ្មី ទើបបើកដំណើរការវិញ។ ចំណាត់ការរបស់ក្រុមហ៊ុន ធ្វើឡើងក្នុងគោលបំណងទប់ស្កាត់ការរីករាលដាលនៃកូរ៉ូណាវីរុស។ បើតាមអ្នកនាំពាក្យរបស់ក្រុមហ៊ុន Lion Air Group ក្រុមហ៊ុន នឹងផ្អាកជើងហោះហើរទៅទីក្រុងចំនួន ១៥របស់ចិន។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
ក្រៅពីអង់គ្លេស និងឥណ្ឌូណេស៊ី ក្រុមហ៊ុនអាកាសចររុស្ស៊ីឯណោះវិញ ក៏បានផ្អាកជើងហោះហើរទៅអឺរ៉ុប និងចិនផងដែរក្នុងអំឡុងពេល កូរ៉ូណាវីរុសអុកឡុកខ្លាំង។ Ural Airlines គឺជាក្រុមហ៊ុន ដែលមានមូលដ្ឋាននៅក្នុងក្រុង Urals រុស្ស៊ី បានផ្អាកជើងហោះហើររបស់ខ្លួនទៅទីក្រុងមុយនិច (Munich)របស់អាល្លឺម៉ង់, ទីក្រុងប៉ារីសរបស់បារាំង, ទីក្រុងរ៉ូមរបស់អ៊ីតាលី និងក្រុងSapporo របស់ជប៉ុន រហូតដល់ចុងខែកុម្ភៈ។
លើសពីនេះ ក្រុមហ៊ុនអាកាសចររុស្ស៊ី Urals ក៏បានផ្អាកការហោះហើរទៅកោះហៃណាន និងគោលដៅមួយចំនួននៅចិនផងដែរ។ សម្រាប់មូលហេតុនៃការផ្អាកនេះ គឺដោយសារក្រុមហ៊ុនអាកាសចរមានការនិយមជិះច្រើនពីសំណាក់ភ្ញៀវទេសចរចិន។ ម្យ៉ាងវិញទៀត ក្រុមហ៊ុនត្រូវផ្អាកបណ្តោះអាសន្នសិន ដើម្បីទប់ស្កាត់កូរ៉ូណាវីរុស កុំឲ្យមាននៅលើទឹកដីរុស្ស៊ី។
បន្ទាប់ពីកូរ៉ូណាវីរុស បានចម្លងជាច្រើនករណី និងសម្លាប់មនុស្សជាច្រើននាក់ នៅលើពិភពលោក ប្រទេសជាច្រើន បានចេញវិធានការរៀងៗខ្លួន ដើម្បីទប់ស្កាត់វីរុសមួយនេះ កុំឲ្យឆ្លងចូលមកក្នុងប្រទេសខ្លួន។ ជាក់ស្តែង ម៉ាឡេស៊ី សិង្ហបុរី និងហ្វីលីពីន បានផ្អាកការផ្តល់ទិដ្ឋការដល់ជនជាតិចិន ដែលរស់នៅក្នុងក្នុងទីក្រុងវូហានបណ្តោះអាសន្នសិន។ លើសពីនេះ នៅមានប្រទេសផ្សេងទៀតដូចជា ជប៉ុន កូរ៉េខាងត្បូង អាមេរិក ថៃ បានចេញចំណាត់ការ ជម្លៀសប្រជាជនរបស់ខ្លួនចេញពីក្រុងវូហាន៕
Tag:
ចិន
អង់គ្លេស
កូរ៉ូណាវីរុស
© រក្សាសិទ្ធិដោយ thmeythmey.com
