អន្តរជាតិ
រុស្ស៊ី សហការជាមួយចិន ស្រាវជ្រាវរកវ៉ាក់សាំងការពារកូរ៉ូណាវីរុស រូបភាព៖ BBC
× រុស្ស៊ី និងចិន កំពុងសហការគ្នាស្រាវជ្រាវរកវ៉ាក់សាំង ការពារកូរ៉ូណាវីរុស ដើម្បីទប់ស្កាត់ការរីករាលដាលវីរុសថ្មីនេះ និងអត្រាការស្លាប់របស់ប្រជាជនចិន។ នេះបើតាមការបញ្ជាក់របស់ស្ថានកុងស៊ុលរុស្ស៊ីនៅក្រុង Guangzhou ប្រទេសចិន នៅថ្ងៃទី២៩ ខែមករា។
គិតមកត្រឹមពេលនេះ កូរ៉ូណាវីរុស បានកើនឡើងដល់ជាង ៧០០០ពាន់ករណី នៅចិន និងបណ្តាប្រទេសចំនួន១៦ និងមានកើនចំនួនស្លាប់រហូតដល់ ១៧០នាក់ នៅក្នុងប្រទេសចិន។ ដើម្បីទប់ស្កាត់ការរីករាលដាលនៃវីរុស ចិន និងរុស្ស៊ី បានសហការគ្នា ដើម្បីស្រាវជ្រាវរកវ៉ាក់សាំងកូរ៉ូណាវីរុស។
តាមរយៈសេចក្តីថ្លែងការណ៍របស់ខ្លួន ស្ថានកុងស៊ុលរុស្ស៊ីប្រចាំនៅក្រុង Guangzhou ប្រទេសចិន បានអះអាងយ៉ាងដូច្នេះថា៖ «អ្នកជំនាញរុស្ស៊ី និងចិន កំពុងអភិវឌ្ឍវ៉ាក់សាំងកូរ៉ូណាវីរុស»។ បើតាមស្ថានកុងស៊ុល ពេលនេះចិនបានផ្តល់ ហ្សែនកូរ៉ូណាវីរុស មកឲ្យរុស្ស៊ីរួចហើយ។ ការណ៍នេះ វានឹងជួយឲ្យអ្នកជំនាញរុស្ស៊ីអាចពិសោធ និងកំណត់អត្តសញ្ញាណវីរុសថ្មី ដែលមានក្នុងខ្លួនមនុស្សត្រឹមតែរយៈពេល ២ម៉ោងប៉ុណ្ណោះ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
ពាក់ព័ន្ធទៅនឹងការសហការគ្នានេះ គេមិនទាន់ដឹងច្បាស់នៅឡើយទេ ថាតើក្រុមអ្នកជំនាញចិន និងរុស្ស៊ី ត្រូវធ្វើការជាមួយគ្នា ឬដាច់ដោយឡែកពីគ្នា ព្រោះស្ថានកុងស៊ុលរុស្ស៊ី មិនបានបញ្ជាក់បញ្ហានេះឲ្យបានច្បាស់លាស់ទេ។
សូមបញ្ជាក់ថា រុស្ស៊ី មិនទាន់មានករណីកូរ៉ូណាវីរុសណាមួយកើតឡើងនៅឡើយទេ។ ដើម្បីទប់ស្កាត់ បញ្ហានេះ នាយករដ្ឋមន្ត្រី Mikhail Mishustin បានបញ្ជាឲ្យក្រុមអ្នកឃ្លាំមើលសុខភាពរុស្ស៊ី តាមដាន និងត្រួតពិនិត្យមើលភ្ញៀវទេសចរទាំងអស់ ដែលត្រលប់មកពីចិនវិញ និងតាក់តែងគម្រោងមួយសម្រាប់រដ្ឋាភិបាលរុស្ស៊ី ក្នុងការទប់ស្កាត់ការឆ្លងនៃកូរ៉ូណាវីរុស៕
Tag:
រុស្ស៊ី
ចិន
កូរ៉ូណាវីរុស
© រក្សាសិទ្ធិដោយ thmeythmey.com