អន្តរជាតិ
សិង្ហបុរី ចែកម៉ាស់ឲ្យពលរដ្ឋមិនគិតថ្លៃ, មួយគ្រួសារបានបួន (រូបកណ្ដាល) លោករដ្ឋមន្ត្រីអភិវឌ្ឍន៍ជាតិសិង្ហបុរី Lawrence Wong (AFP)
× គ្រួសារសិង្ហបុរីនីមួយៗ នឹងទទួលបានម៉ាស់វេជ្ជសាស្ត្រ ចំនួន ៤។ រដ្ឋមន្ត្រីអភិវឌ្ឍន៍ជាតិសិង្ហបុរី លោក Lawrence Wong លើកឡើងបែបនេះនៅថ្ងៃទី៣០ ខែមករា ខណៈពលរដ្ឋព្រួយបារម្ភការឆ្លងកូរ៉ូណាវីរុស។ ទន្ទឹមនឹងការចែកម៉ាស់ជូនពលរដ្ឋខ្លួន លោករដ្ឋមន្ត្រីរូបនេះ ទទូចឲ្យប្រជាជនសិង្ហបុរីទាំងអស់ប្រើម៉ាស់ដោយមានទំនួលខុសត្រូវ។
ការចែកម៉ាស់នេះ គឺជា «អនុវត្តតែមួយលើក» ប៉ុណ្ណោះ។ លោករដ្ឋមន្ត្រីអភិវឌ្ឍជាតិសិង្ហបុរី Lawrence Wong អះអាងបែបនេះ ដោយបន្ថែមថា ម៉ាស់ទាំងនេះ គឺយកចេញពីស្ដុកជាតិរបស់សិង្ហបុរី ហើយផ្តល់ជូនដោយផ្ទាល់ទៅកាន់សាធារណជន។
បើតាមការចុះផ្សាយរបស់ទូរទស្សន៍សិង្ហបុរី Channel News Asia លោក សង្កត់ធ្ងន់ថា គោលដៅគឺដើម្បីធានាចំពោះប្រជាជនសិង្ហបុរីថា គ្រួសារនីមួយៗ នឹងទទួលបានម៉ាស់ ប្រសិនបើនរណាម្នាក់ក្នុងគ្រួសារនេះពិតជាត្រូវការប្រើវា។ ការចែកម៉ាស់ នឹងធ្វើឡើងចាប់ពីថ្ងៃទី ១ ខែកុម្ភៈតទៅ ហើយរំពឹងនឹងបញ្ចប់នាថ្ងៃទី ៩ កុម្ភៈ។
ទន្ទឹមនេះ លោករដ្ឋមន្ត្រី Wong បានអំពាវនាវឲ្យពលរដ្ឋសិង្ហបុរីប្រើប្រាស់ម៉ាស់នេះដោយមានទំនួលខុសត្រូវ។ ត្រង់នេះ លោក ពន្យល់បែបនេះថា៖« កុំបើកប្រអប់ ហើយចាប់ផ្តើមប្រើវាដោយផ្តាសនោះ។ ប្រើវាតែពេលដែលអ្នកមិនសូវស្រួលខ្លួន ហើយត្រូវប្រញាប់ទៅជួបពិគ្រោះយោបល់ជាមួយគ្រូពេទ្យ»។
លោក Wong ប្រាប់ឲ្យពលរដ្ឋសិង្ហបុរីចងចាំថា ម៉ាស់ ពុំត្រូវបានបញ្ជាក់ថាអាចការពារអ្នកដោយស្វ័យប្រវត្តិពីការឆ្លងវីរុសនេះឡើយ។ ម្យ៉ាងទៀត លោកបានលើកឡើងពីការកត់សម្គាល់របស់អ្នកជំនាញវេជ្ជសាស្ត្រនៅជុំវិញពិភពលោកថា ពេលខ្លះ ពាក់ម៉ាស់ ឬពាក់វាដោយមិនត្រឹមត្រូវ អាចបង្កហានិភ័យនៃការឆ្លងវីរុសដល់អ្នកទៅវិញ។
ជាឧទាហរណ៍ លោករដ្ឋមន្ត្រី អះអាងថា បើអ្នកពាក់ម៉ាស់ ហើយនៅតែបន្តយកដៃកខ្វក់អ្នកទៅប៉ះមុខអ្នកដដែល វានឹងមុនជួយអ្នកបង្កាវីរុសនេះបានឡើយ។ យ៉ាងណាមិញ លោក សង្កត់ថា ការរក្សាអនាម័យផ្ទាល់ខ្លួន គឺជារឿងដ៏សំខាន់បំផុតសម្រាប់បង្កាការឆ្លង ដូចជា ការលាងដៃជាមួយសាប៊ូញឹកញាប់ ជាដើម។
សូមបញ្ជាក់ថា គិតមកត្រឹមថ្ងៃទី៣០ ខែមករា នេះ ប្រទេសសិង្ហបុរី បានរកឃើញអ្នកឆ្លងណូវែលកូរ៉ូណាវីរូសចំនួន ១០នាក់ ហើយ ខណៈតួលេខអ្នកស្លាប់ក្នុងប្រទេសចិន កើនដល់ ១៧០នាក់៕
Tag:
សិង្ហបុរី
រដ្ឋមន្ត្រីអភិវឌ្ឍន៍ជាតិ
Lawrence Wong
កូរ៉ូណាវីរុស
© រក្សាសិទ្ធិដោយ thmeythmey.com