អន្តរជាតិ
Brexit៖ ដល់ថ្ងៃអង់គ្លេសចេញពីអឺរ៉ុបហើយ ក្រោយពន្យារពេលបីដង រូបភាព Xinhua
× ថ្ងៃទី៣១ ខែមករា ឆ្នាំ២០២០ ជាថ្ងៃចុងក្រោយដែលចក្រភពអង់គ្លេសជាសមាជិកអឺរ៉ុប។ ថ្ងៃទី៣១ ខែមករានេះ ក៏ជាថ្ងៃដែលអង់គ្លេសត្រូវផ្ដាច់សមាហរណកម្មនយោបាយ ពាណិជ្ជកម្ម និងសេដ្ឋកិច្ចពីប្លុកតំបន់ដ៏ធំ និងជាអ្នកជិតខាងបំផុតរបស់ខ្លួនក្នុងពេលច្រើនជាង៤បួនទសវត្សរ៍។ យ៉ាងណាមិញ ១១ខែទៅមុខ នឹងមិនមានអ្វីប្លែកឡើយដោយអង់គ្លេស និងអឺរ៉ុបយល់ព្រមទុករយៈពេលអន្តរកាលដើម្បីបន្តការចរចាលើទំនាក់ទំនងពាណិជ្ជកម្ម និងសេដ្ឋកិច្ចក្រោយលែងលះគ្នានេះ។
ក្រោយរួមរស់ជាមួយគ្នាអស់ពេលរាប់សិបឆ្នាំ ចក្រភពអង់គ្លេស នឹងចែកផ្លូវជាមួយសហភាពអឺរ៉ុបថ្ងៃទី៣១ ខែមករានេះ ដែលជាកាលបរិច្ឆេទចាកចេញផ្លូវការរបស់អង់គ្លេស។ ការចាកចេញ គឺមានពេល៤៣សប្ដាហ៍ទៅហើយបន្ទាប់ពីប្រជាជនអង់គ្លេសសម្រេចចិត្តចែកផ្លូវពីអឺរ៉ុបក្នុងការធ្វើប្រជាមតិឆ្នាំ២០១៦ កន្លងទៅ។ ទម្រាំដល់ថ្ងៃទី៣១ នេះ ការចាកចេញរបស់អង់គ្លេស ត្រូវបានពន្យារពេលដល់ទៅបីដងឯណោះ។
នឹងមិនមានអ្វីប្រែប្រួលភ្លាមៗឡើយសម្រាប់ប្រជាជនអង់គ្លេស និងសហភាពអឺរ៉ុប ដោយក្រុងឡុងដ៍ និងក្រុងព្រុចសែលឯកភាពគ្នាទុករយៈពេលអន្តរកាលមួយ ដែលរក្សាអ្វីៗនៅដូចដើមសិនរហូតដល់ថ្ងៃទី៣១ ខែធ្នូ ឆ្នាំ២០២០ ឯណោះ។ ចន្លោះពេលនេះ អង់គ្លេស និងអឺរ៉ុប នឹងបន្តជជែកគ្នាលើទំនាក់ទំនងសំខាន់ៗ ពិសេសចំណងពាណិជ្ជកម្ម និងសេដ្ឋកិច្ច។ ប៉ុន្តែអង់គ្លេស នឹងបាត់បង់តំណាង និងសិទ្ធិបោះឆ្នោតរបស់ខ្លួនក្នុងស្ថាប័ននានារបស់អឺរ៉ុប។
ឯរឿងពាណិជ្ជកម្មវិញ អង់គ្លេសប្រកាសថា ខ្លួនត្រៀមសម្រាប់ការចរចានៅខែកុម្ភៈ ខណៈអឺរ៉ុបវិញកំពុងជជែកផ្ទៃក្នុងខ្លួនពីអ្វីដែលត្រូវចរចាជាមួយអឺរ៉ុប។ ក្រុមការងារចរចារបស់អឺរ៉ុបលើរឿងពាណិជ្ជកម្ម អាចទទួលបានសិទ្ធិអំណាចពីប្រទេសសមាជិកនៅប៉ុន្មានសប្ដាហ៍ទៀត។ ដូចនេះការចរចាអាចចាប់ផ្ដើមនៅខែកុម្ភៈនេះ ឬខែមីនាខាងមុខ។ ចក្រភពអង់គ្លេស រំពឹងថា នឹងសម្រេចបានកិច្ចព្រមព្រៀងពាណិជ្ជកម្មជាមួយអឺរ៉ុប និងប្រទេសសមាជិកអឺរ៉ុបនៅពេលព្រមគ្នាតែម្ដង។
ប្រធានបទពាណិជ្ជកម្ម មិនមែនជារឿងតែមួយគត់ដែលត្រូវដោះស្រាយឡើយ អឺរ៉ុប និងអង់គ្លេស ត្រូវជជែកគ្នាលើរឿងជាច្រើនទៀតដូចជាសន្តិសុខ អប់រំ ថាមពល និងការអនុវត្តច្បាប់ជាដើម។ ដំណាក់កាលដំបូង ការចរចាលើបញ្ហាទាំងអស់ គ្រោងបញ្ចប់មុនថ្ងៃទី៣១ ខែកក្កដា។ ក្នុងករណីមិនដាច់ស្រេច ការចរចាអាចបន្តដល់ដំណាច់ឆ្នាំ២០២០ តែម្ដង ដោយអង់គ្លេសជាអ្នកស្នើសុំការពន្យារពេលណាមួយក្នុងអំឡុងពេលនេះ។
ខណៈការសម្រេចឲ្យបានកិច្ចព្រមព្រៀង ជាការបើកទំព័រថ្មីនៃភាពជាដៃគូអង់គ្លេស-សហភាពអឺរ៉ុប។ បើមិនមានការបន្តការចរចា ឬក៏គ្មានកិច្ចព្រមព្រៀងពាណិជ្ជកម្មវិញនោះ អង់គ្លេស នឹងដើរចេញពីអឺរ៉ុបនៅចុងឆ្នាំ២០២០ ជាមួយបញ្ហាឈឺក្បាល ព្រោះអង់គ្លេស និងអឺរ៉ុប នឹងក្លាយជាអ្នកដទៃសុទ្ធសាធ ហើយការផ្ដើមទំនាក់ទំនងឡើងវិញ នឹងមិនមានរឿងងាយស្រួលឡើយ៕
Tag:
Brexit
អង់គ្លេស
អឺរ៉ុប
© រក្សាសិទ្ធិដោយ thmeythmey.com