អន្តរជាតិ
មន្ត្រីសុខាភិបាលម្នាក់នៅជាប់ក្រុងវូហាន អស់តំណែង ព្រោះមិនដឹងព័ត៌មានអ្នកឆ្លងកូរ៉ូណាវីរុសក្នុងតំបន់ខ្លួន អ្នកស្រី Tang Zhihong ប្រធានគណៈកម្មការសុខាភិបាលប្រចាំក្រុង Huanggang អំឡុងពេលផ្តល់បទសម្ភាសជាមួយទូរទស្សន័រដ្ឋចិន CCTV កាលពីថ្ងៃ ៣០ មករា ឆ្នាំ២០២០ (Global Times)
× ប្រធានគណៈកម្មាការសុខាភិបាលប្រចាំទីក្រុង Huanggang ដែលជាទីក្រុងរងផលប៉ះពាល់ដោយសារកូរ៉ូណាវីរុសប្រភេទថ្មីអាក្រក់បំផុតលំដាប់ទី២ ក្នុងខេត្ត Hubei ត្រូវបានបណ្ដេញចេញពីតំណែង កាលពីថ្ងៃ ៣០ ខែមករា ។ ហេតុដែលនាំឲ្យមន្ត្រីជាន់ខ្ពស់រូបនេះ អស់តំណែង គឺមកពីខ្វះព័ត៌មានអំពីអ្នកឆ្លងកូរ៉ូណាវីរុសក្នុងតំបន់របស់ខ្លួន ខណៈកំពុងផ្តល់បទសម្ភាសជាមួយប្រព័ន្ធផ្សព្វផ្សាយរដ្ឋរបស់ចិនមួយ។ រឿងរ៉ាវនេះ បានបង្កកំហឹងខ្លាំងដល់ពលរដ្ឋចិន ដែលចាត់ទុកមន្ត្រីរូបនេះថា អសមត្ថភាព។
អ្នកស្រី Tang Zhihong ដែលដឹកនាំគណៈកម្មការសុខាភិបាលប្រចាំទីក្រុង Huanggang បានបង្ហាញមុខលើកញ្ចក់ទូរទស្សន៍រដ្ឋ កាលពីថ្ងៃព្រហស្បតិ៍ ទី៣០ មករា ។ ក៏ប៉ុន្តែ ក្រោយពីទទួលសំណួរពីសំំណាក់អ្នករាយការណ៍ព័ត៌មាន និងក្រុមអធិការកិច្ចរបស់រដ្ឋាភិបាលកណ្ដាលចិន ជុំវិញបញ្ហាដូចជា តើមានមនុស្សប៉ុន្មាននាក់សម្រាកព្យាបាលនៅមន្ទីរពេទ្យនៅតំបន់ដែលអ្នកស្រីគ្រប់គ្រង មន្ត្រីសុខាភិបាលជាន់ខ្ពស់រូបនេះ ពុំអាចមានចម្លើយភ្លាមៗសម្រាប់ពួកគេឡើយ។
«ខ្ញុំមិនដឹងទេ , ខ្ញុំមិនច្បាស់ទេ»។ អ្នកស្រី និយាយបែបនេះ នៅពេលត្រូវបានសួរថា អ្នកជំងឺដោយសារកូរ៉ូណាវីរុសប៉ុន្មាននាក់កំពុងសម្រាកនៅទីនោះ។ តាមការចុះផ្សាយរបស់ទីភ្នាក់ងារព័ត៌មាន Reuters អ្នកស្រី បកស្រាយថា៖«ខ្ញុំគ្រាន់តែដឹងពីចំនួនគ្រែនៅមន្ទីរពេទ្យប៉ុណ្ណោះ។ កុំសួរខ្ញុំថាតើមានមនុស្សប៉ុន្មានកំពុងទទួលការព្យាបាល ខ្ញុំមិនដឹងទេ»។
ប៉ុន្មានម៉ោងក្រោយប៉ុណ្ណោះក្រោយមានការរិះគន់ភ្លូកទឹកភ្លូកដីពីសំណាក់អ្នកលេងបណ្ដាញសង្គមរបស់ចិន គណៈកម្មការសុខាភិបាលចិន បានប្រកាសក្នុងសេចក្តីថ្លែងការណ៍ខ្លួនមួយថា អ្នកស្រី Tang ត្រូវបានដកហូតតំណែង។ យ៉ាងណាមិញ ខ្លួន ពុំបានបញ្ជាក់ព័ត៎មានលម្អិតជុំវិញករណីដកហូតតំណែងនេះឡើយ។
សូមបញ្ជាក់ថា ទីក្រុង Huanggang បានរាយការណ៍រកឃើញករណីឆ្លងណូវែលកូរ៉ូណាវីរុសជិត៥០០ករណី ហើយមានអ្នកស្លាប់១២នាក់ហើយ។ បើតាម Reuters ទីក្រុងនេះ គឺជាក្រុងរងផលប៉ះពាល់ដោយសារកូរ៉ណាវីរុសប្រភេទថ្មីអាក្រក់បំផុតលំដាប់ទី២ ក្នុងខេត្តហ៊ូប៉ី បន្ទាប់ពីទីក្រុ វូហាន៕
Tag:
ចិន
Huanggang
កូរ៉ូណាវីរុស
Tang Zhihong
© រក្សាសិទ្ធិដោយ thmeythmey.com