អន្តរជាតិ
ថៃ នឹងយកយន្តហោះមួយគ្រឿងទៅជម្លៀសប្រជាជនខ្លួនពីវូហាន រូបភាព៖ Reuters
× ឧបនាយករដ្ឋមន្ត្រីថៃ Prawit Wongsuwon នៅថ្ងៃទី៣១ ខែមករា បានអះអាងថា ថៃ នឹងប្រើប្រាស់យន្តហោះមួយគ្រឿង ទៅជម្លៀសប្រជាជនរបស់ខ្លួនចេញពីក្រុងវូហាន បន្ទាប់មានការអនុញ្ញាតពីរដ្ឋាភិបាលចិន។
បើសិនគ្មានអ្វីប្រែប្រួលទេ រដ្ឋាភិបាលថៃ យកយន្តហោះមួយគ្រឿង ទៅជម្លៀសប្រជាជនចេញពីក្រុងវូហាននៅព្រឹកថ្ងៃទី១ ខែកុម្ភៈ។ បើតាមការអះអាងរបស់លោក Prawit Wongsuwon ឧបនាយករដ្ឋមន្ត្រី និងជារដ្ឋមន្ត្រីការពារជាតិថៃ ចិនបានអនុញ្ញាតឲ្យថៃ ជម្លៀសប្រជាជនខ្លួនហើយ ចំណែកការរៀបចំជម្លៀសប្រជាជនចេញពីក្រុងវូហាននេះ គឺជាបន្ទុករៀបចំដោយ រដ្ឋមន្ត្រីសុខាភិបាលថៃ។
ចំណែកលោក Narong Aphikulvanich អគ្គនាយករង នៃនាយកដ្ឋានសេវាវេជ្ជសាស្ត្រ បាននិយាយថា ប្រជាជនថៃ ៦៤នាក់ ត្រូវបានគេអះអាងថាមានវត្តមាននៅក្រុងវូហាន។ ដើម្បីសុវត្ថិភាពរបស់មនុស្សទាំង៦៤នាក់នេះ ថៃបានបញ្ជូនវេជ្ជបណ្ឌិតមួយក្រុម ដែលមានជំនាញផ្លូវដង្ហើម និងថ្នាំពេទ្យទៅជាមួយយន្តហោះមួយគ្រឿងនេះដែរ។ នេះបើតាមការចុះផ្សាយរបស់កាសែតថៃ Bangkok Post។
បើតាមលោក Narong មនុស្សទាំង ៦៤នាក់នេះ នឹងត្រូវគេបែងចែកជាពីរក្រុម ដើម្បីត្រួតពិនិត្យមើល។ មួយក្រុម ដែលមានសុខភាពធម្មតា នឹងបញ្ជូនត្រលប់ទៅផ្ទះរបស់ខ្លួន ចំណែកមួយក្រុម ដែលចេញរោគសញ្ញាត្រូវស្នាក់នៅដោយឡែកនាមន្ទីពេទ្យរយៈពេល ១៤ថ្ងៃសិន ដើម្បីទទួលការមើលថែទាំជំងឺ។
សូមបញ្ជាក់ថា នាថ្ងៃទី២៧ ខែមករា នាយករដ្ឋមន្ត្រី ប្រាយុទ្ធ ចន្ទអូចា បានគ្រោងនឹងជម្លៀសប្រជាជនរបស់ខ្លួនម្តងហើយ ប៉ុន្តែចិន និយាយកុំបារម្ភ ព្រោះទីក្រុងប៉េកាំងអាចគ្រប់គ្រងស្ថានការណ៍បាន ហើយថៃក៏មិនចាំបាច់ជម្លៀសប្រជាជនរបស់ខ្លួនដែរ៕
Tag:
ថៃ
ចិន
កូរ៉ូណាវីរុស
© រក្សាសិទ្ធិដោយ thmeythmey.com