អន្តរជាតិ
ស៊ុយអែតជាប្រទេសទី២៣ដែលរកឃើញអ្នកកើតកូរ៉ូណាវីរុស
× អាជ្ញាធរសុខាភិបាលស៊ុយអែត បានប្រកាសរកឃើញជំងឺរលាកសួតបង្កដោយមេរោគកូរ៉ូណាប្រភេទថ្មី ទី១ នាថ្ងៃសុក្រនេះ។ តាមការផ្សាយរបស់ The Local Sweden អ្នកជំងឺជាស្ត្រីម្នាក់ទៅពីក្រុងវូហាននាថ្ងៃទី២៤ ខែមករា។
ស្ត្រីរូបនេះ បានសម្រាកព្យាបាលនៅមន្ទីរពេទ្យ Ryhov County Hospital ក្នុងក្រុង Jönköping ប៉ុន្តែស្ថានភាពជំងឺមិនមានលក្ខណៈធ្ងន់ធ្ងរនោះឡើយ។
គិតត្រឹមយប់ថ្ងៃទី៣១ ខែមករា អ្នកមានជំងឺកូរ៉ូណាវីរុសដែលត្រូវបានរកឃើញមានជិត១ម៉ឺននាក់ ហើយអ្នកស្លាប់មាន២១៣ ដែលស្ថិតក្នុងប្រទេសចិន។ ក្រៅពីចិន និងរដ្ឋបាលពិសេសហុងកុង ម៉ាកាវ និងតៃវ៉ាន់ ប្រទេសផ្សេងទៀតដែលមានអ្នកជំងឺកូរ៉ូណាវីរុសរួមមាន ថៃ ជប៉ុន សិង្ហបុរី កូរ៉េខាងត្បូង អូស្ត្រាលី ម៉ាឡេស៊ី បារាំង សហរដ្ឋអាមេរិក អាល្លឺម៉ង់ វៀតណាម អេមីរ៉ាតអារ៉ាប់រួម កាណាដា អ៊ីតាលី រុស្ស៊ី ចក្រភពអង់គ្លេស កម្ពុជា ហ្វាំងឡង់ ឥណ្ឌា ណេប៉ាល់ ហ្វីលីពីន ស្រីលង្កា និងស៊ុយអែត៕
© រក្សាសិទ្ធិដោយ thmeythmey.com