មន្ត្រីជាន់ខ្ពស់វូហាន៖ ការឆ្លើយតបយឺតយ៉ាវ ធ្វើឲ្យការរាលដាលកូរ៉ូណាវីរុសកាន់តែអាក្រក់

អន្តរជាតិ

នយោបាយអន្តរជាតិ

មន្ត្រីជាន់ខ្ពស់វូហាន៖ ការឆ្លើយតបយឺតយ៉ាវ ធ្វើឲ្យការរាលដាលកូរ៉ូណាវីរុសកាន់តែអាក្រក់

01, Feb 2020 , 11:19 am

រូបភាព

លោក Ma Guoqiang លេខាធិការបក្សកម្មុយនីស្តប្រចាំក្រុង វូហាន អំឡុងពេលផ្តល់បទសម្ភាសន៍ជាមួយប្រព័ន្ធផ្សព្វផ្សាយរដ្ឋចិន CCTV នៅថ្ងៃ៣១ មករា (CGTN)

ដោយ:

ការឆ្លើយតបយឺតយ៉ាវរបស់ចិនក្នុងការរកឃើញការឆ្លងកូរ៉ូណាវីរុសប្រភេទថ្មីដ៏កាចសាហាវ បានធ្វើឲ្យការរីករាលដាលកាន់តែអាក្រក់ខ្លាំង។ មន្ត្រីជាន់ខ្ពស់ចិនមកពីទីក្រុង វូហាន ដែលជាទីកន្លែងវីរុសផ្ទុះ អះអាងបែបនេះ នៅថ្ងៃសុក្រ ៣១ ខែមករា ។

«ឥឡូវនេះ ខ្ញុំដឹងថា មានកំហុស ហើយមានវិប្បដិសារី និងស្តីបន្ទោសខ្លួនឯង» ។ លោក Ma Guoqiang លេខាធិការបក្សកម្មុយនីស្តប្រចាំក្រុង វូហាន បញ្ជាក់បែបនេះក្នុងបទសម្ភាសជាមួយប្រព័ន្ធផ្សព្វផ្សាយរដ្ឋចិន CCTV ។ មន្ត្រីជាន់ខ្ពស់រូបនេះ សង្កត់ធ្ងន់ថា ប្រសិនបើវិធានការតឹងរឹង ត្រូវបានអនុវត្តលឿនជាងនេះ លទ្ធផលនឹងប្រសើរជាងពេលបច្ចុប្បន្ន។

ទីក្រុង វូហាន និងក្រុងដទៃទៀតដែលហ៊ុមព័ទ្ធជុំវិញខេត្ត ហូប៉ី បានបិទបណ្ដាញដឹកជញ្ជូនប្រជុំជនទាំងអស់ និងផ្អាកជើងហោះហើរចេញទៅក្រៅ ចាប់ពីថ្ងៃ ២៣ ខែមករាកន្លងទៅ ។ ទន្ទឹមនេះរដ្ឋាភិបាល ក៏ទទូចឲ្យប្រជាពលរដ្ឋកុំចាកចេញពីទីក្រុងនេះ ប្រសិនបើគ្មានកាលៈទេសៈពិសេសណាមួយទេនោះ។ កត្តានេះធ្វើឲ្យមនុស្សប្រមាណ ៥៦ លាននាក់ ជាប់ឃាំងនៅផ្ទះ។

អត្ថបទទាក់ទង

អ្នកស្លាប់ដោយសារកូរ៉ូណាវីរុសឡើងដល់២៥៩នាក់ ខណៈអ្នកឈឺមានជាង១ម៉ឺននាក់

WHO ប្រកាសអាសន្នសកល ខណៈអ្នកស្លាប់ព្រោះកូរ៉ូណាវីរុសឡើងដល់ ២១៣នាក់

អភិបាលក្រុងវូហាន សារភាពថា អសមត្ថភាពគ្រប់គ្រងវិបត្តិកូរ៉ូណាវីរុស

ចិន បិទច្រកចេញចូលទាំងអស់នៃក្រុងវូហាន ដែលជាសម្បុកជំងឺរលាកសួតថ្មី

បើតាមការចុះផ្សាយរបស់ទីភ្នាក់ងារព័ត៌មាន AFP ដែលដកស្រង់សម្តីលោក Ma អំឡុងកិច្ចសម្ភាសជាមួយប្រព័ន្ធផ្សព្វផ្សាយរដ្ឋចិន CCTV មន្ត្រីជាន់ខ្ពស់រូបនេះ បានអះអាងថា ចំណាត់ការរាតត្បាតនេះ គប្បីត្រូវបានធ្វើឡើងយ៉ាងហោចណាស់ ១០ ថ្ងៃមុននេះ។ ត្រង់នេះ លោក លើកឡើងបែបនេះថាលោកគិតថា ប្រសិនបើអាជ្ញាធរក្រុងវូហាន បានចាត់វិធានការបែបនេះឲ្យទាន់ពេលវេលានោះ ការរីករាលដាលនៃជំងឺនេះ ប្រហែលមិនអាក្រក់ដល់ថ្នាក់នេះហើយ។

គិតមកត្រឹមព្រឹកថ្ងៃសៅរ៍ ទី០១ កុម្ភៈ អ្នកស្លាប់ព្រោះជំងឺរលាកសួតបង្កឡើងដោយមេរោគកូរ៉ូណាប្រភេទថ្មី (2019-nCov) ឡើងដល់ ២៥៩នាក់ ហើយអ្នជំងឺទូទាំងពិភពលោកឡើងដល់ជាង១១០០០នាក់ផងដែរ។ វីរុសនេះ បានរាលដាលដល់ជាង២០ប្រទេសហើយ ទាំងអាស៊ី អឺរ៉ុប និងមជ្ឈិមបូព៌ាផងដែរ។

ក្រៅពីចិន និងរដ្ឋបាលពិសេសហុងកុង ម៉ាកាវ និងតៃវ៉ាន់ ប្រទេស២៣ផ្សេងទៀតដែលមានអ្នកជំងឺកូរ៉ូណាវីរុសរួមមាន ថៃ ជប៉ុន សិង្ហបុរី កូរ៉េខាងត្បូង អូស្ត្រាលី ម៉ាឡេស៊ី បារាំង សហរដ្ឋអាមេរិក អាល្លឺម៉ង់ វៀតណាម អេមីរ៉ាតអារ៉ាប់រួម កាណាដា អ៊ីតាលី រុស្ស៊ី ចក្រភពអង់គ្លេស កម្ពុជា ហ្វាំងឡង់ ឥណ្ឌា ណេប៉ាល់ ហ្វីលីពីន ស្រីលង្កា ស៊ុយអែត និងអេស្ប៉ាញ៕