ចាប់ពីខែកុម្ភៈនេះទៅ ពលរដ្ឋត្រូវបង់ថ្លៃសំរាមតាមភ្នាក់ងារទូទាត់ផ្សេងៗ

ជាតិ

សង្គមជាតិ

ចាប់ពីខែកុម្ភៈនេះទៅ ពលរដ្ឋត្រូវបង់ថ្លៃសំរាមតាមភ្នាក់ងារទូទាត់ផ្សេងៗ

01, Feb 2020 , 2:31 pm

រូបភាព

លោក ហួត ហៃ អភិបាលរងរាជធានីភ្នំពេញ រួមជាមួយនឹងបណ្តាធនាគារ បណ្តាភ្នាក់ងារវេរលុយផ្សេងៗ កំពុងមានវត្ថមាននៅក្នងសិន្និសីទសារព័ត៌មានជុំវិញការប្រមូលសំរាម និងការប្រមូលថ្លៃសំរាម

ដោយ:

ភ្នំពេញ៖ ចាប់ពីខែកុម្ភៈ ឆ្នាំ២០២០នេះ រដ្ឋបាលរាជធានីភ្នំពេញ នឹងអនុវត្តនូវការទូទាត់បង់ថ្លៃសេវាសំរាមប្រចាំខែ តាមរយៈប្រព័ន្ធអេឡិចត្រូនិក បញ្ជរទូទាត់នៅតាមធនាគារ ទីភ្នាក់ងារវេរលុយផ្សេងៗដែលមាននៅក្នុងកម្មវិធីទូរសព្ទ និងនៅទីសាធារណៈ។ សេវាប្រមូលសំរាមនេះ ពលរដ្ឋត្រូវតែមកបង់ ក្នុងរយៈពេល១៥ថ្ងៃ ចាប់ពីថ្ងៃទី១-១៥ ជារៀងរាល់ខែ។

លោក ហួត ហៃ អភិបាលរងរាជធានីភ្នំពេញ ដែលស្ថិតនៅក្នុងសិន្និសីទសារព័ត៌មានជុំវិញការប្រមូលសំរាម និងការប្រមូលថ្លៃសំរាម កាលពីព្រឹកថ្ងៃទី១ ខែកុម្ភៈ បានបញ្ជាក់ថា សាលារាជធានីភ្នំពេញ បានសហការជាមួយនឹងអគ្គិសនីកម្ពុជាដោយលែងមានការបង់ថ្លៃសេវាសំរាមតាមវិក្កយបត្របង់ថ្លៃអគ្គិសនីដូចមុនៗហើយ ដោយផ្លាស់ប្ដូរប្រព័ន្ធគ្រប់គ្រង និងនីតិវិធីនៃការបង់ថ្លៃសេវាប្រមូលសំរាម និងសំណល់រឹង ចាប់ពីខែកុម្ភៈតទៅ។ បើតាមលោក ហួត ហៃ អតិថិជន ត្រូវបង់ថ្លៃសេវាប្រមូលសំរាមតាមប្រព័ន្ធអេឡិចត្រូនិក(ទូរស័ព្ទដៃ) ឬបញ្ជរទូទាត់នៅធនាគារ ឬតាមភ្នាក់ងារវេរលុយវិញ។

លោក ហួត ហៃ ថ្លែងដូច្នេះថា ៖«ចាប់ពីថ្ងៃទី១ ដល់ថ្ងៃទី១៥ ជារៀងរាល់ខែ ដែលនឹងអនុវត្តចាប់ពីខែកុម្ភៈនេះ ពលរដ្ឋត្រូវតែបង់ថ្លៃសំរាមតាមប្រព័ន្ធអេឡិចត្រូនិក តាមធនាគារអេស៊ីលីដា និងតាមភ្នាក់ងារវេរលុយដែលមានដូចជា Wing, True money, Dara Pay, PiPay, EMoney, AMK និងលីហួរវេរលុយ។ ការទូទាត់ថ្លៃបង់សេវានេះ ពលរដ្ឋគ្រាន់តែប្រាប់លេខកូដដែលមាននៅក្នុងវិក្កយបត្របង់ភ្លើង ទៅទីភ្នាក់ងារវេរលុយ។ សម្រាប់បង់ថ្លៃសេវាតាមកម្មវិធីដែលមាននៅក្នុងទូរសព្ទវិញ ពលរដ្ឋអាចបញ្ចូនលេខកូដ និងទឹកប្រាក់ រួចជាការស្រេច»។

បើតាមលោក ហួត ហៃ ក្នុងមួយផ្ទះត្រូវតែបង់ថ្លៃសេវាប្រមូលសំរាមចំនួន១ដុល្លារក្នុងមួយខែ។ សម្រាប់អ្នកដែលមិនចង់ចំណាយពេលបង់ថ្លៃជារៀងរាល់ខែទេ សាលារាជធានីភ្នំពេញក៏បានផ្តល់សិទ្ធិឲ្យពលរដ្ឋបង់សេវាគិតជាឆ្នាំផងដែរ ដោយត្រូវចំណាយចំនួន១២ដុល្លារក្នុងមួយឆ្នាំ។ «ចំពោះអ្នកដែលមិនបានទៅបង់ថ្លៃសេវាឲ្យទៀងទាត់រាល់ខែកាលពីប៉ុន្មានខែកន្លងទៅទេនោះ ពលរដ្ឋនឹងត្រូវរងវិន័យទៅតាមច្បាប់ និងលិខិតបទដ្ឋានច្បាប់ជាធរមាន។ ប្រសិនបើបង់ថ្លៃហួសថ្ងៃទី១៥ ពលរដ្ឋនឹងជាប់ជាបំណុលសម្រាប់បង់ថ្លៃនៅខែខាងមុខទៀត»។ នេះជាការបញ្ជាក់របស់លោកអភិបាលរងរាជធានីភ្នំពេញ។

រដ្ឋបាលរាជធានីភ្នំពេញ បានបញ្ជាក់ថា រាជរដ្ឋាភិបាលកម្ពុជាបានអនុញ្ញាតឲ្យក្រុមហ៊ុនស៊ិនទ្រី មានសិទ្ធិប្រមូលសំរាមនៅតាមគេហដ្ឋាន ឬតាមស្ថាប័ននានា ប៉ុន្តែមិនមានសិទ្ធិប្រមូលថ្លៃសេវាសំរាមឡើយ។

គូសបញ្ជាក់ថា សំរាមប្រមាណ១ ម៉ឺនតោន ត្រូវបានបង្កើតឡើងក្នុងមួយថ្ងៃៗនៅកម្ពុជា ក្នុងនោះសំរាមជាង ២០ ភាគរយជាថង់ប្លាស្ទិក ឬស្មើនឹងប្រមាណ ២,០០០តោន៕