ជាតិ
វីដេអូ
សុខភាព
វេជ្ជបណ្ឌិតរោគស្ត្រី៖ ក្មេងស្រីចាំបាច់ត្រូវចាក់វ៉ាក់សាំងការពារ«មហារីកមាត់ស្បូន» នៅចន្លោះអាយុ៩-១៤ឆ្នាំ
× ភ្នំពេញ៖ ជំងឺមហារីកមាត់ស្បូនជាជំងឺបង្កដោយមេរោគឈ្មោះ Human Papillomavirus (HPV) ដែលឆ្លងតាមរយៈការរួមភេទ។ លោកស្រីវេជ្ជបណ្ឌិត ឯកទេសសម្ភព និងរោគស្ដ្រី ឈន ពេជ្រចិន្ដា បានឲ្យដឹងថា ត្បិតជំងឺមហារីកមាត់ស្បូន បានឆក់យកជីវិតស្ដ្រីជាច្រើនក៏ពិតមែន ប៉ុន្តែ ជំងឺនេះក៏អាចបង្ការបាន ដោយការចាក់វ៉ាក់សាំងការពារ និងតាមដានរកកោសិកាមហារីកមាត់ស្បូនផងដែរ។ លោកស្រីវេជ្ជបណ្ឌិត បញ្ជាក់ថា ការចាក់វ៉ាក់សាំងការពារជំងឺមហារីកមាត់ស្បូនដែលមានប្រសិទ្ធភាពខ្ពស់ គឺសម្រាប់ក្មេងស្រីដែលមានអាយុចន្លោះពី៩-១៤ឆ្នាំ និងស្ត្រីដែលមិនទាន់ឆ្លងកាត់ការរួមភេទ។ ចំណែកឯ ស្ត្រីដែលមានដៃគូរួមភេទ ឬធ្លាប់ឆ្លងកាត់ការរួមភេទ ត្រូវពិនិត្យរកកោសិកាមហារីកជាមុនសិន ទើបអាចចាក់ថ្នាំបង្ការមហារីកមាត់ស្បូនបាន។
ដើម្បីជ្រាបច្បាស់ សូមអញ្ជើញលោកអ្នកនាងទស្សនាបទសម្ភាសរវាងកញ្ញា អ៊ុត រស្មី ជាមួយ លោកស្រីវេជ្ជបណ្ឌិត ឈន ពេជ្រចិន្ដា ឯកទេសសម្ភព និងរោគស្ដ្រីនៃមន្ទីរពេទ្យអឃីតកោះពេជ្រ ដូចតទៅ៖
លោកស្រីវេជ្ជបណ្ឌិត ឯកទេសសម្ភព និងរោគស្ត្រី ឈន ពេជ្រចិន្តា បានរៀបរាប់ដូច្នេះថា៖«ក្មេងស្រីអាយុពី៩-១៤ឆ្នាំ ឬស្ត្រីមិនទាន់ឆ្លងកាត់ការរួមភេទ ការចាក់វ៉ាក់សាំងបង្ការមហារីកមាត់ស្បូនអាចមានប្រសិទ្ធភាពរហូតដល់ច្រើនជាង៩៥%។ ប៉ុន្តែ ប្រសិនបើជា ស្ដ្រីធ្លាប់ឆ្លងកាត់ការរួមភេទ ហើយពួកគាត់ចង់ចាក់វ៉ាក់សាំងការពារ ត្រូវតែរកមើលកោសិកាមហារីកមាត់ស្បូន និងមេរោគ HPV ជាមុនសិន។ បើមិនមានការឆ្លងមេរោគទេ ពួកគាត់អាចទទួលការចាក់វ៉ាក់សាំងបង្ការបាន គ្រាន់តែប្រសិទ្ធភាពបង្ការចុះសល់ត្រឹម៨០ភាគរយ»។
លោកស្ត្រីវេជ្ជបណ្ឌិត ឯកទេសរោគស្ដ្រី រូបនេះ បានពន្យល់បន្ថែមថា ស្ដ្រីដែលកំពុងមានដៃគូរួមភេទចាប់ពី១ឆ្នាំឡើងទៅ ចាំបាច់ត្រូវពិនិត្យរកមើលកោសិកាមហារីកមាត់ស្បូនឲ្យបានទៀងទាត់រាល់១ឆ្នាំម្ដង ឬ៣ឆ្នាំម្ដង។ ព្រោះនៅពេលមេរោគ HPV ឆ្លងចូលក្នុងខ្លួនស្ត្រី រយៈពេល១ឆ្នាំដំបូងអាចពិនិត្យមិនឃើញ តែអាចរកឃើញនៅឆ្នាំបន្ទាប់ៗ។ បើសិនជា ពួកគាត់មិនបានធ្វើការស្រាវជ្រាវ ព្យាបាលទាន់ពេលនោះទេ វានឹងវិវឌ្ឍន៍ចេញជាជំងឺមហារីកមាត់ស្បូន៕
Tag:
វ៉ាក់សាំង
ក្មេងស្រី
មហារីកមាត់ស្បូន
សុខភាព
© រក្សាសិទ្ធិដោយ thmeythmey.com