កីឡាជាតិ
ជាតិ
ពានរង្វាន់សម្តេច ហ៊ុន សែន ថ្នាក់ខេត្តឆ្នាំនេះ មានក្រុមចូលរួមប្រកួតតិចជាងឆ្នាំមុន
× ការប្រកួតបាល់ទាត់ដណ្តើមពានរង្វាន់សម្តេច ហ៊ុន សែន ថ្នាក់ខេត្តឆ្នាំនេះ មានក្រុមចូលរួមថយចុះរហូត៦ក្រុមបើធៀបនឹងឆ្នាំមុន។ ការថយចុះនេះ អាចបណ្តាលមកពីក្រុមមួយចំនួនពុំមានលក្ខណៈសម្បត្តិគ្រប់គ្រាន់ក្នុងការចូលរួម ជាពិសេសពាក់ព័ន្ធទីលាន។ ការប្រកួតវគ្គជម្រុះទាំង៥ពូលនឹងប្រព្រឹត្តទៅចន្លោះពីថ្ងៃទី៤ ខែកុម្ភៈ ដល់ថ្ងៃទី១១ ខែមីនា ឆ្នាំ២០២០។
ពានរង្វាន់សម្តេច ហ៊ុន សែន ថ្នាក់ខេត្តឆ្នាំនេះមានក្រុមចូលរួមតែ១៧ក្រុមប៉ុណ្ណោះ ដោយមានការថយចុះចំនួន៦ក្រុមបើធៀបនឹងឆ្នាំមុនមានរហូត២៣ក្រុម។ ការថយចុះគួរឲ្យកត់សម្គាល់នេះ អាចបណ្តាលមកពីបញ្ហាបទដ្ឋានបច្ចេកទេស ព្រោះក្រុមមួយចំនួនពុំមានទីលាន ដែលមានលក្ខណៈគ្រប់គ្រាន់ក្នុងការរៀបចំការប្រកួត។ មួយវិញទៀត ដោយសារក្រុមខ្លះរៀបចំសំណុំបែបបទ និងទីលានមិនទាន់រួចរាល់។
ការប្រកួតធ្វើឡើងជាពីរជើងដោយបែងចែកជា៥ពូលក្នុងនោះពូល A មានពោធិ៍សាត់, បាត់ដំបង, បន្ទាយមានជ័យ និងកំពង់ឆ្នាំង, ពូល B កំពង់ធំ, ព្រះវិហារ និងសៀមរាប, ពូល C រតនៈគិរី, ត្បូងឃ្មុំ និងព្រៃវែង, ពូល D កណ្ដាល, តាកែវ និងកំពង់ស្ពឺ និង Fព្រះសីហនុ, កោះកុង, កំពត និងកែប។
ការប្រកួតវគ្គជម្រុះទាំង៥ពូលនឹងប្រព្រឹត្តទៅចាប់ពីថ្ងៃទី៤ កុម្ភៈ ដល់ថ្ងៃទី១១ មីនា ឆ្នាំ២០២០។ ក្រុមទទួលបានលេខ១ក្នុងពូលនីមួយៗ និងក្រុមលេខ២ល្អចំនួន៣ នឹងឡើងទៅប្រកួតនៅវគ្គ៨ក្រុមចុងក្រោយ ដែលប្រព្រឹត្តទៅចាប់ពីថ្ងៃទី៧ មេសា ដល់ថ្ងៃទី២០ ឧសភា ឆ្នាំ២០២០។ តាមគម្រោងក្រុមទទួលបានចំណាត់ថ្នាក់ពីលេខ១ដល់លេខ៣ក្នុងការប្រកួតថ្នាក់ខេត្តនឹងទទួលបានកៅអីឡើងទៅប្រកួតថ្នាក់ជាតិ ដែលមានក្រុមទាំង១៣នៃសមាជិកលីគកំពូលកំពុងរង់ចាំ៕
Tag:
បាល់ទាត់
Hun Sen Cup
© រក្សាសិទ្ធិដោយ thmeythmey.com