មជ្ឈមណ្ឌលឯកសារកម្ពុជានឹងរៀបចំពិព័រណ៍រូបថត ដើម្បីបញ្ជ្រាបផ្នែកប្រវត្តិសាស្ត្រដល់ពលរដ្ឋ

ជាតិ

បទយកការណ៍ / បទសម្ភាសន៍

មជ្ឈមណ្ឌលឯកសារកម្ពុជានឹងរៀបចំពិព័រណ៍រូបថត ដើម្បីបញ្ជ្រាបផ្នែកប្រវត្តិសាស្ត្រដល់ពលរដ្ឋ

02, Feb 2020 , 5:39 pm

រូបភាព

លោក លី សុខឃាង (រូបក្នុងរង្វង់)រួមជាមួយឡាន គុក និងរូបថតនៅផ្ទះតាម៉ុងក្នុងស្រុកអន្លង់វែង

ដោយ:

មជ្ឈមណ្ឌលឯកសារកម្ពុជានឹងរៀបចំពិព័រណ៍រូបថត ដែលបង្ហាញពីសកម្មភាពប្រវត្តិសាស្ត្រនានានៃសហគមន៍អន្លង់វែង ដែលជាទីតាំងចុងក្រោយនៃរបបខ្មែរក្រហម។ រូបថតប្រមាណ១០០សន្លឹក ដែលគ្រោងដាក់តាំងបង្ហាញជូនភ្ញៀវទេសចរជាតិនិងអន្តរជាតិនេះ គឺរៀបរាប់ពីសកម្មភាពចន្លោះឆ្នាំ១៩៧០-១៩៩៨។ ការតាំងបង្ហាញរូបថតនេះ គឺដើម្បីជំរុញការចងចាំ និងបង្កើនការយល់ដឹងផ្នែកប្រវត្តិសាស្ត្រដល់សិស្សនិស្សិតជាតិនិងអន្តរជាតិ។

លោក លី សុខឃាង នាយកមជ្ឈមណ្ឌលសន្តិភាពអង្លង់វែងនៃមជ្ឈមណ្ឌលឯកសារកម្ពុជាបានបញ្ជាក់ថា មជ្ឈមណ្ឌលឯកសារកម្ពុជានឹងរៀបចំពិព័រណ៍រូបថតប្រវត្តិសាស្ត្រចន្លោះពីថ្ងៃទី៧-៩ ខែកុម្ភៈ ឆ្នាំ២០២០ នៅស្រុកអន្លង់វែងខេត្តឧត្តរមានជ័យ។ កម្មវិធីនេះធ្វើឡើងក្នុងព្រឹត្តិការណ៍ថ្មើរជើងទៅកាន់តំបន់ប្រវត្តិសាស្ត្រចុងក្រោយនៃរបបខ្មែរក្រហមលើកទី២ ដែលរៀបចំដោយក្រសួងទេសចរណ៍សហការជាមួយគណៈកម្មាធិការជាតិអូឡាំពិកកម្ពុជា និងរដ្ឋបាលស្រុកអន្លង់វែង។

កិច្ចសម្ភាសរវាងលោក សឿន វណ្ណឌេត អ្នកយកព័ត៌មានរបស់សារព័ត៌មានថ្មីៗជាមួយលោក លី សុខឃាង នាយកមជ្ឈមណ្ឌលសន្តិភាពអន្លង់វែងនៃមជ្ឈមណ្ឌលឯកសារកម្ពុជា៖

គោលបំណងនៃការរៀបចំពិព័រណ៍រូបថតនេះ គឺដើម្បីជំរុញនិងបង្កើនការចងចាំ ក៏ដូចជាផ្សព្វផ្សាយនិងលើកកម្ពស់ការយល់ដឹងពីប្រវត្តិសាស្ត្រនៃសហគមន៍អន្លង់វែង ដែលជាទីតាំងចុងក្រោយនៃរបបខ្មែរក្រហម ដល់ភ្ញៀវទេសចរជាតិនិងអន្តរជាតិ។ ជាពិសេសសិស្សនិស្សិត ដែលសិក្សាលើជំនាញប្រវត្តិសាស្ត្រនិងស្រាវជ្រាវ ឲ្យយល់ដឹងកាន់តែច្បាស់ តាមរយៈការពន្យល់យ៉ាងក្បោះក្បាយពីអ្នកជំនាញ ដែលប្រចាំការនៅទីនោះ។

បើតាមលោក លី សុខឃាង រូបថតប្រមាណ១០០សន្លឹកដែលនឹងដាក់តាំងបង្ហាញនោះ គឺបង្ហាញពីសកម្មភាព ប្រវត្តិសាស្ត្រនៃរបបខ្មែរក្រហមចន្លោះពីឆ្នាំ១៩៧០-១៩៩៨ ហើយរូបថតភាគច្រើនបង្ហាញពីភាពវិជ្ជមាន។ «ពិព័រណ៍រូបថតយើងផ្តោតលើតែពាក្យពីរម៉ាត់ទេ គឺជំរុញឲ្យមានការចងចាំនិងការអប់រំ។ ពិព័រណ៍នេះ មិនមានការចោទប្រកាន់ ឬលាបពណ៌អាក្រក់ល្អអ្វីនោះទេ គឺយើងបង្ហាញពីការចងចាំប្រវត្តិសាស្ត្ររួមគ្នា ដែលបង្កើតឲ្យមានការពិពណ៌នាប្រវត្តិសាស្ត្រដូចៗគ្នា កុំឲ្យមានការបែកបាក់សង្គមយើងតទៅទៀត»។

ផ្ទះទី១, ទី២, ទី៣ និងទី៤របស់តាម៉ុកនៅក្នុងបរិវេណបឹងតាម៉ុកក្នុងស្រុកអន្លង់វែង

លោកបានបន្ថែមថា៖«ពិព័រណ៍នឹងគឺមិនមានបង្ហាញរូបភាពហិង្សានោះទេ ភាគច្រើនបង្ហាញពីភាពជាមនុស្សរបស់ប្រជាជនកម្ពុជា ទោះបីអ្នកនឹងធ្លាប់បម្រើការឬមិនធ្លាប់ជាជនរងគ្រោះនៃរបបនេះក៏ដោយ ព្រោះក្នុងវប្បធម៌យើង គឺមានការអត់ឱននិងអធ្យាស្រ័យ និងធ្វើដំណើររួមគ្នាទៅមុខ»។

ពិព័រណ៍រូបថតនេះ ក៏ជាផ្នែកមួយជួយកែប្រែគំនិតអតីតសមាជិកនៃចលនាខ្មែរក្រហម និងជួយព្យាបាលរបួសផ្លូវចិត្ត ដែលបន្សល់ទុកពីរបបខ្មែរក្រហម។ បើតាមលោក លី សុខឃាង បច្ចុប្បន្នមានអតីតសមាជិកនៃចលនាខ្មែរក្រហមពី៧០ទៅ៨០ភាគរយកំពុងរស់នៅក្នុងស្រុកអន្លង់វែង។

«យើងប្រើរូបថតដើម្បីផ្សព្វផ្សាយពីប្រវត្តិសាស្ត្រ និងជាពិធីមួយក្នុងការទំនាក់ទំនងជាមួយមនុស្សដែលមកស្រុកអន្លង់វែង។ ក្នុងឱកាសនោះដែរធ្វើឲ្យប្រជាជនក្នុងស្រុកអន្លង់វែង ដែលប្រមាណ៧០ទៅ៨០ភាគរយជាអតីតសមាជិកនៃចលនារបបខ្មែរក្រហមនឹង ឲ្យគាត់មានអារម្មណ៍ថាបានចួលរួបរួមក្នុងសង្គមឡើងវិញដោយស្មើមុខស្មើមាត់ជាមួយគេឯង និងមិននៅឯកោដូចមុននោះទេ»។ នេះជាការលើកឡើងរបស់លោក លី សុខឃាង ដែលបានបន្ថែមថា ពិព័រណ៍នេះ ក៏ជាឱកាសសម្រាប់សិស្សនិស្សិតក្នុងការសិក្សាស្រាវជ្រាវពីប្រវត្តិសាស្ត្រនៃសហគមន៍អន្លង់វែងផងដែរ។

នាយកមជ្ឈមណ្ឌលសន្តិភាពអង្លង់វែង នៃមជ្ឈមណ្ឌលឯកសារកម្ពុជារូបនេះរំពឹងថា តាមរយៈពិព័រណ៍រូបថតនេះនឹងជួយឲ្យប្រជាជនមានការយល់ដឹងផ្នែកប្រវត្តិសាស្ត្រកាន់តែប្រសើរ ជាពិសេសជួយផ្សព្វផ្សាយពីតំបន់ទេសចរណ៍ និងទាក់ទាញភ្ញៀវទេសចរឲ្យមកកម្សាន្តកាន់តែច្រើន។ លើសពីនេះ វានឹងជួយទាក់ទាញវិយោគិនឲ្យមកបោះទុករកស៊ីនៅតំបន់នោះកាន់តែច្រើន៕