ជាតិ
អ្នកភូមិកំពង់ឃ្លាំងផលិតត្រីឆ្អើររាប់ពាន់ចង្កាក់ក្នុងមួយថ្ងៃៗផ្គត់ផ្គង់ទីផ្សារ
×![]()
សៀមរាប៖ ឃុំកំពង់ឃ្លាំង មានភូមិសាស្ដ្រជាប់បឹងទន្លេសាប និងមានប្រជាជនរស់នៅច្រើនជាងគេបើធៀបនឹងតំបន់ផ្សេងៗ ដូចជាកំពង់ភ្លក់ជាដើម។ អ្នកភូមិនេះមានរបរនេសាទជាចម្បង ក្រៅពីនោះធ្វើកសិកម្ម និងខែប្រាំងមានរបរឆ្អើរត្រី។ អ្នកភូមិនេះច្រើនគ្រួសារ មានរបរជាអ្នកត្រីឆ្អើរ និងមានបរិមាណច្រើនពាន់ចង្វាក់ក្នុងមួយថ្ងៃៗសម្រាប់ផ្គត់ផ្គង់ទីផ្សារ។
អ្នកស្រី ចក់ ខន ដែលកំពុងអង្គុយប្រែភ្លើងចុះឡើងជិតរោងឆ្អើរត្រីដែលសង់ក្បែរផ្ទះបាននិយាយថា អ្នកស្រីប្រកបរបរនេះជាង១០ឆ្នាំមកហើយ។ ក្នុងមួយថ្ងៃអ្នកស្រីឆ្អើរត្រីចន្លោះពី៥០០ទៅ៦០០គីឡូក្រាមត្រីស្រស់ និងមិនច្បាស់ពីបរិមាណត្រីឆ្អើររួចទេ តែស្មើនឹងជាង៣ពាន់ចង្កាក់។ ត្រីឆ្អើរអ្នកស្រី ចក់ ខន មិនដែលសល់ទេគឺត្រូវបានអតិថិនជាអ្នកបោះដុំប្រមូលយកអស់គ្មានសល់ ហើយត្រីដែលយកមកឆ្អើរមានត្រីកញ្ចុះ និងប្រភេទត្រីស្រកា។ អ្នកស្រី ចក់ ខន បន្ថែម។
ត្រីឆ្អើរអ្នកស្រី ចក់ ខន លក់បានក្នុងមួយគីឡូក្រាម ១៤០០០រៀល ឬស្មើនឹង២៤ចង្កាក់។ ក្នុងមួយថ្ងៃអ្នកស្រីឆ្អើរបានពីរដង គឺពេលថ្ងៃម្ដង និងពេលល្ងាចម្ដង។ ជារបរនឿយហត់មួយ តែវាបានជួយសម្រាលជីវភាពគ្រួសារអ្នកស្រី ចក់ ខន បានមួយផ្នែកធំ។ ក្នុងរបរនេះ អ្នកស្រី ចក់ ខន ក៏បានរួមចំណែកជួយផ្តល់ការងារដល់អ្នកភូមិឯទៀតដែលស៊ីឈ្នួលដោតត្រីសម្រាប់ឆ្អើរផងដែរ៕
Tag:
ត្រីឆ្អើរ
កំពង់ឃ្លាំង
© រក្សាសិទ្ធិដោយ thmeythmey.com
