បារាំង៖ ពលរដ្ឋអឺរ៉ុប២០នាក់ ចេញរោគសញ្ញាកូរ៉ូណាវីរុស បន្ទាប់ពីជម្លៀសចេញពីក្រុងវូហាន

អន្តរជាតិ

បារាំង៖ ពលរដ្ឋអឺរ៉ុប២០នាក់ ចេញរោគសញ្ញាកូរ៉ូណាវីរុស បន្ទាប់ពីជម្លៀសចេញពីក្រុងវូហាន

03, Feb 2020 , 10:30 am

រូបភាព

រដ្ឋមន្រ្តីសុខាភិបាលបារាំង លោកស្រី Agnes Buzyn(AFP)

ដោយ: ធៀន ភារិន្ទ

ជនជាតិអឺរ៉ុបប្រមាណជា ២០នាក់ចេញរោគសញ្ញា នៃជំងឺរលាកសួត ដែលបានបណ្តាលមកពីកូរ៉ូណាវីរុស បន្ទាប់ពីជម្លៀសចេញពីក្រុងវូហាន ប្រទេសចិន។ ពួកគេ ស្ថិតក្នុងចំណោមមនុស្សជាង ២៥០នាក់ ដែលបានមកដល់អាកាសយានដ្ឋាន Istres នៃភាគខាងត្បូងបារាំង នាថ្ងៃទី២ ខែកុម្ភៈ។ នេះជាការជម្លៀសមនុស្សលើកទីពីរចេញពីទឹកដីចិនដោយបារាំង។

តាមការអះអាងរបស់រដ្ឋមន្ត្រីសុខភិបាលបារាំង លោកស្រី Agnès Buzyn មនុស្ស ២០នាក់ ដែលបានជម្លៀសចេញពីក្រុងវូហាន បានចេញរោគសញ្ញារលាកសួត ដែលបង្កមកពីកូរ៉ូណាវីរុស ហើយមនុស្សទាំង ២០នាក់នេះ គឺមានទាំងជនជាតិបារាំង និងជនជាតិអឺរ៉ុបផ្សេងទៀត។ បើតាមការបញ្ជាក់របស់លោកស្រីរដ្ឋមន្ត្រី ក្រុមគ្រូពេទ្យទាហាន គឺជាអ្នកដឹកនាំការធ្វើរោគវិនិច្ឆ័យលើជនជម្លៀសទាំង ២០នាក់ទាំងនេះ ហើយលទ្ធផលនឹងដឹងនៅថ្ងៃទី៩ ខែកុម្ភៈ។

សម្រាប់ការជម្លៀសមនុស្សចេញពីក្រុងវូហានលើកទីពីរនេះ គឺមានជនជាតិបារាំង ត្រឹមតែ៦៥នាក់ប៉ុណ្ណោះ ក្នុងចំណោមមនុស្ស ២៥០នាក់ ហើយអ្នកផ្សេងទៀត គឺជាជនជាតិអឺរ៉ុប។ រដ្ឋមន្ត្រីការបរទេសបារាំង Jean-Yves Le Drian ប្រាប់ប្រព័ន្ធផ្សព្វផ្សាយ RTL ថា មនុស្សមួយចំនួន នឹងត្រូវគេដាក់នៅកន្លែងដោយឡែកមួយរយៈពេល ១៤ថ្ងៃសិន ក្នុងគោលបំណងទទួលការពិនិត្យ និងធ្វើរោគវិនិច្ឆ័យ ដើម្បីធានាថា ជនទាំងនោះ គ្មានផ្ទុកកូរ៉ូណាវីរុស។ ចំណែកអ្នកគ្មានរោគសញ្ញាអ្វី នឹងត្រូវអនុញ្ញាតឲ្យត្រលប់ទៅផ្ទះវិញ។

កាលពីជម្លៀសលើកទីមួយ ដែលបានមកដល់បារាំងនៅថ្ងៃទី៣១ ខែមករា គេបានរកឃើញជនសង្ស័យពីរនាក់ថាមានផ្ទុកកូរ៉ូណាវីរុស ប៉ុន្តែនៅពេលធ្វើរោគវិនិច្ឆ័យ អ្នកទាំងនោះមិនមានផ្ទុកកូរ៉ូណាវីរុសឡើយ។ ពេលនេះ ជនជម្លៀសលើកទីមួយ ត្រូវបានគេដាក់នៅកន្លែងដោយឡែក នាភូមិសម្រាកកម្សាន្តមួយ តាមឆ្នេរសមុទ្រម៉េឌីទែរ៉ាណេ។

សូមបញ្ជាក់ថា គិតមកត្រឹមពេលនេះ បារាំង បានរកឃើញអ្នកផ្ទុកកូរ៉ូណាវីរុសចំនួន ៦ករណីហើយ៕