អន្តរជាតិ
ចំនួនអ្នកស្លាប់ដោយសារកូរ៉ូណាវីរុសនៅចិន កើនលើសអ្នកស្លាប់ដោយសារ SARS ដំណើរការសាងសង់មន្ទីពេទ្យសម្រាប់ព្យាបាលអ្នកជំងឺ មានផ្ទុកកូរ៉ូណាវីរុស ក្នងក្រុងវូហាន។ រូបភាព៖ Getty Images,
× គិតមកត្រឹមថ្ងៃទី៣ ខែកុម្ភៈ ចំនួនអ្នកស្លាប់ដោយសារជំងឺរលាកសួត ដែលបណ្តាលមកពីកូរ៉ូណាវីរុសប្រភេទថ្មី (2019-nCov) បានកើនឡើងរហូតដល់ជាង ៣៦០នាក់ នៅក្នុងប្រទេសចិន។ អត្រាដ៏ច្រើនបែបនេះ បានធ្វើឲ្យអ្នកស្លាប់ដោយសារកូរ៉ូណាវីរុសនៅលើចិនដីគោក មានចំនួនច្រើនជាងអ្នកស្លាប់ដោយសារជំងឺ SARS ដែលបានផ្ទុះឡើងកាលពីឆ្នាំ ២០០២ ដល់ឆ្នាំ ២០០៣ ទៅទៀត។
កូរ៉ូណាវីរុស គឺជាវីរុសប្រភេទថ្មី ដែលត្រូវគេរកឃើញនៅចុងខែធ្នូ ឆ្នាំ ២០១៩ បានរាតត្បាតនៅចិនយ៉ាងខ្លាំង។ ក្នុងករណីរីករាលដាលនេះ គ្រាន់តែនៅចិន កូរ៉ូណាវីរុសមានអ្នកឆ្លងជាង ១៧០០០ពាន់ករណី អ្នកជាសះស្បើយជាង ៤៨០នាក់ និងអ្នកស្លាប់បានកើនដល់ចំនួនជាង៣៦០នាក់។
ទាក់ទងទៅនឹងបញ្ហានេះ អត្រាអ្នកស្លាប់ដោយសារកូរ៉ូណាវីរុសនៅចិនដីគោក បានកើនលើសពីចំនួនអ្នកស្លាប់ដោយសារជំងឺ SARS ដែលបានកើតឡើងនៅចិន កាលពីឆ្នាំ ២០០២ដល់ ២០០៣ ទៅទៀត។ បើតាមការចុះផ្សាយរបស់ទីភ្នាក់ងារព័ត៌មាន AFP ចំនួនអ្នកស្លាប់ដោយសារជំងឺ SARS គឺមានត្រឹមតែ ៣៤៩នាក់ប៉ុណ្ណោះនៅចិនដីគោក ខណៈពេលកូរ៉ូណាវីរុសមានដល់ ៣៦២ករណី។
ជាការពិត កាលពីឆ្នាំ២០០២ ដល់២០០៣ ជំងឺSARS បានបណ្តាលឲ្យមនុស្សស្លាប់រហូតដល់ ៧៧៤នាក់ ប៉ុន្តែភាគច្រើននៃអ្នកទទួលមរណភាព គឺជាអ្នករស់នៅលើទឹកដីហុងកុងតែប៉ុណ្ណោះ។
ក្រៅពីនេះ ករណីឆ្លងកូរ៉ូណាវីរុស ក៏បានកើនលើសជំងឺSARS ផងដែរ ពោលគឺលើសជាច្រើនករណី។ បើតាមគណៈកម្មាការសុខភាពរបស់ចិននាថ្ងៃទី២៩ ខែមករា ជំងឺSARSមានករណីឆ្លងនៅចិនដីគោកត្រឹមតែ ៥៣២៧ករណីប៉ុណ្ណោះ ដោយឡែកសម្រាប់កូរ៉ូណាវីរុសវិញ ករណីឆ្លងបានកើនឡើងរហូតដល់ ជាង១៧០០០ពាន់ករណី គិតត្រឹមថ្ងៃទី៣ ខែកុម្ភៈ។
សូមបញ្ជាក់ថា កូរ៉ូណាវីរុស ដែលបានផ្ទុះឡើងនៅចិនក្នុងពេលថ្មីៗនេះ មិនត្រឹមតែមាននៅក្នុងប្រទេសចិនប៉ុណ្ណោះទេ ប៉ុន្តែវាបានរាតត្បាតដល់ប្រទេសជាង២០ ដែលការណ៍នេះបានបង្កឲ្យមានការព្រួយបារម្ភជាខ្លាំងចាប់តាំងពីប្រជាជន ដល់រដ្ឋាភិបាល រហូតដល់អង្គការសុខភាពពិភពលោកជាដើម។ ដើម្បីទប់ស្កាត់បញ្ហានេះ រដ្ឋាភិបាលទីក្រុងប៉េកាំង ដាក់ចេញវិធានការជាបន្តបន្ទាប់ដូចជាការការកសាងមន្ទីពេទ្យក្នុងរយៈពេលខ្លី ការបិទក្រុង និងផ្អាកមធ្យោបាយដឹកជញ្ជូនជាដើម៕
Tag:
ចិន
កូរ៉ូណាវីរុស
© រក្សាសិទ្ធិដោយ thmeythmey.com