អន្តរជាតិ
ប្រមុខអាស៊ាន ថ្លែងពីតួនាទីអាស៊ានជាលើកដំបូងទៅកាន់ក្រុមប្រឹក្សាសន្តិសុខអង្គការសហប្រជាជាតិ អគ្គលេខាធិការអាស៊ាន Lim Jock Hoi ។ រូបភាពពីស្ថានបេសកកម្មឥណ្ឌូណេស៊ីប្រចាំអង្គការសហប្រជាជាតិ
× អគ្គលេខាធិការអាស៊ាន លោក Lim Jock Hoi នៅថ្ងៃទី៣០ ខែមករាកន្លងទៅ បានថ្លែងសារសង្ខេបមួយស្តីពីតួនាទី និងការវិវត្តរបស់អាស៊ានជាលើកដំបូងទៅកាន់សមាជិកក្រុមប្រឹក្សាសន្តិសុខអង្គការសហប្រជាជាតិ។ លោកអគ្គលេខាធិការ បានគូសបញ្ជាក់ពីការចូលរួមរបស់អាស៊ានក្នុងការដោះស្រាយបញ្ហាដែលក្តីបារម្ភក្នុងតំបន់ និងពិភពលោក ជាពិសេសលើការថែរក្សាសន្តិសុខ និងសន្តិភាពតែម្តង។
ដោយមានអមជាមួយនឹងសមាជិកអាស៊ាន គឺឥណ្ឌូណេស៊ី និងវៀតណាម ដែលកំពុងតែអង្គុយកៅសមាជិកមិនអចិន្ត្រៃយ៍ក្រុមប្រឹក្សាសន្តិសុខផងនោះ លោកអគ្គលេខាធិការ Lim Jock Hoi បានបង្ហាញឲ្យក្រុមប្រឹក្សាសន្តិសុខ ដែលជាអង្គភាពមានឥទ្ធិពលរបស់ពិភពលោកបានដឹងពីការចូលរួមរបស់អាស៊ានក្នុងកិច្ចការសន្តិសុខ សន្តិភាព និងវិបុលភាពនៅតំបន់អាស៊ីអាគ្នេយ៍ ក៏ដូចជាកិច្ចសហប្រតិបត្តិការល្អជាមួយភាគីខាងក្រៅរួមទាំងអង្គការសហប្រជាជាតិផង។ នេះបើយោងតាមការចុះផ្សាយរបស់ Jakarta Post។
តាមប្រភពព័ត៌មានដដែល លោកអគ្គលេខាធិការ បានអះអាងថា គិតចាប់តាំងអាស៊ានបង្កើតឡើងជាផ្លូវការនៅឆ្នាំ១៩៦៧មក អាស៊ាន បានបំពេញការងារជាអង្គភាពមួយជាមួយការកសាងទំនុកចិត្ត សម្រាប់តំបន់ដែលមានប្រព័ន្ធខុសគ្នាទាំងនយោបាយ សេដ្ឋកិច្ច និងសង្គម។ ការណ៍ ដែលចេះសម្របសម្រួលខ្លួនដើម្បីអង្គភាពតែមួយនេះហើយ ដែលធ្វើឲ្យលោក Lim ហ៊ានអះអាងថា អាស៊ាន អាចធ្វើការបំពេញបន្ថែមគ្នាបានជាមួយនឹងអង្គការសហប្រជាជាតិបាន។
ប្រមុខអាស៊ានរូបនេះ ក៏បានលើកឡើងពីលក្ខណៈពិសេសមួយរបស់អាស៊ាន គឺការចេះយោគយល់គ្នា តាមរយៈការប្រកាន់ខ្ជាប់ មាគ៌ាអាស៊ាន។ មាគ៌ាអាស៊ាននោះគឺ អាស៊ានជ្រើសរើសយកការពិគ្រោះគ្នាលើបញ្ហា ជាជាងការបន្ទោស និងថ្កោលទោសគ្នា។ លោក សង្កត់ធ្ងន់យ៉ាងដូច្នេះ៖ អាស៊ាន មានជំនឿមួយថា បើមានជម្លោះ គ្មាននរណាមួយចំណេញនោះទេ។
អ្វីដែលគួរឲ្យកត់សម្គាល់បន្តិចផងនោះ ការបង្ហាញវត្តមានរបស់អគ្គលេខាធិការអាស៊ាននៅក្រុមប្រឹក្សាសន្តិសុខ គឺចំពេលដែលសមាជិកអាស៊ានរហូតពីរ គឺឥណ្ឌូណេស៊ី និងវៀតណាម កំពុងតែកាន់តំណែងជាសមាជិកមិនអចិន្ត្រៃយ៍ក្រុមប្រឹក្សាសន្តិសុខ។ ហើយនេះ ក៏មិនមែនជារឿងចៃដន្យដែរ ព្រោះថា វា ក៏ជាឱកាសដ៏សំខាន់សម្រាប់អគ្គលេខាធិការអាស៊ាន ដើម្បីថ្លែងការពារពីជំហររបស់អង្គភាព ក៏ដូចជាសមាជិករបស់ខ្លួនមួយចំនួនផង ដែលកំពុងតែទទួលរងសម្ពាធខ្លាំងពីសហគមន៍អន្តរជាតិរឿងបញ្ហាសិទ្ធិមនុស្ស។
បច្ចុប្បន្ន សមាជិកអាស៊ានពីរប្រទេសគឺ ហ្វីលីពីន និងមីយ៉ាន់ម៉ា កំពុងស្ថិតក្រោមការវាយតម្លៃ និងអង្កេតពីអង្គការជំនាញសិទ្ធិមនុស្ស និងតុលាការអន្តរជាតិពាក់ព័ន្ធការប្រព្រឹត្តអំពើរំលោភបំពានសិទ្ធិធ្ងន់ធ្ងរ រួមមានការសម្លាប់ជនសង្ស័យគ្រឿងញៀនរាប់ពាន់របស់រដ្ឋាភិបាលហ្វីលីពីន និងការបណ្តេញចេញដោយបង្ខំរបស់ជនជាតិភាគតិចមូស្លីមរ៉ូហ៊ីងយ៉ារាប់សិបម៉ឺននាក់នៅមីយ៉ាន់ម៉ា៕
© រក្សាសិទ្ធិដោយ thmeythmey.com