សង្គមអន្តរជាតិ
អន្តរជាតិ
ចិន អនុញ្ញាតឲ្យអ្នកជំនាញសុខភាពអាមេរិកចូលរួមក្នុងការទប់ស្កាត់កូរ៉ូណាវីរុស រូបភាព Xinhua
× ចិន បានអនុញ្ញាតឲ្យអ្នកជំនាញសុខភាពអាមេរិកចូលរួមក្នុងក្រុមបេសកកម្មរបស់អង្គការសុខភាពពិភពលោក (WHO) ដើម្បីទប់ស្កាត់ការរាលដាល និងគ្រប់គ្រងកូរ៉ូណាវីរុស ដែលសម្លាប់មនុស្សកាន់តែច្រើន ហើយករណីឆ្លងក៏កាន់តែកើនឡើងផងនោះ។ នេះបើតាមការបញ្ជាក់របស់មន្ត្រី WHO នៅថ្ងៃទី៣ ខែកុម្ភៈ។ ក្រុមបេសកកម្មរបស់ WHO នឹងទៅដល់ចិននៅសប្ដាហ៍នេះដើម្បីចូលរួមក្នុងយុទ្ធនាការទប់ស្កាត់ការរាលដាលវីរុសនេះ។
ទោះមានការមិនពេញចិត្តខ្លះនឹងវិធានការតឹងរ៉ឹងបរស់អាមេរិកក្នុងការទប់ស្កាត់ការរាលដាលកូរ៉ូណាវីរុស ចិននៅតែអនុញ្ញាតឲ្យអ្នកជំនាញអាមេរិកមកជួយខ្លួនក្នុងការរកវិធីដោះស្រាយការរាលដាល និងការគ្រប់គ្រងកូរ៉ូណាវីរុស ដែលមកទល់ពេលនេះ មិនមានសញ្ញាថមថយនៃការឆ្លងទេនោះ។ អ្នកនាំពាក្យអង្គការសុខភាពពិភពលោកប្រាប់ទីភ្នាក់ងារព័ត៌មាន Reuters ថា ក្រុមបេសកកម្មរបស់ WHO នឹងទៅដល់ចិននៅឆាប់បំផុតដើម្បីស៊ើបអង្កេតការផ្ទុះវីរុសកូរ៉ូណា។
បេសកកម្មរបស់ WHO នេះ ត្រូវបានឯកភាពអំឡុងជំនួបរបស់អគ្គនាយក WHO លោក Tedros Adhanom Ghebreyesus និងប្រធានាធិបតីចិន ស៊ី ជិនភីង កាលពីសប្ដាហ៍មុន។ បើតាមលោក Ghebreyesus ក្រុមការងារនេះ នឹងសមាសភាពមកពី WHO ផ្ទាល់ និងអ្នកផ្ដល់ប្រឹក្សាមួយចំនួនផងដែរ។
អ្នកនាំពាក្យ WHO ប្រាប់ Reuters នៅថ្ងៃទី៣ ខែកុម្ភៈថា បេសកកម្មអន្តរជាតិ នឹងដឹកនាំដោយ WHO ផ្ទាល់ ហើយមជ្ឈមណ្ឌលគ្រប់គ្រង និងទប់ស្កាត់ជំងឺរបស់អាមេរិក ជាផ្នែកមួយផងដែរ។ បើតាមអ្នកនាំពាក្យដដែល សមាសភាពនៃបេសកកម្មនេះ ក៏រួមបញ្ចូលអ្នកជំនាញផ្នែកជំងឺឆ្លង និងបន្ទប់ពិសោធន៍ ការស្រាវជ្រាវ និងអភិវឌ្ឍ ហើយដែលត្រូវធ្វើការជាមួយភាគចិនក្នុងការឆ្លើយតបសាកលទៅនឹងការរាលដាលកូរ៉ូណាវីរុស។
ចំនួនអ្នកស្លាប់ដោយសារមេរោគរលាកសួតបង្កដោយមេរោគកូរ៉ូណាប្រភេទថ្មី (2019-nCoV) ឡើងដល់៤២៧នាក់បើគិតត្រឹមថ្ងៃអង្គារ ទី៤ ខែកុម្ភៈនេះ ខណៈតុល្យការអ្នកស្លាប់កាលពីម្សិលមិញ គឺ៣៦២នាក់ ក្នុងនោះ១ករណីស្ថិតក្នុងទឹកដីហ្វីលីពីន។ ក្រៅពីករណីនៅហ្វីលីពីន អ្នកស្លាប់ទាំងអស់គឺស្ថិតក្នុងប្រទេសចិន រាប់ទាំងហុងកុងមួយករណីផងដែរ។ អ្នកជំងឺឡើងដល់២ម៉ឺននាក់នាក់ ហើយអ្នកដែលសះស្បើយមានជាង៥៨០នាក់។
ក្រៅពីចិន និងរដ្ឋបាលពិសេសហុងកុង ម៉ាកាវ និងតៃវ៉ាន់ ប្រទេស២៣ផ្សេងទៀតដែលមានអ្នកជំងឺកូរ៉ូណាវីរុសរួមមាន ថៃ ជប៉ុន សិង្ហបុរី កូរ៉េខាងត្បូង អូស្ត្រាលី ម៉ាឡេស៊ី បារាំង សហរដ្ឋអាមេរិក អាល្លឺម៉ង់ វៀតណាម អេមីរ៉ាតអារ៉ាប់រួម កាណាដា អ៊ីតាលី រុស្ស៊ី ចក្រភពអង់គ្លេស កម្ពុជា ហ្វាំងឡង់ ឥណ្ឌា ណេប៉ាល់ ហ្វីលីពីន ស្រីលង្កា ស៊ុយអែត និងអេស្ប៉ាញ។ ប្រទេសជាច្រើន ក៏ចាត់វិធានការផ្សេងៗដើម្បីទប់ស្កាត់ការឆ្លងវីរុសនេះ៕
Tag:
ចិន
អាមេរិក
កូរ៉ូណាវីរុស
© រក្សាសិទ្ធិដោយ thmeythmey.com