កីឡាអន្តរជាតិ
អន្តរជាតិ
មេ Red Bull រំពឹងអាចប្រណាំងនៅទឹកដីចិន ទោះកូរ៉ូណាវីរុសវាយលុកខ្លាំង
× កម្មវិធីប្រណាំងរថយន្ត Formula One នៅលើទីលាន Chinese Grand Prix ដែលប្រព្រឹត្តិទៅក្នុងក្រុងសៀងហៃ ប្រទេសចិន នាថ្ងៃទី១៩ ខែមេសា ឆ្នាំ២០២០ នឹងត្រូវពិភាក្សាឡើងវិញនៅសប្តាហ៍នេះ។ ស្ថាប័ន F1 រំពឹងទុកថាទីលាននេះនៅតែមានក្នុងបញ្ជីប្រណាំងរបស់ខ្លួនរដូវកាលនេះដដែល បើទោះមេរោគកូរ៉ួណាវីរុសកំពុងវាយលុកខ្លាំងក្តី។
ព្រឹត្តិការណ៍ប្រណាំងរថយន្តដ៏ធំកម្រិតពិភពលោក F1 រដូវកាល ២០២០ បានកំណត់ថាទីលាន Chinese Grand Prix ត្រូវដឹកនាំការប្រណាំនៅជុំទី៤ ក្នុងចំណោមការប្រណាំងសរុបទាំង២២លើក។
លោក Christian Horner ប្រធានក្រុម Red Bull Racing បានប្រាប់អ្នកយកព័ត៌មាននៅថ្ងៃទី៣ ខែកុម្ភៈថា ស្ថានការណ៍កំពុងត្រូវបានត្រួតពិនិត្យយ៉ាងយកចិត្តទុកដាក់ជុំវិញបញ្ហាមេរោគកូរ៉ួណាវីរុស ហើយលោកជឿជាក់លើការសម្រេចចិត្តរបស់សហព័ន្ធកីឡាប្រណាំងរថយន្ត (FIA) និងក្រុមហ៊ុន Liberty Media។
«ពួកគេទទួលខុសត្រូវចំពោះសុខភាព និងសុខុមាលភាព មិនត្រឹមតែអ្នកបើកបរនៅ Formula One ប៉ុណ្ណោះទេ ប៉ុន្តែបុគ្គលិក សមាជិកទាំងអស់ក៏ត្រូវបានធានាពីការឆ្លងមេរោគកូរ៉ូណាដែរ។ ខ្ញុំប្រាកដថាពួកគេនឹងប្រឹងប្រែងដោយយកចិត្តទុកដាក់មុនពេលសម្រេចពន្យារពេល ឬក៏លុបចោលការប្រណាំងនោះ។ ដូច្នេះយើងត្រូវតែជឿជាក់លើការវិនិច្ឆ័យនិងចំណេះដឹងរបស់ពួកគេ»។ នេះជាការលើកឡើងរបស់លោក Horner។
ស្របពេលគ្នានេះអ្នកប្រណាំងសញ្ជាតិហូឡង់ Max Verstappen ដែលបើកបរឲ្យក្រុម Red Bull បានអះអាងថាខ្លួនមិនមានការព្រួយបារម្ភអំពីស្ថានភាពដូចអ្វីដែលបានកើតឡើងនៅក្នុងប្រទេសចិនសព្វថ្ងៃនោះទេ។
សម្រាប់កីឡាប្រណាំងម៉ូតូ និងការប្រកួតកីឡាអេឡិចត្រូនិក Formula E series វិញ ត្រូវបានទីភ្នាក់ងារព័ត៌មាន Reuters ផ្សាយថាបានបញ្ឈប់ការប្រកួតដែលគ្រោងធ្វើនៅក្រុងសាន់យ៉ា ប្រទេសចិន នៅថ្ងៃទី២១ ខែមីនា ឆ្នាំ២០២០ ដោយបារម្ភខ្លាចមានផលប៉ះពាល់ដោយកូរ៉ូណាវីរុស៕
Tag:
កូរ៉ូណាវីរុស
Formula One
Red Bull
© រក្សាសិទ្ធិដោយ thmeythmey.com