ជាតិ
សង្គមជាតិ
អ្នកថតរូប«ល្បី»ជនជាតិជប៉ុនលោក Ishikawa ចូលរោងការជាមួយនារីខ្មែរក្រោយស្មោះស្ម័គ្រគ្នាជាង៨ឆ្នាំ
×![]()
ដោយ: ថ្មីៗ
ភ្នំពេញ៖ ស្នេហារវាងជនជាតិខុសគ្នា មិនមែនជារឿងងាយស្រួលទេ ព្រោះ ភាសា ម្ហូបអាហារ ទឹកដី និងវប្បធម៌ គឺជារនាំង ដែលពេលខ្លះ មិនអាចអនុញ្ញាតឲ្យពួកគេអាចជួបគ្នាបានឡើយ។ ប៉ុន្តែ ឧបសគ្គទាំងនោះមិនអាចរារាំង កញ្ញា គឹម ចិន្តា ជានារីខ្មែរ និងលោក Masayori Ishikawa ជនជាតិជប៉ុនបានឡើយ។ ពួកគេទាំងពីរនាក់ស្រឡាញ់គ្នាអស់រយៈពេលជាង៨ឆ្នាំនៅលើទឹកដីកម្ពុជា នឹងត្រៀមចូលរោងការនៅថ្ងៃសៅរិ៍ទី១៥ខែកុម្ភៈឆ្នាំ២០២០ខាងមុខនេះ។
នៅសល់តែប៉ុន្មានថ្ងៃទៀតប៉ុណ្ណោះ កញ្ញា ចិន្តា និង លោក Ishikawa ដែលជាអ្នកថតរូបសារព័ត៌មាន និងកីឡានៅក្នុងប្រទេសកម្ពុជាល្បីម្នាក់ នឹងក្លាយទៅជាគូស្វាមីភរិយាពេញសិទ្ធិស្របតាមប្រពៃណី និងច្បាប់។ «ខ្ញុំរំភើប និងសប្បាយចិត្ត។ ខ្ញុំមិនដែលបានគិតថា មានថ្ងៃនេះឡើយ។ គាត់សំណូមពរសុំរៀបចំពិធីអាពាហ៍ពិពាហ៍ជាផ្លូវការ»។ នេះ គឺជាសម្តែងអារម្មណ៍មុនថ្ងៃចូលរោងការរបស់កញ្ញា ចិន្តា។
លោក Ishikawa បានដាក់ជើងជាន់ដីនៃព្រះរាជាណាចក្រកម្ពុជាក្នុងឆ្នាំ២០១០។ មួយឆ្នាំក្រោយមក លោក Ishikawa និងកញ្ញា ចិន្តា បានស្គាល់គ្នានៅខែកញ្ញាឆ្នាំ២០១១ក្នុងអំឡុងពេលនាងបម្រើការឲ្យស្ថាប័នមួយ។
កញ្ញា ចិន្តា រៀបរាប់ថា៖«ស្គាល់គ្នាមុនដំបូងពិបាកណាស់ ព្រោះ គាត់អត់ចេះខ្មែរ ខ្ញុំអត់ចេះជប៉ុន។ គាត់និយាយអង់គ្លេសតិចតួច ខ្ញុំយល់អង់គ្លេសបានខ្លះ។ តែក្រោយមក ខ្ញុំរៀន និងចេះភាសាជប៉ុន ដូច្នេះ អ្វីៗក៏កាន់តែយល់គ្នាច្រើន»។ ចំពោះ កញ្ញា ចិន្តា, លោក Ishikawa គឺជាបុរសជនជាតិជប៉ុនដែលមានភក្តីភាព និងជាមនុស្សស្មោះត្រង់។
មិនត្រឹមតែអនាគតភរិយាទេដែលស្រឡាញ់លោក Ishikawa។ តាមពិត សូម្បីតែអ្នករួមអាជីពក្នុងវិស័យសារព័ត៌មាន និងវិស័យថតរូបសារព័ត៌មាន-កីឡាក៏ស្រឡាញ់លោក Ishikawa មិនតិចដែរ។ លោក ស៊ីវ ចាន់ណា អ្នកថតរូបសារព័ត៌មានដ៏ល្បីម្នាក់នៅក្នុងប្រទេសកម្ពុជា និងជាមិត្តភក្តិជិតស្និទ្ធម្នាក់របស់លោក Ishikawa បានសរសើរជនជាតិជប៉ុនរូបនេះថា ជាបុគ្គលសាមញ្ញបំផុត។ លោក ចាន់ណា បញ្ជាក់ថា៖«គាត់ខុសពីជនបរទេសដទៃ។ គាត់រួសរាយ រាក់ទាក់ អោនលំទោន ស្លូតបូត និងមិនឆ្មើងឆ្មៃ។ គាត់គោរពមនុស្សណាស់»។ មិនត្រឹមតែលោក ចាន់ ណា ប៉ុណ្ណោះទេ។ អ្នកធ្វើការនៅក្នុងអាជីពសារព័ត៌មាន និងអាជីពអ្នកថតរូបសារព័ត៌មាន និងកីឡា នៅក្នុងប្រទេសកម្ពុជាជាច្រើននាក់ បានស្គាល់លោក Ishikawa និងតែងតែសរសើរពីអត្តចរិតល្អរបស់លោក Ishikawa គ្រប់គ្នា។
ក្រៅពីទំនាក់ទំនងស្នេហា, លោក Ishikawa ធ្លាប់ប្រាប់សារព័ត៌មានថ្មីៗថា លោកស្រឡាញ់ប្រទេសកម្ពុជា មិត្តភក្តិខ្មែរ និងអាជីពថតរូបនៅក្នុងប្រទេសកម្ពុជា។ លោកធ្លាប់បានចែករំលែកចំណេះដឹងថតរូបទៅកាន់អ្នកថតរូបខ្មែរជាច្រើននាក់ផងដែរ។
សូមបញ្ជាក់ថា ក្នុងក្របខ័ណ្ឌកិច្ចការរបស់លោក, លោក Ishikawa មិនមែនស្នាក់នៅតែក្នុងប្រទេសកម្ពុជាមួយទេ។ តាមពិត ការងារបស់លោកតម្រូវឲ្យលោកធ្វើដំណើរ និងស្នាក់នៅក្នុងប្រទេសអាស៊ានដទៃទៀតក្នុងរយៈពេល១០ឆ្នាំចុងក្រោយនេះ៕
© រក្សាសិទ្ធិដោយ thmeythmey.com
