អន្តរជាតិ
នាវាទេសចរណ៍The Diamond Princess, រូបភាព៖ AFP
×![]()
ដោយ: ធៀន ភារិន្ទ
នាថ្ងៃទី៦ ទីកុម្ភៈ ជប៉ុន បានរកឃើញអ្នកផ្ទុកកូរ៉ូណាវីរុសប្រភេទថ្មី (2019-nCoV) ១០ករណីបន្ថែមទៀត នៅលើនាវាទេសចរណ៍មួយគ្រឿង ដែលត្រូវបានឃាត់ទុកនៅកំពង់ផែ Yokahama ខណៈពេលកូរ៉េខាងត្បូង បានរកឃើញវីរុសប្រភេទថ្មីនេះ ៤ករណីបន្ថែមទៀត។
ជប៉ុន បន្តបានរកឃើញអ្នកជំងឺផ្ទុកកូរ៉ូណាវីរុសប្រភេទថ្មីជាបន្តបន្ទាប់ទៀតនៅលើនាវាទេសចរណ៍ Diamond Princess ។ គ្រាន់តែនៅថ្ងៃទី៤ ខែកុម្ភៈ អាជ្ញាធរជប៉ុន បានរកឃើញអ្នកផ្ទុកកូរ៉ូណាវីរុស ១០នាក់ ហើយនៅថ្ងៃទី៦ ខែកុម្ភៈនេះ បានរកឃើញ ១០ករណីបន្ថែមទៀត។ សម្រាប់ចំនួនសរុបនៃអ្នកផ្ទុកកូរ៉ូណាវីរុសថ្មីនេះ គឺបានកើនឡើង ២០នាក់ហើយ ក្នុងចំណោមអ្នកដំណើរជាង ៣៥០០នាក់ លើនាវាទេសចរណ៍នេះ។
ដោយបូកជាមួយនឹង ១០ករណីនេះបន្ថែមទៀត ជប៉ុន បានរកឃើញកូរ៉ូណាវីរុសទាំងអស់ ៤៥ករណី ដែលតួលេខនេះ គឺខ្ពស់ជាងប្រទេសណាទាំងអស់ បន្ទាប់ពីចិន។
ចំណែកនៅកូរ៉េខាងត្បូងឯណោះវិញ អាជ្ញាធរសុខាភិបាល បានរកឃើញ៤ ករណីបន្ថែមទៀត។ ក្នុងចំណោម ៤ករណីនេះ មាន៣ករណីជាជនជាតិកូរ៉េខាងត្បូង ដែលឆ្លងពីមនុស្ស ទៅមនុស្ស ខណៈពេល ១ករណីទៀត គឺជាស្ត្រីចិន ដែលមកពីក្រុងវូហាន។ ទាក់ទងនឹងចំនួននេះ តួលេខសរុប ដែលកូរ៉េខាងត្បូងបានរកឃើញ គឺមានរហូតដល់ ២៣ករណីហើយ។
សម្រាប់អ្នកជំងឺដែលមានផ្ទុកកូរ៉ូណាវីរុសថ្មីនេះ ត្រូវបានគេយកទៅដាក់នៅមជ្ឈមណ្ឌលចត្តាឡីស័ក ដើម្បីព្យាបាលជំងឺ និងទប់ស្កាត់ករណីឆ្លង។
សូមបញ្ជាក់ថា កូរ៉ូណាវីរុសបានអុកឡុក នៅក្នុងទឹកដីចិន និងប្រទេសផ្សេងទៀតយ៉ាងខ្លាំង។ គិតត្រឹមថ្ងៃទី៦ ខែកុម្ភៈនេះ កូរ៉ូណាវីរុសប្រភេទថ្មី បានកើនឡើងរហូតដល់ជាង ២៨០០០ករណី ខណៈពេលអ្នកស្លាប់ដោយសារជំងឺរលាកសួត ដែលបង្កឡើងដោយកូរ៉ូណាវីរុសបានកើនដល់ជាង៥៦០នាក់ឯណោះ៕
Tag:
ជប៉ុន
កូរ៉េខាងត្បូង
កូរ៉ូណាវីរុស
© រក្សាសិទ្ធិដោយ thmeythmey.com
