ជប៉ុន ឲ្យកម្ពុជាជិត២៨ម៉ឺនដុល្លារ សម្រាប់សង់អគារសិក្សា និងប្រព័ន្ធផ្គត់ផ្គង់ទឹកស្អាត

ជាតិ

សង្គមជាតិ

ជប៉ុន ឲ្យកម្ពុជាជិត២៨ម៉ឺនដុល្លារ សម្រាប់សង់អគារសិក្សា និងប្រព័ន្ធផ្គត់ផ្គង់ទឹកស្អាត

07, Feb 2020 , 8:39 am

រូបភាព

លោកឯកអគ្គរាជទូតជប៉ុន (កណ្តាល) នាពិធីចុះហត្ថលេខាផ្តល់ជំនួយ

ដោយ:

ភ្នំពេញ៖ រដ្ឋាភិបាលជប៉ុន បានផ្តល់ថវិកាជិត២៨ម៉ឺនដុល្លារ ដល់កម្ពុជា ដើម្បីសាងសង់អគារសិក្សានៅអនុវិទ្យាល័យបន្ទាយប្រណាក ខេត្តកំពង់ស្ពឺ និងដើម្បីសាងសង់ប្រព័ន្ធផ្គត់ផ្គង់ទឹកស្អាតក្នុងមណ្ឌលអភិវឌ្ឍន៍យោធិនពិការភ្នំឆ័ត្រ ខេត្តបន្ទាយមានជ័យ។ លោក មិកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំកម្ពុជា បានចុះហត្ថលេខាព្រមព្រៀងផ្តល់ជំនួយនេះ ជាមួយអនុប្រធានមន្ទីរអប់រំយុវជន និងកីឡា ខេត្តកំពង់ស្ពឺ និងប្រធានសមាគមទឹកស្អាតខេត្តបន្ទាយមានជ័យ កាលពីថ្ងៃទី៥ ខែកុម្ភៈ ឆ្នាំ២០២០។

ជំនួយជិត២៨ម៉ឺនដុល្លារនេះ គឺមន្ទីរអប់រំ យុវជន និង កីឡាខេត្តកំពង់ស្ពឺ ទទួលបានជាង៩ម៉ឺនដុល្លារ សម្រាប់កសាងអគារសិក្សា៦បន្ទប់ ដែលនឹងបំពាក់ដោយគ្រឿងសង្ហារិម និងបង្គន់អនាម័យ២បន្ទប់ នៅក្នុងវិទ្យាល័យបន្ទាយប្រណាកខេត្តកំពង់ស្ពឺ ហើយសមាគមទឹកស្អាត ទទួលបាន១៨ម៉ឺនដុល្លារ សម្រាប់បង្កើតប្រព័ន្ធផ្គត់ផ្គង់ទឹកស្អាត និងបណ្តាញចែកចាយទឹកប្រមាណ៣០គីឡូម៉ែត្រនៅក្នុងមណ្ឌលអភិវឌ្ឍន៍យោធិនពិការភ្នំឆ័ត្រ ក្នុងខេត្តបន្ទាយមានជ័យ។

លោក មិកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំកម្ពុជា ដែលមានវត្តមាននៅក្នុងការផ្តល់ជំនួយនេះ បានលើកឡើងថា តាមរយៈថវិកាដែលជប៉ុនបានប្រគល់ឲ្យស្ថាប័នទាំងពីរ នឹងបំពេញបំណងដល់សិស្សានុសិស្សនៅក្នុងវិទ្យាល័យបន្ទាយប្រណាកខេត្តកំពង់ស្ពឺ អាចសិក្សាប្រកបដោយសុវត្ថិភាព និងមានផាសុកភាព។ ចំណែក អង្គការសមាគមទឹកស្អាត អាចធានាបាននូវការទទួលទានទឹកស្អាត និងអនាម័យសម្រាប់ពលរដ្ឋប្រមាណ២ពាន់នាក់ដែលភាគច្រើនជាជនពិការ។

ឯកអគ្គរាជទូតជប៉ុនប្រចាំកម្ពុជារូបនេះ បានបញ្ជាក់ថា ថ្វីដ្បិតកម្ពុជា អភិវឌ្ឍបានឆាប់រហ័សក៏ពិតមែន តែកម្ពុជា នៅតែមានបញ្ហាប្រឈមមួយចំនួនដែលត្រូវដោះស្រាយដើម្បីលើកកម្ពស់នូវគុណភាពជីវភាពរស់នៅរបស់ប្រជាជនខ្មែរ។ លោក មានប្រសាសន៍ថា៖«ជប៉ុននឹងបន្តដោះស្រាយបញ្ហាដែលកម្ពុជាកំពុងតែជួបប្រទះ តាមរយៈគោលការណ៍សហការប្រតិបត្តិការសេដ្ឋកិច្ច និងអភិវឌ្ឍផ្សេងៗផងដែរ។ ខ្ញុំ សង្ឃឹមយ៉ាងមុតមាំថា គម្រោងនេះ នឹងនាំទៅរកការកែលម្អនូវកម្រិតជីវភាពរស់នៅរបស់ប្រជាពលរដ្ឋ»។

គម្រោងសាងសង់អគារសិក្សានៅអនុវិទ្យាល័យបន្ទាយប្រណាកខេត្តកំពង់ស្ពឺ

លោក យឹម គឹមហាច អនុប្រធានមន្ទីរអប់រំ យុវជន និង កីឡាខេត្តកំពង់ស្ពឺ លើកឡើងថា ជំនួយនេះនឹងជួយឲ្យវិទ្យាល័យបន្ទាយប្រណាកខេត្តកំពង់ស្ពឺ មានអគារសិក្សាគ្រប់គ្រាន់ សម្រាប់ឲ្យសិស្ស៤៨៩នាក់ (ស្រី២៥៦នាក់) បានសិក្សា។ លោក យឹម គឹមហាច បានបញ្ជាក់ថា៖«ការខ្វះខាតអគារសិក្សា ក៏ក្លាយជាបញ្ហាប្រឈមចម្បងចំពោះមុខក្នុងការប្រមូលសិស្សឲ្យចូលរៀន។ ដោយមើលឃើញពីស្ថានភាពនេះ ជប៉ុនក៏បានផ្តល់ជំនួយសម្រាប់សម្រួលដល់សិស្សានុសិស្សអាចរៀនសូត្រ»។

រីឯ លោក ឯក សុនចាន់ ប្រធានសមាគមទឹកស្អាត និយាយថា គម្រោងសាងសង់ប្រព័ន្ធទឹកស្អាតក្នុងមណ្ឌលអភិវឌ្ឍន៍យោធិនពិការភ្នំឆ័ត្រ នៅខេត្តបន្ទាយមានជ័យ នឹងផ្តល់ផលដល់ពលរដ្ឋប្រមាណ២ពាន់នាក់ ដែលជាជនពិការ និងប្រជាកសិករ មានទឹកប្រើប្រាស់គ្រប់គ្រាន់សម្រាប់ចិញ្ចឹមជីវិត។

គម្រោងសាងសង់ប្រព័ន្ធផ្គត់ផ្គង់ទឹកស្អាតក្នុងមណ្ឌលអភិវឌ្ឍន៍យោធិនពិការភ្នំឆ័ត្រ ខេត្តបន្ទាយមានជ័យ

លោក បន្តថា៖«កាលពីមុន អ្នកស្រុកត្រូវពឹងផ្អែកលើទឹកក្រោមដីដែលមានសារធាតុលោហៈ និងមានទឹកល្អក់ ប្រឈមនឹងការពុល។ ដូច្នេះពួកគេត្រូវទិញទឹកដែលត្រូវចំណាយ៥ពាន់រៀលក្នុង២០លីត្រ សម្រាប់បំពេញតម្រូវការរបស់ពួកគេ។ ឥឡូវនេះសុបិនរបស់ពួកគេដែលចង់បានទឹកប្រើប្រាស់បានក្លាយជាការពិតហើយ។ មិនលើសពីមួយឆ្នាំទៀតទេ ពួកគេនឹងមានទឹកប្រើប្រាស់គ្រប់គ្រាន់ហើយ តាមរយៈការសាងសង់ប្រព័ន្ធទឹកស្អាតប្រកបដោយគុណភាព តម្លៃសមរម្យ និងមាននិរន្តភាព»។

សូមបញ្ជាក់ថា កម្ពុជាទទួលបានជំនួយពីជប៉ុនតាំងពីឆ្នាំ១៩៩១មក ដែលគិតជាទឹកប្រាក់ គឺជាង៦០លានដុល្លារ សម្រាប់អភិវឌ្ឍ និងស្ថាបនាប្រទេសកម្ពុជាឡើងវិញលើគម្រោងទាំង៧២២៕