ជាតិ
សង្គមជាតិ
អាជ្ញាធរភ្នំពេញ ឲ្យឈប់ផ្សាយថ្នាំជក់ ហើយការផ្សាយកន្លងមក ត្រូវដកចេញឲ្យអស់
× រដ្ឋបាលរាជធានីភ្នំពេញ បានចេញសេចក្តីជូនដំណឹងមួយ នៅថ្ងៃទី៥ ខែមករា ឆ្នាំ២០២០ ទៅកាន់ក្រុមហ៊ុនថ្នាំជក់ទាំងអស់ ដោយប្រាប់ឲ្យបញ្ឈប់ការផ្សាយពាណិជ្ជកម្មអំពីផលិតផលថ្នាំជក់គ្រប់ប្រភេទក្នុងរាជធានីភ្នំពេញ ជាពិសេសកម្មវិធីប្រកួតប្រជែងការតាំងកញ្ចប់បារី។
មិនត្រឹមតែមិនឲ្យបន្តការផ្សព្វផ្សាយនោះទេ តែរដ្ឋបាលរាជធានីភ្នំពេញ ថែមទាំងបង្គាប់គ្រប់ក្រុមហ៊ុន ឲ្យប្រមូលយកចេញឲ្យអស់នូវសម្ភារផ្សាយពាណិជ្ជកម្មបារី ដែលបានផ្សព្វផ្សាយកន្លងមក ហើយក៏ត្រូវលុបបំបាត់ការផ្សាយពាណិជ្ជកម្មផលិតផលថ្នាំជក់ក្នុងគេហទំព័ររបស់ក្រុមហ៊ុន និង តាមបណ្តាញព័ត៌មានសង្គមផងដែរ។
រដ្ឋបាលរាជធានីភ្នំពេញ ចាត់ទុកទង្វើទាំងអស់នេះថា ល្មើសនឹងច្បាប់ស្តីពីការត្រួតពិនិត្យផលិតផលថ្នាំជក់។ រដ្ឋបាលរាជធានីភ្នំពេញ ព្រមានដូច្នេះថា៖«រដ្ឋបាលរាជធានីភ្នំពេញ នឹងសហការជាមួយក្រសួងសុខាភិបាល និងស្ថាប័នពាក់ព័ន្ធ បន្តតាមដានក្រុមហ៊ុនថ្នាំជក់ទាំងឡាយណា ដែលប្រពឹត្តល្មើសនឹងច្បាប់ស្តីពីការត្រួតពិនិត្យផលិតផលថ្នាំជក់ ដើម្បីចាត់វិធានការទៅតាមផ្លូវច្បាប់»។
ការចេញវិធានការនេះ ដោយសារតែរដ្ឋបាលរាជធានីភ្នំពេញ សង្កេតឃើញក្រុមហ៊ុនថ្នាំជក់មួយចំនួន កំពុងផ្សព្វផ្សាយលក់បារីទ្រង់ទ្រាយធំ ក្នុងគោលបំណងអូសទាញអ្នកលក់បារីទូទាំងប្រទេស ឲ្យចូលរួមក្នុងកម្មវិធីប្រកួតប្រជែងដាក់តាំងបារី ដើម្បីទទួលបានរង្វាន់ពីក្រុមហ៊ុន។ រដ្ឋបាលរាជធានីភ្នំពេញ ហៅសកម្មភាពនេះថា បានបង្ហាញចេតនារបស់ក្រុមហ៊ុន ដែលមិនត្រឹមតែប្រព្រឹត្តល្មើសនឹងច្បាប់ស្តីពីការត្រួតពិនិត្យថ្នាំជក់ប៉ុណ្ណោះទេ ថែមទាំងបានអូសទាញអ្នកលក់បារី ឲ្យរួមចំណែប្រពឹត្តបទល្មើសនេះផងដែរ។
ក្នុងសេចក្តីជូនដំណឹង រដ្ឋបាលរាជធានីភ្នំពេញ បានរម្លឹកពីប្រសាសន៍របស់សម្តេចនាយករដ្ឋមន្ត្រី ហ៊ុន សែន ថា រដ្ឋាភិបាល មានមហិច្ឆតា កែប្រែកម្ពុជា ឲ្យក្លាយទៅជាប្រទេស គ្មានផ្សែងបារី នៅឆ្នាំ២០២៥។ ប្រមុខរដ្ឋាភិបាល បានលើកពីមហិច្ឆតា ក្នុងជំនួបជាមួយលោកវេជ្ជបណ្ឌិត Takeshi Kasai នាយកអង្គការសុខភាពពិភពលោក (WHO) របស់អង្គការសហប្រជាជាតិប្រចាំតំបន់អាស៊ីប៉ាស៊ីហ្វិក កាលពីអំឡុងខែសីហា ឆ្នាំ២០១៩ នៅវិមានសន្តិភាព។
រដ្ឋបាលរាជធានីភ្នំពេញ បានយករបាយការណ៍របស់អង្គការកម្មវិធីអភិវឌ្ឍន៍សហប្រជាជាតិ និងអង្គការសុខភាពពិភពលោក មកសរសេរថា ប្រជាជនកម្ពុជាប្រមាណ១,៥ម៉ឺននាក់ បានស្លាប់រៀងរាល់ឆ្នាំ (ស្លាប់៤០នាក់ ក្នុង១ថ្ងៃ) បណ្តាលមកពីជំងឺផ្សេងៗ ដែលបង្កឡើងដោយការប្រើប្រាស់ថ្នាំជក់ ដូចជា ជំងឺដាច់សរសៃឈាមក្នុងខួរក្បាល ជំងឺស្ទះសរសៃឈាមបេះដូង ជំងឺឆ្លងផ្លូវដង្ហើមផ្នែកខាងក្រោម ជំងឺត្បៀតទងសួតរ៉ាំរ៉ៃ និង ជំងឺមហារីកសួត ជាដើម។ លើសពីនេះ ការប្រើប្រាស់ថ្នាំជក់ ធ្វើឲ្យកម្ពុជា បាត់បង់ថវិកា៦៤៩លានដុល្លារ ក្នុង១ឆ្នាំ៕
© រក្សាសិទ្ធិដោយ thmeythmey.com