អន្តរជាតិ
WHO ប្រកាសរកជំនួយ៦៧៥លានដុល្លារដើម្បីប្រយុទ្ធកូរ៉ូណាវីរុស អគ្គនាយកអង្គការសុខភាពពិភពលោក Tedros Adhanom Ghebreyesus ។ រូបភាព Xinhua
× អង្គការសុខភាពពិភពលោក (WHO) នៅថ្ងៃទី៥ ខែកុម្ភៈ បានអំពាវនាវរកជំនួយចំនួន៦៧៥លានដុល្លារដើម្បីប្រយុទ្ធប្រឆាំងកូរ៉ូណាវីរុស ដែលកំពុងរាតត្បាតខ្លាំងនៅចិន និងប្រទេសមួយចំនួនទៀត។ ប្រមុខ WHO លោក Tedros Adhanom Ghebreyesus អះអាងថា ចំនួនទឹកប្រាក់នេះមិនច្រើនឡើយ បើប្រៀបធៀបនឹងការចំណាយក្នុងករណីវីរុសនេះរាលដាលកាន់តែខ្លាំងនោះ។ តាមគម្រោង ជំនួយទាំងនេះ នឹងផ្ដោតលើការវិនិយោគផ្នែកសុខាភិបាលក្នុងប្រទេសមានប្រឈមមុខខ្លាំង។
«ថ្ងៃនេះ យើងដំណើរការផែនការត្រៀមឆ្លើយតបយុទ្ធសាស្ត្រ... យើងស្នើសុំជំនួយ៦៧៥លានដុល្លារដើម្បីទ្រទ្រង់គម្រោងរយៈពេលបីខែបន្ទាប់។» នេះជាការលើកឡើងរបស់លោក Tedros Adhanom Ghebreyesus អគ្គនាយកអង្គការសុខភាពពិភពលោកនៅថ្ងៃទី៥ ខែកុម្ភៈពីការត្រៀមរបស់អង្គការអន្តរជាតិមួយក្នុងការទប់ស្កាត់ និងការគ្រប់គ្រងកូរ៉ូណាវីរុសដែលផ្ទុះឡើងនៅទឹកដីចិន និងរាលដាលដល់ប្រទេសជាង២០ទៀត។
ក្នុងសន្និសីទនៅឯទីក្រុងហ្សឺណែវ លោក Ghebreyesus លើកឡើងទៀតថា សារដែលលោកបង្ហាញទៅកាន់ពិភពលោក គឺវិនិយោគថ្ងៃនេះ ឬក៏ចង់ចំណាយច្រើនៅថ្ងៃក្រោយ។ ប្រមុខ WHO រូបនេះទំនងចង់រំឭកថា ទឹកប្រាក់ដែលស្ថាប័នលោកស្នើសុំនេះ មិនច្រើនឡើយសម្រាប់ការគ្រប់គ្រង និងការទប់ស្កាត់ការរាលដាលកាន់តែខ្លាំងរបស់កូរ៉ូណាវីរុស ព្រោះមិនមានការឆ្លើយតបនៅពេលបច្ចុប្បន្ននេះទេ ការចំណាយនៅថ្ងៃខាងមុខ អាចមានច្រើនជាងនេះទៅទៀត។
ថវិកាចំនួន៦០លានដុល្លារ នឹងត្រូវប្រើសម្រាប់ប្រតិបត្តិការរបស់ WHO ខណៈដែលទឹកប្រាក់សេសសល់ នឹងត្រូវផ្ដល់ឲ្យប្រទេសដែលត្រូវការជំនួយចាំបាច់ក្នុងការការពារទល់នឹងវីរុសដែលបង្កទៅជាជំងឺរលាកសួតធ្ងន់ធ្ងរ។ នេះជាការបញ្ជាក់របស់លោក Ghebreyesus ។
អំឡុងសន្និសីទសារព័ត៌មានដដែល លោក Ghebreyesus បញ្ជាក់ថា WHO បានបញ្ចេញម៉ាស់៥សែន និងឧបករណ៍ជំនួយការដកដង្ហើម៤ម៉ឺនទៅកាន់ប្រទេសចំនួន២៤ពីខ្លាំងរបស់ខ្លួននៅឌូបៃ និងអាក្រា។ អគ្គនាយក WHO ជនជាតិអេត្យូពីរូបនេះ ក៏ឆ្លៀតសរសើរមហាសេដ្ឋីអាមេរិក ប៊ីល ហ្កេត និងភរិយាដែលបានបរិច្ចាគលុយចំនួន១០០លានដុល្លារក្នុងការធ្វើតេស្ត ព្យាបាល និងស្រាវជ្រាវវ៉ាក់សាំងការពារកូរ៉ូណាវីរុសផងដែរ។
ទាក់ទងនឹងការជម្លៀសមនុស្សពីទឹកដីចិនដែលធ្វើដោយប្រទេសជាច្រើននោះ លោក Ghebreyesus ពន្យល់ថា វិធានការបែបនេះ មិនបានជួយអ្វីឡើយ ហើយលោកលើកទឹកចិត្តឲ្យប្រទេសទាំងអស់សម្រេចចិត្តដោយផ្អែកលើការពិត។ កន្លងទៅ WHO ក៏មិនបានផ្ដល់អនុសាសន៍អ្វីទាក់ទងការជម្លៀសមនុស្ស ឬការរឹតត្បិតការធ្វើដំណើរទៅមកចិនដែរ ព្រោះស្ថានការណ៍រាលដាលកូរ៉ូណាវីរុសនេះមិនទាន់ឡើងដល់អត្រាហានិភ័យខ្លាំងនៅឡើយ៕
Tag:
កូរ៉ូណាវីរុស
WHO
© រក្សាសិទ្ធិដោយ thmeythmey.com