ភ្នំពេញ៖ ការចាកចេញរបស់អង់គ្លេសពីសហភាពអឺរ៉ុប (Brexit) មិនប៉ះពាល់ដល់ទំនាក់ទំនងពាណិជ្ជកម្មកម្ពុជាទេ ។ ផ្ទុយទៅវិញ វាផ្ដល់ភាពវិជ្ជមានដល់ទំនាក់ទំនងទ្វេភាគី រវាងកម្ពុជា និងអង់គ្លេស។ អ្នកនាំពាក្យក្រសួងពាណិជ្ជកម្ម លោក ស៊ាង ថៃ ថ្លែងបែបនេះ នៅក្រោយសន្និសីទកាសែតស្តីពី «បច្ចុប្បន្នភាព និងវឌ្ឍនភាពរបស់ក្រសួងពាណិជ្ជកម្ម» នាទីស្តីការគណៈរដ្ឋមន្ត្រី នាថ្ងៃទី៦ មករានេះ។
លោក ស៊ាង ថៃ បានសង្កត់ធ្ងន់ថា កម្ពុជា អាចភ្ជាប់ទំនាក់ទំនងពាណិជ្ជកម្មជាមួយអង់គ្លេស កាន់តែប្រសើរឡើងថែមទៀត នៅពេលដែលកម្ពុជា បាត់បង់សិទ្ធិទទួលបានប្រព័ន្ធអនុគ្រោះពន្ធ (Everything But Arms) ពីសហភាពអឺរ៉ុប។ មូលហេតុដែលលោក ស៊ាង ថៃ រំពឹងបែបនេះ ដោយសារមើលឃើញថា ប្រទេសនៅក្នុងសហភាពអឺរ៉ុបទាំងអស់ រួមទាំងអង់គ្លេសផងដែរ មិនមែនសុទ្ធតែគាំទ្រដល់ចំណាត់ការរបស់គណៈកម្មការអឺរ៉ុប លើដំណើរការដក ឬមិនដក EBA ពីកម្ពុជា ដោយសារមិនពេញចិត្តការដឹកនាំរបស់រដ្ឋាភិបាលឡើយ។
ឆ្លើយនឹងសំនួរអ្នកសារព័ត៌មាន ជុំវិញទំនាក់ទំនងពាណិជ្ជកម្មជាមួយអង់គ្លេសនេះ អ្នកនាំពាក្យក្រសួងពាណិជ្ជកម្ម បាននិយាយដូច្នេះថា៖«(ការដកខ្លួនអង់គ្លេសពីសហភាពអឺរ៉ុប) ល្អៗសម្រាប់កម្ពុជា ពីព្រោះយើងឃើញជំហរដូចឯកឧត្តមរដ្ឋមន្ត្រីប្រតិភូជម្រាបអ៊ីចឹងថា ស្អីដែលសហភាពអឺរ៉ុបនិយាយពីរឿងEBAនេះ មិនមែនសហភាពអឺរ៉ុប គឺគណកម្មការអឺរ៉ុប ដូច្នេះប្រទេសមួយចំនួននៅក្នុងសហគមអឺរ៉ុប គឺគាត់មិនគាំទ្រឱ្យមានដកEBA នៅកម្ពុជាទេ។ ហើយយើងសង្ឃឹមថា អង់គ្លេសដកខ្លួនចេញផុតពីEUអ៊ីចឹង យើងនឹងមានកិច្ចសហប្រតិបត្តិការទ្វេភាគីកាន់តែល្អប្រសើរ»។
កាលពីឆ្នាំ២០១៩កន្លង កម្ពុជានាំចេញទំនិញទៅកាន់ទីផ្សារសហភាពអឺរ៉ុប មានទំហំទឹកប្រាក់ជាង៦ពាន់លានដុល្លារ ។ ក្នុងនោះកម្ពុជានាំចូលទីផ្សារអង់គ្លេស មានទំហំទឹកប្រាក់ជាង១ពាន់លានដុល្លារអាមេរិក។ នេះបើតាមលោក ស៊ាង ថៃ អ្នកនាំពាក្យក្រសួងពាណិជ្ជកម្ម។
អង់គ្លេស បានចាកចេញពីសហភាពអឺរ៉ុបជាផ្លូវការ កាលពីថ្ងៃទី៣១ មករា ឆ្នាំ២០២០ ក្រោយពីពន្យាពេល៣ដង ចាប់តាំងពីឆ្នាំ២០១៦មក។ ការសម្រេចចិត្តចាកចេញរបស់អង់គ្លេសនេះ គឺជាការផ្ដាច់ខ្លួនពីសមាហរណកម្មនយោបាយ ពាណិជ្ជកម្ម និងសេដ្ឋកិច្ចពីប្លុកតំបន់ដ៏ធំមួយនេះ។
នៅពេលអ្នកកាសែតសួរថា ក្រោយពីអង់គ្លេសចាកចេញពីសហភាពអឺរ៉ុប (EU) កាលពីសប្ដាហ៍មុន តើមកដល់ពេលនេះ ការចរចាលើកិច្ចព្រមព្រៀងទីផ្សារសេរី «Free trade Agreement (FTA)» រវាងកម្ពុជានិងអង់គ្លេសយ៉ាងម៉េចដែរ? លោក ស៊ាង ថៃ អះអាងថា កម្ពុជាមិនទាន់បានទាក់ទងទៅអង់គ្លេស សុំចរចាលើចំណុចនេះទេ ប៉ុន្តែវាក៏ស្ថិតនៅក្នុងគម្រោងរបស់រដ្ឋាភិបាលដែរ។
«យើងមានទិសដៅ(ចរចាលើកិច្ចព្រមព្រៀងទីផ្សារសេរី )ជាមួយបណ្ដាប្រទេសដទៃទៀត ឥឡូវយើងធ្វើជាមួយចិន ជាមួយកូរ៉េ តែយើងមានទិសដៅបន្ថែមទៀត។ ដោយឡែកនៅពេលដែលយើងយកជើងលេខសរុបនៃការនាំចេញរបស់កម្ពុជាទៅEU ហើយយើងដកនឹងជើងលេខដែលនាំចេញទៅអង់គ្លេស ឃើញច្រើនដែរ គឺជាង១ពាន់លានដុល្លារ»។ នេះជាការបញ្ជាក់របស់លោក ស៊ាង ថៃ ដែលបានបន្ថែមថា ការបាត់បង់ប្រព័ន្ធអនុគ្រោះពន្ធ មិនធ្វើឱ្យសេដ្ឋកិច្ចកម្ពុជាដួល ឬបាត់បង់ទីផ្សារនោះទេ ប៉ុន្តែវាគ្រាន់តែធ្វើឱ្យកម្ពុជា ប្រឈមមុខនឹងការប្រកួតប្រជែងខ្លាំងប៉ុណ្ណោះ។
ជាមួយគ្នានេះអ្នកនាំពាក្យរាជរដ្ឋាភិបាលកម្ពុជា លោក ផៃ ស៊ីផាន ស្នើឱ្យពលរដ្ឋកម្ពុជា កុំមានការភ័យខ្លាចចំពោះការបាត់ប្រព័ន្ធអនុគ្រោះពន្ធ (EBA) ពីសហភាពអឺរ៉ុបនេះ ព្រោះរដ្ឋាភិបាល បានត្រៀមខ្លួនរួចរាល់ ក្នុងការដោះស្រាយបញ្ហាកើតឡើង ក្រោយបាត់បង់EBA នេះហើយ។ ក្នុងន័យនេះលោក ផៃ ស៊ីផាន ចង់ពន្យល់ថា ការបាត់EBA វាគ្រាន់តែធ្វើឱ្យកម្ពុជាខាតបង់ប្រាក់ ដែលបានពីការអនុគ្រោះពន្ធទំនិញជាង៦០០លានដុល្លារប៉ុណ្ណោះ។ បើតាមលោក ផៃ ស៊ីផាន កម្ពុជាគង់តែបាត់បង់EBA នេះទេ នៅពេលដែលកម្ពុជាក្លាយជាប្រទេសអភិវឌ្ឍន៍ ដែលមានចំណូលខ្ពស់។
«ការកាត់បាត់ EBA ចំណុចណាមួយ ឬបាត់ទាំងអស់ វាគឺជាការបង្ហាញសមត្ថភាពរបស់យើង យើងរស់…។កម្ពុជាមានមោទនភាព ដែលចូលខ្លួនប្រកួតប្រជែង ដោយសមធម៌ ដោយស្មើមុខមាត់គ្នា ដោយការបង់ពន្ធ»។ នេះជាការបញ្ជាក់របស់អ្នកនាំពាក្យរដ្ឋាភិបាល ដែលបានបន្ថែមថា នៅក្នុងអាស៊ាន មានតែប្រទេស៣ទេ ដែលទទួលបាន EBAនេះ គឺកម្ពុជា ភូមា និងឡាវ។
នៅពាក់កណ្ដាលខែកុម្ភៈ ឆ្នាំ២០២០នេះ គណកម្មការអឺរ៉ុប នឹងសម្រេចចុងក្រោយលើការដក ឬមិនដកប្រព័ន្ធអនុគ្រោះពន្ធនាំចេញទំនិញ អ្វីគ្រប់យ៉ាងលើកលែងតែអាវុធ (EBA) ពីកម្ពុជា។ ហើយបើក្នុងករណីសហភាពអឺរ៉ុប សម្រេចមិនដកEBA ពីកម្ពុជាទេនោះ កម្ពុជានឹងអាចបន្តទទួលបានប្រព័ន្ធអនុគ្រោះពន្ធពាណិជ្ជកម្មនេះ រហូតដល់ឆ្នាំ២០២៥។
ប៉ុន្តែក្នុងករណីមានការព្យួរការអនុគ្រោះពន្ធ EBA ពីកម្ពុជា នោះការនាំចេញនឹងអាចធ្លាក់ចុះ ដែលគិតជាទឹកប្រាក់ចន្លោះប្រមាណ ៥០០លានដុល្លារ ទៅជាង ៦០០លានដុល្លារក្នុងមួយឆ្នាំ។ ការគណនានេះ ដោយផ្អែកតួលេខនៃនាំចេញទៅ EU ឆ្នាំ២០១៩ ទំហំ ជាង៤ពាន់លានដុល្លារ នៃផលិតផលសម្លៀកបំពាក់ ស្បែកជើង និងអង្ករ ដោយមិនគិតផលិតផលកង់។ គួរបញ្ជាក់ថា គ្រាន់តែសម្លៀកបំពាក់ កាន់ទំហំដល់ទៅ ៨០ភាគរយនៃការនាំចេញសរុបរបស់កម្ពុជាទៅ EU ។
តែយ៉ាងណានាយករដ្ឋមន្ត្រីកម្ពុជា សម្ដេច ហ៊ុន សែន ធ្លាប់បានបញ្ជាក់ថា កម្ពុជា មិនស្លាប់ដោយសារតែការបាត់បង់ប្រព័ន្ធអនុគ្រោះពន្ធនេះទេ ពោលគឺវាគ្រាន់តែតម្រូវឱ្យកម្ពុជាបង់ពន្ធពេញថ្លៃលើទំនិញនាំចេញទៅទីផ្សារអឺរ៉ុបប៉ុណ្ណោះ។
ប្រសិនបើកម្ពុជាបាត់បង់ EBA អ្នករងគ្រោះពិតប្រាកដគឺពលរដ្ឋក្រីក្រ ជាពិសេសអ្នកធ្វើការក្នុងវិស័យកាត់ដេរ ។ នេះបើតាមការយល់ឃើញរបស់លោក George EDGAR ឯកអគ្គរដ្ឋទូតសហភាពអឺរ៉ុបប្រចាំកម្ពុជាផុតអាណត្តិ ដែលបានថ្លែងក្នុងសន្និសីទអ្នកាសែត កាលពីខែកក្ដដា ឆ្នាំ២០១៩៕