អន្តរជាតិ
ជប៉ុន បន្តរកឃើញកូរ៉ូណាវីរុស ៤១ករណី ស្របពេលកូរ៉េខាងត្បូង អង់គ្លេស និងអ៊ីតាលី កើន១ករណី
× គិតត្រឹមថ្ងៃទី៧ ខែកុម្ភៈ ជប៉ុន នៅតែបន្តរកឃើញអ្នកផ្ទុកកូរ៉ូណាវីរុសប្រភេទថ្មី (2019-nCOV) ៤១ករណីនៅលើនាវាទេសចរណ៍មួយគ្រឿង។ កូរ៉េខាងត្បូង អង់គ្លេស និងអ៊ីតាលី ក៏សុទ្ធតែរកឃើញករណីឆ្លងវីរុសនេះមួយករណីដូចគ្នា។
អ្នកដំណើរលើនាវាទេសចរណ៍ Diamond Princess ចំនួន៤១នាក់ទៀត ត្រូវបានជប៉ុនបន្តរកឃើញថា មានផ្ទុកកូរ៉ូណាវីរុសប្រភេទថ្មី។ បើតាមរដ្ឋមន្ត្រីសុខាភិបាលជប៉ុន យ៉ាងហោចណាស់មនុស្សចំនួន ៦១នាក់ មានផ្ទុកកូរ៉ូណាវីរុសនៅលើនាវាទេសចរណ៍នេះ។ ពេលនេះ អ្នកជំងឺទាំងនោះ ត្រូវបានគេបញ្ជូនទៅមជ្ឈមណ្ឌលចត្តាឡីស័ក នៅតាមខេត្តនានារបស់ជប៉ុន ដែលត្រូវបានគេត្រៀមទុកសម្រាប់ដាក់អ្នកជំងឺ។
ចំណែកនៅកូរ៉េខាងត្បូង ដែលជាអ្នកជិតខាងជប៉ុនវិញ បានរកឃើញកូរ៉ូណាវីរុសមួយករណីផងដែរ។ ជនជាតិកូរ៉េខាងត្បូងម្នាក់ ដែលគេជម្លៀសចេញពីក្រុងវូហាន ត្រូវបានអាជ្ញាធរសុខាភិបាលអះអាងថា មានផ្ទុកកូរ៉ូណាវីរុស។ បន្ទាប់ពីរកឃើញកូរ៉ូណាវីរុស អ្នកជំងឺវ័យ ២៨ឆ្នាំរូបនេះ ត្រូវបានបញ្ជូនទៅដាក់នៅទៅមន្ទីរពេទ្យសេអ៊ូល ដើម្បីព្យាបាល។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap។
ក្រៅពីប៉ែកអាស៊ី នៅអឺរ៉ុបឯណោះវិញ កូរ៉ូណាវីរុសនៅតែបន្តរកឃើញផងដែរ ក្នុងនោះមានប្រទេសពីរ គឺអង់គ្លេស និងអ៊ីតាលី។ សម្រាប់អង់គ្លេស នាថ្ងៃទី៦ ខែកុម្ភៈ បានរកឃើញកូរ៉ូណាវីរុស ១ករណីទៀតនៅក្នុងទឹកដីរបស់ខ្លួន ដែលសរុបករណីទាំងអស់មាន ៣ករណីហើយ។ ចំពោះករណីចុងក្រោយនៅអង់គ្លេសនេះ បុរសម្នាក់ ត្រូវបានគេរកឃើញថា មានផ្ទុកវីរុសប្រភេទថ្មី នៅទីក្រុងBrighton បន្ទាប់មកត្រូវគេបញ្ជូនទៅមន្ទីរពេទ្យមួយកន្លែង នាទីក្រុងឡុងដ៍។
សម្រាប់អ៊ីតាលីវិញ ក៏ត្រូវបានគេរកឃើញអ្នកផ្ទុកកូរ៉ូណាវីរុស ១ករណីផងដែរ ប៉ុន្តែករណីចុងក្រោយនេះ គឺជាជនជាតិអ៊ីតាលី។ បុរសរូបនេះ ត្រូវបានគេរកឃើញថាមានផ្ទុកកូរ៉ូណាវីរុស បន្ទាប់ពីត្រលប់មកពីចិន បានជាច្រើនថ្ងៃ ហើយពេលនេះ អ្នកជំងឺត្រូវបានគេបញ្ជូនទៅវិទ្យាស្ថានជាតិគ្រប់គ្រងជំងឺឆ្លង Lazzaro Spallanzani ប្រទេសអ៊ីតាលី។
សូមបញ្ជាក់ថា ចំនួនអ្នកស្លាប់ដោយសារកូរ៉ូណាវីរុស បានកើនឡើង៦៣៩នាក់ ហើយអ្នកផ្ទុកកូរ៉ូណាវីរុសមានជាង ៣ម៉ឺននាក់ និងអ្នកជាសះស្បើយមានជាង ១២០០នាក់៕
Tag:
ជប៉ុន
កូរ៉េខាងត្បូង
អង់គ្លេស
អ៊ីតាលី
ចិន
កូរ៉ូណាវីរុស
© រក្សាសិទ្ធិដោយ thmeythmey.com