អន្តរជាតិ
លោក ត្រាំ ប្រាប់លោក ស៊ី ថា អាមេរិកជឿជាក់សមត្ថភាពចិនក្នុងការប្រយុទ្ធជាមួយកូរ៉ូណាវីរុស
ប្រធានាធិបតីចិន ស៊ី ជិនភីង(ខាងឆ្វេង) និងប្រធានាធិបតីអាមេរិក ដូណាល់ ត្រាំ។ រូបភាព៖ AP
×![]()
ដោយ: ធៀន ភារិន្ទ
ប្រធានាធិបតីអាមេរិក ដូណាល់ ត្រាំ នៅថ្ងៃទី៧ ខែកុម្ភៈ បានសង្កត់ធ្ងន់ថា អាមេរិក ជឿជាក់លើសមត្ថភាពរបស់ចិនក្នុងការដោះស្រាយបញ្ហាកូរ៉ូណាវីរុសនៅក្នុងប្រទេស។ ជាការឆ្លើយតប ប្រធានាធិបតីចិន ស៊ី ជិនភីង បានបញ្ជាក់ប្រាប់សមភាគីអាមេរិកថា ចិន បានប្រើប្រាស់គ្រប់វិធានការតាមដែលអាចធ្វើទៅបានទាំងអស់ ដើម្បីទប់ស្កាត់ការរីកសាយភាយកូរ៉ូណាវីរុស។
តាមរយៈសេចក្តីថ្លែងការណ៍របស់សេតវិមានមួយ នាថ្ងៃទី៧ ខែកុម្ភៈ លោក ដូណាល់ ត្រាំ ប្រធានាធិបតីអាមេរិក ជឿជាក់យ៉ាងខ្លាំងលើកម្លាំង និងសមត្ថភាពរបស់ចិន ក្នុងការប្រឈមមុខ និងដោះស្រាយបញ្ហាការរីកសាយភាយនៃកូរ៉ូណាវីរុស ដែលបានសម្លាប់មនុស្សជាច្រើននាក់ និងបង្កឲ្យមានអ្នកឆ្លងយ៉ាងច្រើន នៅក្នុងប្រទេសចិន។
ជាការឆ្លើយតប លោក ស៊ី ជិនភីង ប្រធានាធិបតីចិន បានបញ្ជាក់ថា ទីក្រុងប៉េកាំង មានទំនុកចិត្ត និងសមត្ថភាពគ្រប់គ្រាន់ ក្នុងការប្រយុទ្ធយកឈ្នះលើវីរុសប្រភេទថ្មីនេះ។ បើតាមការចុះផ្សាយរបស់ទូរទស្សន៍រដ្ឋ CCTV លោក ស៊ី បានប្រាប់លោក ត្រាំ តាមទូរសព្ទថា បើទោះបីជាមានការរីកសាយភាយនៃកូរ៉ូណាវីរុសនៅក្នុងប្រទេសក៏ពិតមែន បការអភិវឌ្ឍសេដ្ឋកិច្ចប្រកបដោយចីរភាព នឹងមិនមានការប្រែប្រួលឡើយ។
ក្នុងអំឡុងកិច្ចសន្ទនាតាមទូរសព្ទនេះ លោក ស៊ី បានប្រាប់លោក ត្រាំ ទៀតថា ចិន បានចាត់វិធានលើកូរ៉ូណាវីរុសយ៉ាងខ្លាំង និងលឿនបំផុត ដើម្បីទប់ស្កាត់ការរីកសាយភាយវីរុសនេះ។ ជាក់ស្តែងចិន បានចេញចំណាត់ការបិទក្រុង បិទមធ្យោបាយដឹកជញ្ជូន បិទជើងយន្តហោះ ការផាកពិន័យអ្នកមិនពាក់ម៉ាស់ក្នុងទីសាធារណៈ និងការសាងសង់មន្ទីពេទ្យក្នុងរយៈពេលលឿនជាដើម។
ក្រៅពីនេះ មេដឹកនាំពីរ បានយល់ព្រមសហប្រតិបត្តិការ និងពង្រឹកទំនាក់ទំនងបន្ថែមទៀត ជុំវីញកូរ៉ូណាវីរុស ហើយសេតវិមាន នឹងបន្តតាមដានរបាយការណ៍ស្តីពីកូរ៉ូណាវីរុសឲ្យបានល្អបំផុត តាមការចុះផ្សាយរបស់ព័ត៌មានរដ្ឋចិន។
សូមបញ្ជាក់ថា នាថ្ងៃទី៦ ខែកុម្ភៈ ប្រធានាធិបតី ស៊ី បានប្រកាសការរីកសាយភាយរបស់កូរ៉ូណាវីរុសថាជា «សង្គ្រាមរបស់ប្រជាជនចិន» ខណៈពេលមនុស្សជាច្រើនម៉ឺននាក់ បានផ្ទុកវីរុសថ្មីនេះ និងមានមនុស្ស ជាច្រើននាក់ បានស្លាប់ដោយសារកូរ៉ូណាវីរុស៕
Tag:
ចិន
អាមេរិក
កូរ៉ូណាវីរុស
© រក្សាសិទ្ធិដោយ thmeythmey.com
