FA ចេញគោលការណ៍ថ្មី ឲ្យកាត់បន្ថយការប្រើក្បាលពេលហ្វឹកហាត់ ដើម្បីបង្ការជំងឺវង្វេង

កីឡាអន្តរជាតិ

អន្តរជាតិ

FA ចេញគោលការណ៍ថ្មី ឲ្យកាត់បន្ថយការប្រើក្បាលពេលហ្វឹកហាត់ ដើម្បីបង្ការជំងឺវង្វេង

07, Feb 2020 , 5:07 pm

រូបភាព

ដោយ: ទេព ពិទូរ្យ

សហព័ន្ធកីឡាបាល់ទាត់អង់គ្លេស (FA) បានដាក់ចេញគោលការណ៍ណែនាំរបៀបបង្វឹកថ្មីដល់កីឡាករក្រោមអាយុ១៨ឆ្នាំ ដោយកម្រិតចំនួនប្រើប្រាស់ក្បាលតែតបាល់អំឡុងពេលហ្វឹកហាត់។ ការកាត់បន្ថយការប្រើប្រាស់ក្បាលនេះ គឺដើម្បីជាការការពារ ឬកាត់បន្ថយអត្រាការស្លាប់របស់កីឡាករបាល់ទាត់អាជីពដោយសារជំងឺវង្វេង ឬបញ្ហាខួរក្បាល។

គោលការណ៍ណែនាំថ្មីដែលបានផ្សាយដោយកាសែត The Times នៅមិនទាន់បានបញ្ចប់នៅឡើយទេ ប៉ុន្តែក៏គ្មានការហាមឃាត់ទាំងស្រុងចំពោះរបៀបហ្វឹកហាត់ថ្មីនេះដែរ។

កាលពីខែមករាកន្លងទៅ ទូរទស្សន៍ BBC ស្កុតឡែន បានបង្ហាញថា សហព័ន្ធកីឡាបាល់ទាត់ស្កុតឡែន (SFA) ក៏បានកំណត់ការហាមប្រាមក្មេងអាយុក្រោម១២ឆ្នាំ ប្រើប្រាស់ក្បាលក្នុងអំឡុងពេលហ្វឹកហាត់បាល់ទាត់ផងដែរ។

Jeff Astle អតីតខ្សែប្រយុទ្ធ West Brom ស្លាប់ដោយសារបញ្ហាខួរក្បាល

ការសិក្សាថ្មីមួយដែលបានបង្ហាញនៅក្នុងខែតុលា ឆ្នាំមុន បានរកឃើញពីផលប៉ះពាល់រវាងកីឡាករដែលលេងក្នុងកម្រិតអាជីព ជាមួយនឹងការស្លាប់ដោយសារជំងឺវង្វេង។

ការសិក្សាខាងលើនេះធ្វើឡើងដោយសាកលវិទ្យាល័យ Glasgow និងដឹកនាំដោយ សហព័ន្ធកីឡាបាល់ទាត់អង់គ្លេស (FA) ជាមួយសហព័ន្ធកីឡាបាល់ទាត់អាជីព (PFA)។ ពួកគេបានរកឃើញថា អតីតកីឡាករបាល់ទាត់អាជីពទំនងជាស្លាប់ដោយជំងឺខួរក្បាលច្រើនជាង៣ដងកន្លះ បើធៀបនឹងប្រជាជនទូទៅដែលមានអាយុស្របាលគ្នា។

គោលការណ៍ណែនាំថ្មីរបស់ FA រំពឹងថានឹងត្រូវដាក់ប្រើនៅចុងខែកុម្ភៈនេះ ដោយត្រូវអនុវត្តតែនៅក្នុងការហ្វឹកហាត់ប៉ុណ្ណោះ មិនមែននៅក្នុងការប្រកួតផ្លូវការឡើយ។

កាលពីខែធ្នូ ពោលគឺពីរខែបន្ទាប់ពីការចេញផ្សាយលទ្ធផលនៃការស្រាវជ្រាវ ប្រធានផ្នែកវេជ្ជសាស្ត្ររបស់ FA លោក Charlotte Cowie អះអាងថា ការស្រាវជ្រាវដែលដឹកនាំដោយ FA បានជំរុញឲ្យមានការពិនិត្យឡើងវិញនៃការផ្លាស់ប្តូរដែលអាចកើតមានចំពោះការបង្វឹក និងការបណ្តុះបណ្តាលនៅគ្រប់កម្រិតទាំងអស់ដើម្បីកាត់បន្ថយការប៉ះទង្គិចក្បាលដោយគ្មានបច្ចេកទេស។

«វាជាការចាំបាច់ដែលកីឡាបាល់ទាត់បច្ចុប្បន្នត្រូវធ្វើគ្រប់យ៉ាងដើម្បីស្វែងយល់បន្ថែមពីអ្វីដែលបណ្តាលឲ្យមានហានិភ័យកើនឡើង និងធ្វើអ្វីដើម្បីធានាបានថាកីឡាករបាល់ទាត់ជំនាន់ក្រោយត្រូវបានការពារ»។ នេះជាការបន្ថែមរបស់លោក Charlotte Cowie។

នៅអាមេរិក ការហាមឃាត់មិនឲ្យក្មេងៗប្រើក្បាលតែតបាល់ ត្រូវបានអនុវត្តចាប់តាំងពីឆ្នាំ ២០១៥ មកម្លេះ៕