ពីនេះ ពីនោះ
×![]()
ដោយ: ថ្មីៗ
សុធីរ និងសំណាង ខានជួបគ្នាផឹកកាហ្វេពីរបីព្រឹកហើយ។ មិនមែនដោយសារក្លើទាំងពីរអត់លុយទេ ប៉ុន្តែពួកគេរវល់ការងាររៀងខ្លួន។ ប៉ុន្តែល្អដែរ ខានមកផឹកកាហ្វេជាមួយសុធីរមែន តែសំណាងបានជួបមន្ត្រីមួយចំនួនដែលនិយាយខឹងក្រសួងខ្លួនឯងផង និងខឹងរដ្ឋាភិបាលផង។ សំណាងយករឿងនេះ មកទូលពិតសុធីរ។ សុធីរបានដៃ លះគ្មានសំចៃ ទៅមន្ត្រីទាំងនោះ។
សំណាង៖ អញរៀបចំសិក្ខាសាលាពីរបីថ្ងៃហ្នឹង អញ្ជើញមន្ត្រីមកចូលរួមច្រើនដែរ។ ពួកគេនោះ ពីមុនមួយម៉ាត់ក៏ថារដ្ឋមន្ត្រីគាត់ល្អ រដ្ឋាភិបាលខំប្រឹង។ ឥឡូវ ពួកគេនិយាយផ្ទុយវិញ។ ដល់អញសួរនាំទៅ មកពីឥឡូវពួកគេរកលុយលែងសូវបាន អត់សូវមានបេសកកម្ម។ អ្នកខ្លះទៀតថា មានបក្សពួកនិយម។ អ្នកថ្មីឡើងមក គេប្រើតែគ្នាគេ រីឯពួកគាត់ គេលែងសូវប្រើ។ ដល់អ៊ីចឹងទៅ រដ្ឋមន្ត្រីល្អ ឬរដ្ឋល្អ ទាល់តែមន្ត្រីរកលុយបាន? អញដូចឆ្ងល់ដែរវ៉ី?
សុធីរ៖ អាហ្នឹងគេហៅក្រុមមន្ត្រី អន្តរធាន។ មានក្រុមនេះកាន់តែច្រើន អន្តរាយកាន់តែខ្លាំង។ តើក្រុមនេះជាមន្ត្រីល្អ ឬអត់? ពេលមានប្រយោជន៍សំងំ កិបកេងយកប្រយោជន៍ ហើយគ្រាន់តែបានជួយនិយាយឱ្យពីរោះស្តាប់ថា រដ្ឋាភិបាលល្អ រដ្ឋាភិបាលកែទម្រង់។ ដល់ពេលបាត់បង់ប្រយោជន៍ ដើរនិយាយថារដ្ឋអាក្រក់ដូចនេះរដ្ឋអាក្រក់ដូចនោះ។
សំណាង៖ ហាស ហា! អញនៅចាំពាក្យរបស់អ្ហែងនិយាយលើកមុន គឺក្រុមឡេមឡឺម រណេបរណឺប ចាក់ស្រា។
សុធីរ៖ មនុស្សប្រភេទនេះ អាក្រក់ណាស់។ សមគំនិត ស៊ុមគ្រលុំ កឹបកេងយកលុយរដ្ឋ ដើម្បីប្រយោជន៍ផ្ទាល់ខ្លួនរាប់ឆ្នាំហើយ តែចុងក្រោយ ពេលលែងទទួលបានប្រយោជន៍ ក៏តាំងដើរនិយាយថាគេអាក្រក់ភ្លាម ដោយមិនបានខ្វល់ថា ពួកគេបានស៊ីចុករាប់ឆ្នាំនោះឡើយ។
សំណាង៖ អ្ហែងហៅពួកហ្នឹងថាម៉េច អម្បាញ់មិញ?
សុធីរ៖ មន្ត្រីអន្តរធាន ! មនុស្សបែបនេះ មិនបានសាងកេរ្តិ៍ឈ្មោះល្អទុកឱ្យកូនចៅទេ។
© រក្សាសិទ្ធិដោយ thmeythmey.com
