ជាតិ
សង្គមជាតិ
និមិត្តសញ្ញាចុងដំបូលប្រាសាទខ្មែរ«ជហ្វា» នឹងត្រូវប្រើជា Logo នៃកិច្ចប្រជុំកំពូលអាស៊ី-អឺរ៉ុបលើកទី១៣
×
ភ្នំពេញ៖ និមិត្តសញ្ញាចុងដំបូលប្រាសាទខ្មែរ«ជហ្វា» ត្រូវបានក្រសួងការបរទេសកម្ពុជា ជ្រើសរើសសម្រាប់ប្រើជានិមិត្តសញ្ញាផ្លូវការ នៃកិច្ចប្រជុំកំពូលអាស៊ី-អឺរ៉ុបលើកទី១៣ ឆ្នាំ២០២០ ដែលកម្ពុជាគឺជាម្ចាស់ផ្ទះ។ និមិត្តសញ្ញានេះ គូរដោយ យុវជន សៀង ឆាយលី និស្សិតសាកលវិទ្យាល័យភូមិន្ទ វិចិត្រសិល្បៈ។
យុវជន សៀង ឆាយលី ជាម្ចាស់ជ័យលាភីការប្រកួតនិមិត្តសញ្ញានេះរៀបរាប់ប្រាប់សារព័ត៌មានថ្មីៗថា និមិត្តសញ្ញានេះ គឺច្នៃចេញជាក្បាច់ខ្មែរទម្រង់ជា ជហ្វា ឬ ដងក្ដារ ដែលជាគ្រឿងដំបូល ឬផ្នែកខាងចុងនៃប្រាសាទ ព្រះវិហារ ឬសាលា មានទម្រង់ក្បាច់ខ្មែរ ដែលធ្លាប់បានប្រើប្រាស់គំរូចាស់ៗពីមុខមក។ ជហ្វា ក្នុងសាសនាសំដៅលើការបួងសួង សុំពរជ័យ ឡើងទៅលើមេឃ។ យុវជន សៀង ឆាយលី បន្តថា៖«និមិត្តសញ្ញានេះ ក្រឡេកភ្លាម យើងដឹងថា ជារបស់ខ្មែរ ដោយសារមានក្បាច់។ ក្រឡេកភ្លាមដឹងថា ជារបស់ខ្មែរ។ អត្ថន័យក្នុងនិមិត្តសញ្ញានេះ គឺប្រទេសក្នុងតំបន់អាស៊ីចម្រើនគ្រប់វិស័យ ដោយគួបផ្សំភាពស្អិតល្មួត ជាមួយសហព័ន្ធសហភាពអឺរ៉ុប»។
រូបភាពផ្តល់លោក សៀង ឆាយ លី ម្ចាស់ជ័យលាភីការប្រកួតគូរនិមិត្តសញ្ញាសម្រាប់កិច្ចប្រជុំអាស៊ី-អឺរ៉ុបលើកទី១៣
ចំណាយពេលជាង១សប្តាហ៍ ក្នុងការគូរ សៀង ឆាយលី ពន្យល់ថាពីមូលហេតុដែលគេសម្រេចយកនិមិត្តសញ្ញាជហ្វា មកគូរច្នៃ យ៉ាងដូច្នេះ៖«ព្រោះនិមិត្តសញ្ញាទាំង២ស្រដៀងដែរ ខ្ញុំគ្រាន់តែបន្ថែម គូសក្បាច់ក្រវាត់ទៅបន្តិច គឺចេញជា ជហ្វា ដែលមានរចនាបែបខ្មែរ និងបន្ថែមពណ៌ប៉ុណ្ណោះ។ ការធ្វើបែបនេះ ធ្វើឲ្យនិមិត្តសញ្ញាថ្មីនេះ មិនមានភាពរញ៉េរញ៉ៃ»។ ពណ៌ក្រហម តំណាងឲ្យ តំបន់អាស៊ី ហើយពណ៌ខៀវ តំណាង សហព័ន្ធសហភាពអឺរ៉ុប»។
កន្លងមក ស្នាដៃគំនូររបស់យុវជនរូបនេះ ក៏ធ្លាប់ជ្រើសរើសឲ្យប្រើប្រាស់ លើក្របសៀវភៅ ក្នុងកម្មវិធីទិវាវប្បធម៌ជាតិឆ្នាំ២០១៩ និងលើអាវយឺត របស់សហគមន៍អ្នកស្រឡាញភេទដូចគ្នាឥន្ធនូផងដែរ៕
រូបភាពផ្តល់លោក សៀង ឆាយ លី ម្ចាស់ជ័យលាភីការប្រកួតគូរនិមិត្តសញ្ញាសម្រាប់កិច្ចប្រជុំអាស៊ី-អឺរ៉ុបលើកទី១៣
Tag:
logo
ជហ្វា
កិច្ចប្រជុំអាស៊ី-អឺរ៉ុបលើទី១៣
និមិត្តសញ្ញា
© រក្សាសិទ្ធិដោយ thmeythmey.com